(൧) പച്ചുപ്പന്നവാരോ

(ക) അനുലോമപുഗ്ഗലോ

൨൭. (ക) യസ്സ ദുക്ഖസച്ചം ഉപ്പജ്ജതി തസ്സ സമുദയസച്ചം ഉപ്പജ്ജതീതി?

സബ്ബേസം ഉപപജ്ജന്താനം പവത്തേ തണ്ഹാവിപ്പയുത്തചിത്തസ്സ ഉപ്പാദക്ഖണേ തേസം ദുക്ഖസച്ചം ഉപ്പജ്ജതി, നോ ച തേസം സമുദയസച്ചം ഉപ്പജ്ജതി. തണ്ഹായ ഉപ്പാദക്ഖണേ തേസം ദുക്ഖസച്ചഞ്ച ഉപ്പജ്ജതി സമുദയസച്ചഞ്ച ഉപ്പജ്ജതി.

(ഖ) യസ്സ വാ പന സമുദയസച്ചം ഉപ്പജ്ജതി തസ്സ ദുക്ഖസച്ചം ഉപ്പജ്ജതീതി? ആമന്താ.

(ക) യസ്സ ദുക്ഖസച്ചം ഉപ്പജ്ജതി തസ്സ മഗ്ഗസച്ചം ഉപ്പജ്ജതീതി?

സബ്ബേസം ഉപപജ്ജന്താനം പവത്തേ മഗ്ഗവിപ്പയുത്തചിത്തസ്സ ഉപ്പാദക്ഖണേ തേസം ദുക്ഖസച്ചം ഉപ്പജ്ജതി, നോ ച തേസം മഗ്ഗസച്ചം ഉപ്പജ്ജതി. പഞ്ചവോകാരേ മഗ്ഗസ്സ ഉപ്പാദക്ഖണേ തേസം ദുക്ഖസച്ചഞ്ച ഉപ്പജ്ജതി മഗ്ഗസച്ചഞ്ച ഉപ്പജ്ജതി.

(ഖ) യസ്സ വാ പന മഗ്ഗസച്ചം ഉപ്പജ്ജതി തസ്സ ദുക്ഖസച്ചം ഉപ്പജ്ജതീതി?

അരൂപേ മഗ്ഗസ്സ ഉപ്പാദക്ഖണേ തേസം മഗ്ഗസച്ചം ഉപ്പജ്ജതി, നോ ച തേസം ദുക്ഖസച്ചം ഉപ്പജ്ജതി. പഞ്ചവോകാരേ മഗ്ഗസ്സ ഉപ്പാദക്ഖണേ തേസം മഗ്ഗസച്ചഞ്ച ഉപ്പജ്ജതി ദുക്ഖസച്ചഞ്ച ഉപ്പജ്ജതി.

൨൮. (ക) യസ്സ സമുദയസച്ചം ഉപ്പജ്ജതി തസ്സ മഗ്ഗസച്ചം ഉപ്പജ്ജതീതി? നോ.

(ഖ) യസ്സ വാ പന മഗ്ഗസച്ചം ഉപ്പജ്ജതി തസ്സ സമുദയസച്ചം ഉപ്പജ്ജതീതി? നോ.

(ഖ) അനുലോമഓകാസോ

൨൯. (ക) യത്ഥ ദുക്ഖസച്ചം ഉപ്പജ്ജതി തത്ഥ സമുദയസച്ചം ഉപ്പജ്ജതീതി?

അസഞ്ഞസത്തേ തത്ഥ ദുക്ഖസച്ചം ഉപ്പജ്ജതി, നോ ച തത്ഥ സമുദയസച്ചം ഉപ്പജ്ജതി. ചതുവോകാരേ പഞ്ചവോകാരേ തത്ഥ ദുക്ഖസച്ചഞ്ച ഉപ്പജ്ജതി സമുദയസച്ചഞ്ച ഉപ്പജ്ജതി.

(ഖ) യത്ഥ വാ പന…പേ…? ആമന്താ.

(ക) യത്ഥ ദുക്ഖസച്ചം ഉപ്പജ്ജതി തത്ഥ മഗ്ഗസച്ചം ഉപ്പജ്ജതീതി?

അപായേ അസഞ്ഞസത്തേ തത്ഥ ദുക്ഖസച്ചം ഉപ്പജ്ജതി, നോ ച തത്ഥ മഗ്ഗസച്ചം ഉപ്പജ്ജതി. അവസേസേ ചതുവോകാരേ പഞ്ചവോകാരേ തത്ഥ ദുക്ഖസച്ചഞ്ച ഉപ്പജ്ജതി മഗ്ഗസച്ചഞ്ച ഉപ്പജ്ജതി.

