(൨) അതീതവാരോ

(ക) അനുലോമപുഗ്ഗലോ

൧൬൫. (ക) യസ്സ രൂപക്ഖന്ധോ ഉപ്പജ്ജിത്ഥ തസ്സ വേദനാക്ഖന്ധോ നിരുജ്ഝിത്ഥാതി? ആമന്താ.

(ഖ) യസ്സ വാ പന വേദനാക്ഖന്ധോ നിരുജ്ഝിത്ഥ തസ്സ രൂപക്ഖന്ധോ ഉപ്പജ്ജിത്ഥാതി? ആമന്താ.

൧൬൬. (ക) യസ്സ വേദനാക്ഖന്ധോ ഉപ്പജ്ജിത്ഥ തസ്സ സഞ്ഞാക്ഖന്ധോ നിരുജ്ഝിത്ഥാതി? ആമന്താ.

(ഖ) യസ്സ വാ പന സഞ്ഞാക്ഖന്ധോ നിരുജ്ഝിത്ഥ തസ്സ വേദനാക്ഖന്ധോ ഉപ്പജ്ജിത്ഥാതി? ആമന്താ.

(ഖ) അനുലോമഓകാസോ

൧൬൭. യത്ഥ രൂപക്ഖന്ധോ ഉപ്പജ്ജിത്ഥ…പേ….

(ഗ) അനുലോമപുഗ്ഗലോകാസാ

൧൬൮. (ക) യസ്സ യത്ഥ രൂപക്ഖന്ധോ ഉപ്പജ്ജിത്ഥ തസ്സ തത്ഥ വേദനാക്ഖന്ധോ നിരുജ്ഝിത്ഥാതി?

അസഞ്ഞസത്താനം തേസം തത്ഥ രൂപക്ഖന്ധോ ഉപ്പജ്ജിത്ഥ, നോ ച തേസം തത്ഥ വേദനാക്ഖന്ധോ നിരുജ്ഝിത്ഥ. പഞ്ചവോകാരാനം തേസം തത്ഥ രൂപക്ഖന്ധോ ച ഉപ്പജ്ജിത്ഥ വേദനാക്ഖന്ധോ ച നിരുജ്ഝിത്ഥ.

(ഖ) യസ്സ വാ പന യത്ഥ വേദനാക്ഖന്ധോ നിരുജ്ഝിത്ഥ തസ്സ തത്ഥ രൂപക്ഖന്ധോ ഉപ്പജ്ജിത്ഥാതി?

അരൂപാനം തേസം തത്ഥ വേദനാക്ഖന്ധോ നിരുജ്ഝിത്ഥ, നോ ച തേസം തത്ഥ രൂപക്ഖന്ധോ ഉപ്പജ്ജിത്ഥ. പഞ്ചവോകാരാനം തേസം തത്ഥ വേദനാക്ഖന്ധോ ച നിരുജ്ഝിത്ഥ രൂപക്ഖന്ധോ ച ഉപ്പജ്ജിത്ഥ.

൧൬൯. (ക) യസ്സ യത്ഥ വേദനാക്ഖന്ധോ ഉപ്പജ്ജിത്ഥ തസ്സ തത്ഥ സഞ്ഞാക്ഖന്ധോ നിരുജ്ഝിത്ഥാതി? ആമന്താ.

(ഖ) യസ്സ വാ പന യത്ഥ സഞ്ഞാക്ഖന്ധോ നിരുജ്ഝിത്ഥ തസ്സ തത്ഥ വേദനാക്ഖന്ധോ ഉപ്പജ്ജിത്ഥാതി? ആമന്താ.

(ഘ) പച്ചനീകപുഗ്ഗലോ

൧൭൦. (ക) യസ്സ രൂപക്ഖന്ധോ നുപ്പജ്ജിത്ഥ തസ്സ വേദനാക്ഖന്ധോ ന നിരുജ്ഝിത്ഥാതി? നത്ഥി.

(ഖ) യസ്സ വാ പന വേദനാക്ഖന്ധോ ന നിരുജ്ഝിത്ഥ തസ്സ രൂപക്ഖന്ധോ നുപ്പജ്ജിത്ഥാതി? നത്ഥി.

൧൭൧. (ക) യസ്സ വേദനാക്ഖന്ധോ നുപ്പജ്ജിത്ഥ തസ്സ സഞ്ഞാക്ഖന്ധോ ന നിരുജ്ഝിത്ഥാതി? നത്ഥി.

(ഖ) യസ്സ വാ പന സഞ്ഞാക്ഖന്ധോ ന നിരുജ്ഝിത്ഥ തസ്സ വേദനാക്ഖന്ധോ നുപ്പജ്ജിത്ഥാതി? നത്ഥി.

(ങ) പച്ചനീകഓകാസോ

൧൭൨. യത്ഥ രൂപക്ഖന്ധോ നുപ്പജ്ജിത്ഥ…പേ….

(ച) പച്ചനീകപുഗ്ഗലോകാസാ

൧൭൩. (ക) യസ്സ യത്ഥ രൂപക്ഖന്ധോ നുപ്പജ്ജിത്ഥ തസ്സ തത്ഥ വേദനാക്ഖന്ധോ ന നിരുജ്ഝിത്ഥാതി?

അരൂപാനം തേസം തത്ഥ രൂപക്ഖന്ധോ നുപ്പജ്ജിത്ഥ, നോ ച തേസം തത്ഥ വേദനാക്ഖന്ധോ ന നിരുജ്ഝിത്ഥ. സുദ്ധാവാസാനം തേസം തത്ഥ രൂപക്ഖന്ധോ ച നുപ്പജ്ജിത്ഥ വേദനാക്ഖന്ധോ ച ന നിരുജ്ഝിത്ഥ.

(ഖ) യസ്സ വാ പന യത്ഥ വേദനാക്ഖന്ധോ ന നിരുജ്ഝിത്ഥ തസ്സ തത്ഥ രൂപക്ഖന്ധോ നുപ്പജ്ജിത്ഥാതി?

അസഞ്ഞസത്താനം തേസം തത്ഥ വേദനാക്ഖന്ധോ ന നിരുജ്ഝിത്ഥ, നോ ച തേസം തത്ഥ രൂപക്ഖന്ധോ നുപ്പജ്ജിത്ഥ. സുദ്ധാവാസാനം തേസം തത്ഥ വേദനാക്ഖന്ധോ ച ന നിരുജ്ഝിത്ഥ രൂപക്ഖന്ധോ ച നുപ്പജ്ജിത്ഥ.

൧൭൪. (ക) യസ്സ യത്ഥ വേദനാക്ഖന്ധോ നുപ്പജ്ജിത്ഥ തസ്സ തത്ഥ സഞ്ഞാക്ഖന്ധോ ന നിരുജ്ഝിത്ഥാതി? ആമന്താ.

(ഖ) യസ്സ വാ പന യത്ഥ സഞ്ഞാക്ഖന്ധോ ന നിരുജ്ഝിത്ഥ തസ്സ തത്ഥ വേദനാക്ഖന്ധോ നുപ്പജ്ജിത്ഥാതി? ആമന്താ.