(൫) പച്ചുപ്പന്നാനാഗതവാരോ

(ക) അനുലോമപുഗ്ഗലോ

൧൮൬. (ക) യസ്സ രൂപക്ഖന്ധോ ഉപ്പജ്ജതി തസ്സ വേദനാക്ഖന്ധോ നിരുജ്ഝിസ്സതീതി? ആമന്താ.

(ഖ) യസ്സ വാ പന വേദനാക്ഖന്ധോ നിരുജ്ഝിസ്സതി തസ്സ രൂപക്ഖന്ധോ ഉപ്പജ്ജതീതി?

സബ്ബേസം ചവന്താനം അരൂപം ഉപപജ്ജന്താനം തേസം വേദനാക്ഖന്ധോ നിരുജ്ഝിസ്സതി, നോ ച തേസം രൂപക്ഖന്ധോ ഉപ്പജ്ജതി. പഞ്ചവോകാരം ഉപപജ്ജന്താനം അസഞ്ഞസത്തം ഉപപജ്ജന്താനം തേസം വേദനാക്ഖന്ധോ ച നിരുജ്ഝിസ്സതി രൂപക്ഖന്ധോ ച ഉപ്പജ്ജതി.

൧൮൭. (ക) യസ്സ വേദനാക്ഖന്ധോ ഉപ്പജ്ജതി തസ്സ സഞ്ഞാക്ഖന്ധോ നിരുജ്ഝിസ്സതീതി? ആമന്താ.

(ഖ) യസ്സ വാ പന സഞ്ഞാക്ഖന്ധോ നിരുജ്ഝിസ്സതി തസ്സ വേദനാക്ഖന്ധോ ഉപ്പജ്ജതീതി?

സബ്ബേസം ചവന്താനം അസഞ്ഞസത്തം ഉപപജ്ജന്താനം തേസം സഞ്ഞാക്ഖന്ധോ നിരുജ്ഝിസ്സതി, നോ ച തേസം വേദനാക്ഖന്ധോ ഉപ്പജ്ജതി. ചതുവോകാരം പഞ്ചവോകാരം ഉപപജ്ജന്താനം തേസം സഞ്ഞാക്ഖന്ധോ ച നിരുജ്ഝിസ്സതി വേദനാക്ഖന്ധോ ച ഉപ്പജ്ജതി.

(ഖ) അനുലോമഓകാസോ

൧൮൮. യത്ഥ രൂപക്ഖന്ധോ ഉപ്പജ്ജതി…പേ….

(ഗ) അനുലോമപുഗ്ഗലോകാസാ

൧൮൯. (ക) യസ്സ യത്ഥ രൂപക്ഖന്ധോ ഉപ്പജ്ജതി തസ്സ തത്ഥ വേദനാക്ഖന്ധോ നിരുജ്ഝിസ്സതീതി?

അസഞ്ഞസത്തം ഉപപജ്ജന്താനം തേസം തത്ഥ രൂപക്ഖന്ധോ ഉപ്പജ്ജതി, നോ ച തേസം തത്ഥ വേദനാക്ഖന്ധോ നിരുജ്ഝിസ്സതി. പഞ്ചവോകാരം ഉപപജ്ജന്താനം തേസം തത്ഥ രൂപക്ഖന്ധോ ച ഉപ്പജ്ജതി വേദനാക്ഖന്ധോ ച നിരുജ്ഝിസ്സതി.

(ഖ) യസ്സ വാ പന യത്ഥ വേദനാക്ഖന്ധോ നിരുജ്ഝിസ്സതി തസ്സ തത്ഥ രൂപക്ഖന്ധോ ഉപ്പജ്ജതീതി?

പഞ്ചവോകാരാ ചവന്താനം അരൂപാനം തേസം തത്ഥ വേദനാക്ഖന്ധോ നിരുജ്ഝിസ്സതി, നോ ച തേസം തത്ഥ രൂപക്ഖന്ധോ ഉപ്പജ്ജതി. പഞ്ചവോകാരം ഉപപജ്ജന്താനം തേസം തത്ഥ വേദനാക്ഖന്ധോ ച നിരുജ്ഝിസ്സതി രൂപക്ഖന്ധോ ച ഉപ്പജ്ജതി.

൧൯൦. (ക) യസ്സ യത്ഥ വേദനാക്ഖന്ധോ ഉപ്പജ്ജതി തസ്സ തത്ഥ സഞ്ഞാക്ഖന്ധോ നിരുജ്ഝിസ്സതീതി? ആമന്താ.

(ഖ) യസ്സ വാ പന യത്ഥ സഞ്ഞാക്ഖന്ധോ നിരുജ്ഝിസ്സതി തസ്സ തത്ഥ വേദനാക്ഖന്ധോ ഉപ്പജ്ജതീതി?

ചതുവോകാരാ പഞ്ചവോകാരാ ചവന്താനം തേസം തത്ഥ സഞ്ഞാക്ഖന്ധോ നിരുജ്ഝിസ്സതി, നോ ച തേസം തത്ഥ വേദനാക്ഖന്ധോ ഉപ്പജ്ജതി. ചതുവോകാരം പഞ്ചവോകാരം ഉപപജ്ജന്താനം തേസം തത്ഥ സഞ്ഞാക്ഖന്ധോ ച നിരുജ്ഝിസ്സതി വേദനാക്ഖന്ധോ ച ഉപ്പജ്ജതി.