(ഖ) യത്ഥ വാ പന മഗ്ഗസച്ചം ഉപ്പജ്ജതി തത്ഥ ദുക്ഖസച്ചം ഉപ്പജ്ജതീതി? ആമന്താ.

൩൦. (ക) യത്ഥ സമുദയസച്ചം ഉപ്പജ്ജതി തത്ഥ മഗ്ഗസച്ചം ഉപ്പജ്ജതീതി?

അപായേ തത്ഥ സമുദയസച്ചം ഉപ്പജ്ജതി, നോ ച തത്ഥ മഗ്ഗസച്ചം ഉപ്പജ്ജതി. അവസേസേ ചതുവോകാരേ പഞ്ചവോകാരേ തത്ഥ സമുദയസച്ചഞ്ച ഉപ്പജ്ജതി മഗ്ഗസച്ചഞ്ച ഉപ്പജ്ജതി.

(ഖ) യത്ഥ വാ പന…പേ…? ആമന്താ.

(ഗ) അനുലോമപുഗ്ഗലോകാസാ

൩൧. യസ്സ യത്ഥ ദുക്ഖസച്ചം ഉപ്പജ്ജതി തസ്സ തത്ഥ സമുദയസച്ചം ഉപ്പജ്ജതീതി?…പേ….

(യസ്സകമ്പി യസ്സയത്ഥകമ്പി സദിസം വിത്ഥാരേതബ്ബം).

(ഘ) പച്ചനീകപുഗ്ഗലോ

൩൨. (ക) യസ്സ ദുക്ഖസച്ചം നുപ്പജ്ജതി തസ്സ സമുദയസച്ചം നുപ്പജ്ജതീതി? ആമന്താ.

(ഖ) യസ്സ വാ പന സമുദയസച്ചം നുപ്പജ്ജതി തസ്സ ദുക്ഖസച്ചം നുപ്പജ്ജതീതി?

സബ്ബേസം ഉപപജ്ജന്താനം പവത്തേ തണ്ഹാവിപ്പയുത്തചിത്തസ്സ ഉപ്പാദക്ഖണേ തേസം സമുദയസച്ചം നുപ്പജ്ജതി, നോ ച തേസം ദുക്ഖസച്ചം നുപ്പജ്ജതി. സബ്ബേസം ചവന്താനം പവത്തേ ചിത്തസ്സ ഭങ്ഗക്ഖണേ അരൂപേ മഗ്ഗസ്സ ച ഫലസ്സ ച ഉപ്പാദക്ഖണേ തേസം സമുദയസച്ചഞ്ച നുപ്പജ്ജതി ദുക്ഖസച്ചഞ്ച നുപ്പജ്ജതി.

(ക) യസ്സ ദുക്ഖസച്ചം നുപ്പജ്ജതി തസ്സ മഗ്ഗസച്ചം നുപ്പജ്ജതീതി?

അരൂപേ മഗ്ഗസ്സ ഉപ്പാദക്ഖണേ തേസം ദുക്ഖസച്ചം നുപ്പജ്ജതി, നോ ച തേസം മഗ്ഗസച്ചം നുപ്പജ്ജതി. സബ്ബേസം ചവന്താനം പവത്തേ ചിത്തസ്സ ഭങ്ഗക്ഖണേ അരൂപേ ഫലസ്സ ഉപ്പാദക്ഖണേ തേസം ദുക്ഖസച്ചഞ്ച നുപ്പജ്ജതി മഗ്ഗസച്ചഞ്ച നുപ്പജ്ജതി.

(ഖ) യസ്സ വാ പന മഗ്ഗസച്ചം നുപ്പജ്ജതി തസ്സ ദുക്ഖസച്ചം നുപ്പജ്ജതീതി?

സബ്ബേസം ഉപപജ്ജന്താനം പവത്തേ മഗ്ഗവിപ്പയുത്തചിത്തസ്സ ഉപ്പാദക്ഖണേ തേസം മഗ്ഗസച്ചം നുപ്പജ്ജതി, നോ ച തേസം ദുക്ഖസച്ചം നുപ്പജ്ജതി. സബ്ബേസം ചവന്താനം പവത്തേ ചിത്തസ്സ ഭങ്ഗക്ഖണേ അരൂപേ ഫലസ്സ ഉപ്പാദക്ഖണേ തേസം മഗ്ഗസച്ചഞ്ച നുപ്പജ്ജതി ദുക്ഖസച്ചഞ്ച നുപ്പജ്ജതി.

൩൩. (ക) യസ്സ സമുദയസച്ചം നുപ്പജ്ജതി തസ്സ മഗ്ഗസച്ചം നുപ്പജ്ജതീതി?

മഗ്ഗസ്സ ഉപ്പാദക്ഖണേ തേസം സമുദയസച്ചം നുപ്പജ്ജതി, നോ ച തേസം മഗ്ഗസച്ചം നുപ്പജ്ജതി. സബ്ബേസം ചിത്തസ്സ ഭങ്ഗക്ഖണേ തണ്ഹാവിപ്പയുത്തമഗ്ഗവിപ്പയുത്തചിത്തസ്സ ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം സമുദയസച്ചഞ്ച നുപ്പജ്ജതി മഗ്ഗസച്ചഞ്ച നുപ്പജ്ജതി.

(ഖ) യസ്സ വാ പന മഗ്ഗസച്ചം നുപ്പജ്ജതി തസ്സ സമുദയസച്ചം നുപ്പജ്ജതീതി?

തണ്ഹായ ഉപ്പാദക്ഖണേ തേസം മഗ്ഗസച്ചം നുപ്പജ്ജതി, നോ ച തേസം സമുദയസച്ചം നുപ്പജ്ജതി. സബ്ബേസം ചിത്തസ്സ ഭങ്ഗക്ഖണേ മഗ്ഗവിപ്പയുത്തതണ്ഹാവിപ്പയുത്തചിത്തസ്സ [തണ്ഹാവിപ്പയുത്തമഗ്ഗവിപ്പയുത്തചിത്തസ്സ (സീ.) ഏവം പുഗ്ഗലോകാസേപി നിരോധവാരേപി] ഉപ്പാദക്ഖണേ നിരോധസമാപന്നാനം അസഞ്ഞസത്താനം തേസം മഗ്ഗസച്ചഞ്ച നുപ്പജ്ജതി സമുദയസച്ചഞ്ച നുപ്പജ്ജതി.

(ങ) പച്ചനീകഓകാസോ

൩൪. (ക) യത്ഥ ദുക്ഖസച്ചം നുപ്പജ്ജതി തത്ഥ സമുദയസച്ചം നുപ്പജ്ജതീതി? നത്ഥി.

(ഖ) യത്ഥ വാ പന സമുദയസച്ചം നുപ്പജ്ജതി തത്ഥ ദുക്ഖസച്ചം നുപ്പജ്ജതീതി? ഉപ്പജ്ജതി.

(ക) യത്ഥ ദുക്ഖസച്ചം നുപ്പജ്ജതി തത്ഥ മഗ്ഗസച്ചം നുപ്പജ്ജതീതി? നത്ഥി.

(ഖ) യത്ഥ വാ പന മഗ്ഗസച്ചം നുപ്പജ്ജതി തത്ഥ ദുക്ഖസച്ചം നുപ്പജ്ജതീതി? ഉപ്പജ്ജതി.

൩൫. (ക) യത്ഥ സമുദയസച്ചം നുപ്പജ്ജതി തത്ഥ മഗ്ഗസച്ചം നുപ്പജ്ജതീതി? ആമന്താ.

(ഖ) യത്ഥ വാ പന മഗ്ഗസച്ചം നുപ്പജ്ജതി തത്ഥ സമുദയസച്ചം നുപ്പജ്ജതീതി?

അപായേ തത്ഥ മഗ്ഗസച്ചം നുപ്പജ്ജതി, നോ ച തത്ഥ സമുദയസച്ചം നുപ്പജ്ജതി. അസഞ്ഞസത്തേ തത്ഥ മഗ്ഗസച്ചഞ്ച നുപ്പജ്ജതി സമുദയസച്ചഞ്ച നുപ്പജ്ജതി.

(ച) പച്ചനീകപുഗ്ഗലോകാസാ

൩൬. (ക) യസ്സ യത്ഥ ദുക്ഖസച്ചം നുപ്പജ്ജതി തസ്സ തത്ഥ സമുദയസച്ചം നുപ്പജ്ജതീതി? ആമന്താ.

(ഖ) യസ്സ വാ പന യത്ഥ സമുദയസച്ചം നുപ്പജ്ജതി തസ്സ തത്ഥ ദുക്ഖസച്ചം നുപ്പജ്ജതീതി?