(ഘ) പച്ചനീകപുഗ്ഗലോ

൧൯൧. (ക) യസ്സ രൂപക്ഖന്ധോ നുപ്പജ്ജതി തസ്സ വേദനാക്ഖന്ധോ ന നിരുജ്ഝിസ്സതീതി?

സബ്ബേസം ചവന്താനം അരൂപം ഉപപജ്ജന്താനം തേസം രൂപക്ഖന്ധോ നുപ്പജ്ജതി, നോ ച തേസം വേദനാക്ഖന്ധോ ന നിരുജ്ഝിസ്സതി. പരിനിബ്ബന്താനം തേസം രൂപക്ഖന്ധോ ച നുപ്പജ്ജതി വേദനാക്ഖന്ധോ ച ന നിരുജ്ഝിസ്സതി.

(ഖ) യസ്സ വാ പന വേദനാക്ഖന്ധോ ന നിരുജ്ഝിസ്സതി തസ്സ രൂപക്ഖന്ധോ നുപ്പജ്ജതീതി? ആമന്താ.

൧൯൨. (ക) യസ്സ വേദനാക്ഖന്ധോ നുപ്പജ്ജതി തസ്സ സഞ്ഞാക്ഖന്ധോ ന നിരുജ്ഝിസ്സതീതി?

സബ്ബേസം ചവന്താനം അസഞ്ഞസത്തം ഉപപജ്ജന്താനം തേസം വേദനാക്ഖന്ധോ നുപ്പജ്ജതി, നോ ച തേസം സഞ്ഞാക്ഖന്ധോ ന നിരുജ്ഝിസ്സതി. പരിനിബ്ബന്താനം തേസം വേദനാക്ഖന്ധോ ച നുപ്പജ്ജതി സഞ്ഞാക്ഖന്ധോ ച ന നിരുജ്ഝിസ്സതി.

(ഖ) യസ്സ വാ പന സഞ്ഞാക്ഖന്ധോ ന നിരുജ്ഝിസ്സതി തസ്സ വേദനാക്ഖന്ധോ നുപ്പജ്ജതീതി? ആമന്താ.

(ങ) പച്ചനീകഓകാസോ

൧൯൩. യത്ഥ രൂപക്ഖന്ധോ നുപ്പജ്ജതി…പേ….

(ച) പച്ചനീകപുഗ്ഗലോകാസാ

൧൯൪. (ക) യസ്സ യത്ഥ രൂപക്ഖന്ധോ നുപ്പജ്ജതി തസ്സ തത്ഥ വേദനാക്ഖന്ധോ ന നിരുജ്ഝിസ്സതീതി?

പഞ്ചവോകാരാ ചവന്താനം അരൂപാനം തേസം തത്ഥ രൂപക്ഖന്ധോ നുപ്പജ്ജതി, നോ ച തേസം തത്ഥ വേദനാക്ഖന്ധോ ന നിരുജ്ഝിസ്സതി. പരിനിബ്ബന്താനം അസഞ്ഞസത്താ ചവന്താനം തേസം തത്ഥ രൂപക്ഖന്ധോ ച നുപ്പജ്ജതി വേദനാക്ഖന്ധോ ച ന നിരുജ്ഝിസ്സതി.

(ഖ) യസ്സ വാ പന യത്ഥ വേദനാക്ഖന്ധോ ന നിരുജ്ഝിസ്സതി തസ്സ തത്ഥ രൂപക്ഖന്ധോ നുപ്പജ്ജതീതി?

അസഞ്ഞസത്തം ഉപപജ്ജന്താനം തേസം തത്ഥ വേദനാക്ഖന്ധോ ന നിരുജ്ഝിസ്സതി, നോ ച തേസം തത്ഥ രൂപക്ഖന്ധോ നുപ്പജ്ജതി. പരിനിബ്ബന്താനം അസഞ്ഞസത്താ ചവന്താനം തേസം തത്ഥ വേദനാക്ഖന്ധോ ച ന നിരുജ്ഝിസ്സതി രൂപക്ഖന്ധോ ച നുപ്പജ്ജതി.

൧൯൫. (ക) യസ്സ യത്ഥ വേദനാക്ഖന്ധോ നുപ്പജ്ജതി തസ്സ തത്ഥ സഞ്ഞാക്ഖന്ധോ ന നിരുജ്ഝിസ്സതീതി?

ചതുവോകാരാ പഞ്ചവോകാരാ ചവന്താനം തേസം തത്ഥ വേദനാക്ഖന്ധോ നുപ്പജ്ജതി, നോ ച തേസം തത്ഥ സഞ്ഞാക്ഖന്ധോ ന നിരുജ്ഝിസ്സതി. പരിനിബ്ബന്താനം അസഞ്ഞസത്താനം തേസം തത്ഥ വേദനാക്ഖന്ധോ ച നുപ്പജ്ജതി സഞ്ഞാക്ഖന്ധോ ച ന നിരുജ്ഝിസ്സതി.

(ഖ) യസ്സ വാ പന യത്ഥ സഞ്ഞാക്ഖന്ധോ ന നിരുജ്ഝിസ്സതി തസ്സ തത്ഥ വേദനാക്ഖന്ധോ നുപ്പജ്ജതീതി? ആമന്താ.