സബ്ബേസം ഉപപജ്ജന്താനം പവത്തേ തണ്ഹാവിപ്പയുത്തചിത്തസ്സ ഉപ്പാദക്ഖണേ തേസം തത്ഥ സമുദയസച്ചം നുപ്പജ്ജതി, നോ ച തേസം തത്ഥ ദുക്ഖസച്ചം നുപ്പജ്ജതി. സബ്ബേസം ചവന്താനം പവത്തേ ചിത്തസ്സ ഭങ്ഗക്ഖണേ അരൂപേ മഗ്ഗസ്സ ച ഫലസ്സ ച ഉപ്പാദക്ഖണേ തേസം തത്ഥ സമുദയസച്ചഞ്ച നുപ്പജ്ജതി ദുക്ഖസച്ചഞ്ച നുപ്പജ്ജതി.

(ക) യസ്സ യത്ഥ ദുക്ഖസച്ചം നുപ്പജ്ജതി തസ്സ തത്ഥ മഗ്ഗസച്ചം നുപ്പജ്ജതീതി?

അരൂപേ മഗ്ഗസ്സ ഉപ്പാദക്ഖണേ തേസം തത്ഥ ദുക്ഖസച്ചം നുപ്പജ്ജതി, നോ ച തേസം തത്ഥ മഗ്ഗസച്ചം നുപ്പജ്ജതി. സബ്ബേസം ചവന്താനം പവത്തേ ചിത്തസ്സ ഭങ്ഗക്ഖണേ അരൂപേ ഫലസ്സ ഉപ്പാദക്ഖണേ തേസം തത്ഥ ദുക്ഖസച്ചഞ്ച നുപ്പജ്ജതി മഗ്ഗസച്ചഞ്ച നുപ്പജ്ജതി.

(ഖ) യസ്സ വാ പന യത്ഥ മഗ്ഗസച്ചം നുപ്പജ്ജതി തസ്സ തത്ഥ ദുക്ഖസച്ചം നുപ്പജ്ജതീതി?

സബ്ബേസം ഉപപജ്ജന്താനം പവത്തേ മഗ്ഗവിപ്പയുത്തചിത്തസ്സ ഉപ്പാദക്ഖണേ തേസം തത്ഥ മഗ്ഗസച്ചം നുപ്പജ്ജതി, നോ ച തേസം തത്ഥ ദുക്ഖസച്ചം നുപ്പജ്ജതി. സബ്ബേസം ചവന്താനം പവത്തേ ചിത്തസ്സ ഭങ്ഗക്ഖണേ അരൂപേ ഫലസ്സ ഉപ്പാദക്ഖണേ തേസം തത്ഥ മഗ്ഗസച്ചഞ്ച നുപ്പജ്ജതി ദുക്ഖസച്ചഞ്ച നുപ്പജ്ജതി.

൩൭. (ക) യസ്സ യത്ഥ സമുദയസച്ചം നുപ്പജ്ജതി തസ്സ തത്ഥ മഗ്ഗസച്ചം നുപ്പജ്ജതീതി?

മഗ്ഗസ്സ ഉപ്പാദക്ഖണേ തേസം തത്ഥ സമുദയസച്ചം നുപ്പജ്ജതി, നോ ച തേസം തത്ഥ മഗ്ഗസച്ചം നുപ്പജ്ജതി. സബ്ബേസം ചിത്തസ്സ ഭങ്ഗക്ഖണേ തണ്ഹാവിപ്പയുത്തമഗ്ഗവിപ്പയുത്തചിത്തസ്സ ഉപ്പാദക്ഖണേ അസഞ്ഞസത്താനം തേസം തത്ഥ സമുദയസച്ചഞ്ച നുപ്പജ്ജതി മഗ്ഗസച്ചഞ്ച നുപ്പജ്ജതി.

(ഖ) യസ്സ വാ പന യത്ഥ മഗ്ഗസച്ചം നുപ്പജ്ജതി തസ്സ തത്ഥ സമുദയസച്ചം നുപ്പജ്ജതീതി?

തണ്ഹായ ഉപ്പാദക്ഖണേ തേസം തത്ഥ മഗ്ഗസച്ചം നുപ്പജ്ജതി, നോ ച തേസം തത്ഥ സമുദയസച്ചം നുപ്പജ്ജതി. സബ്ബേസം ചിത്തസ്സ ഭങ്ഗക്ഖണേ മഗ്ഗവിപ്പയുത്തതണ്ഹാവിപ്പയുത്തചിത്തസ്സ ഉപ്പാദക്ഖണേ അസഞ്ഞസത്താനം തേസം തത്ഥ മഗ്ഗസച്ചഞ്ച നുപ്പജ്ജതി സമുദയസച്ചഞ്ച നുപ്പജ്ജതി.