(൩) അനാഗതവാരോ

(ക) അനുലോമപുഗ്ഗലോ

൧൭൫. (ക) യസ്സ രൂപക്ഖന്ധോ ഉപ്പജ്ജിസ്സതി തസ്സ വേദനാക്ഖന്ധോ നിരുജ്ഝിസ്സതീതി? ആമന്താ.

(ഖ) യസ്സ വാ പന വേദനാക്ഖന്ധോ നിരുജ്ഝിസ്സതി തസ്സ രൂപക്ഖന്ധോ ഉപ്പജ്ജിസ്സതീതി?

പച്ഛിമഭവികാനം ഉപപജ്ജന്താനം യേ ച അരൂപം ഉപപജ്ജിത്വാ പരിനിബ്ബായിസ്സന്തി തേസം വേദനാക്ഖന്ധോ നിരുജ്ഝിസ്സതി, നോ ച തേസം രൂപക്ഖന്ധോ ഉപ്പജ്ജിസ്സതി. ഇതരേസം തേസം വേദനാക്ഖന്ധോ ച നിരുജ്ഝിസ്സതി രൂപക്ഖന്ധോ ച ഉപ്പജ്ജിസ്സതി.

൧൭൬. (ക) യസ്സ വേദനാക്ഖന്ധോ ഉപ്പജ്ജിസ്സതി തസ്സ സഞ്ഞാക്ഖന്ധോ നിരുജ്ഝിസ്സതീതി? ആമന്താ.

(ഖ) യസ്സ വാ പന സഞ്ഞാക്ഖന്ധോ നിരുജ്ഝിസ്സതി തസ്സ വേദനാക്ഖന്ധോ ഉപ്പജ്ജിസ്സതീതി?

പച്ഛിമഭവികാനം ഉപപജ്ജന്താനം തേസം സഞ്ഞാക്ഖന്ധോ നിരുജ്ഝിസ്സതി, നോ ച തേസം വേദനാക്ഖന്ധോ ഉപ്പജ്ജിസ്സതി. ഇതരേസം തേസം സഞ്ഞാക്ഖന്ധോ ച നിരുജ്ഝിസ്സതി വേദനാക്ഖന്ധോ ച ഉപ്പജ്ജിസ്സതി.

(ഖ) അനുലോമഓകാസോ

൧൭൭. യത്ഥ രൂപക്ഖന്ധോ ഉപ്പജ്ജിസ്സതി…പേ….

(ഗ) അനുലോമപുഗ്ഗലോകാസാ

൧൭൮. (ക) യസ്സ യത്ഥ രൂപക്ഖന്ധോ ഉപ്പജ്ജിസ്സതി തസ്സ തത്ഥ വേദനാക്ഖന്ധോ നിരുജ്ഝിസ്സതീതി?

അസഞ്ഞസത്താനം തേസം തത്ഥ രൂപക്ഖന്ധോ ഉപ്പജ്ജിസ്സതി, നോ ച തേസം തത്ഥ വേദനാക്ഖന്ധോ നിരുജ്ഝിസ്സതി. പഞ്ചവോകാരാനം തേസം തത്ഥ രൂപക്ഖന്ധോ ച ഉപ്പജ്ജിസ്സതി വേദനാക്ഖന്ധോ ച നിരുജ്ഝിസ്സതി.

(ഖ) യസ്സ വാ പന യത്ഥ വേദനാക്ഖന്ധോ നിരുജ്ഝിസ്സതി തസ്സ തത്ഥ രൂപക്ഖന്ധോ ഉപ്പജ്ജിസ്സതീതി?

പച്ഛിമഭവികാനം പഞ്ചവോകാരം ഉപപജ്ജന്താനം അരൂപാനം തേസം തത്ഥ വേദനാക്ഖന്ധോ നിരുജ്ഝിസ്സതി, നോ ച തേസം തത്ഥ രൂപക്ഖന്ധോ ഉപ്പജ്ജിസ്സതി. ഇതരേസം പഞ്ചവോകാരാനം തേസം തത്ഥ വേദനാക്ഖന്ധോ ച നിരുജ്ഝിസ്സതി രൂപക്ഖന്ധോ ച ഉപ്പജ്ജിസ്സതി.

൧൭൯. (ക) യസ്സ യത്ഥ വേദനാക്ഖന്ധോ ഉപ്പജ്ജിസ്സതി തസ്സ തത്ഥ സഞ്ഞാക്ഖന്ധോ നിരുജ്ഝിസ്സതീതി? ആമന്താ.

(ഖ) യസ്സ വാ പന യത്ഥ സഞ്ഞാക്ഖന്ധോ നിരുജ്ഝിസ്സതി തസ്സ തത്ഥ വേദനാക്ഖന്ധോ ഉപ്പജ്ജിസ്സതീതി?

പച്ഛിമഭവികാനം ഉപപജ്ജന്താനം തേസം തത്ഥ സഞ്ഞാക്ഖന്ധോ നിരുജ്ഝിസ്സതി, നോ ച തേസം തത്ഥ വേദനാക്ഖന്ധോ ഉപ്പജ്ജിസ്സതി. ഇതരേസം ചതുവോകാരാനം പഞ്ചവോകാരാനം തേസം തത്ഥ സഞ്ഞാക്ഖന്ധോ ച നിരുജ്ഝിസ്സതി വേദനാക്ഖന്ധോ ച ഉപ്പജ്ജിസ്സതി.

(ഘ) പച്ചനീകപുഗ്ഗലോ

൧൮൦. (ക) യസ്സ രൂപക്ഖന്ധോ നുപ്പജ്ജിസ്സതി തസ്സ വേദനാക്ഖന്ധോ ന നിരുജ്ഝിസ്സതീതി?

പച്ഛിമഭവികാനം ഉപപജ്ജന്താനം യേ ച അരൂപം ഉപപജ്ജിത്വാ പരിനിബ്ബായിസ്സന്തി തേസം രൂപക്ഖന്ധോ നുപ്പജ്ജിസ്സതി, നോ ച തേസം വേദനാക്ഖന്ധോ ന നിരുജ്ഝിസ്സതി. പരിനിബ്ബന്താനം തേസം രൂപക്ഖന്ധോ ച നുപ്പജ്ജിസ്സതി വേദനാക്ഖന്ധോ ച ന നിരുജ്ഝിസ്സതി.

(ഖ) യസ്സ വാ പന വേദനാക്ഖന്ധോ ന നിരുജ്ഝിസ്സതി തസ്സ രൂപക്ഖന്ധോ നുപ്പജ്ജിസ്സതീതി? ആമന്താ.

൧൮൧. (ക) യസ്സ വേദനാക്ഖന്ധോ നുപ്പജ്ജിസ്സതി തസ്സ സഞ്ഞാക്ഖന്ധോ ന നിരുജ്ഝിസ്സതീതി?

പച്ഛിമഭവികാനം ഉപപജ്ജന്താനം തേസം വേദനാക്ഖന്ധോ നുപ്പജ്ജിസ്സതി, നോ ച തേസം സഞ്ഞാക്ഖന്ധോ ന നിരുജ്ഝിസ്സതി. പരിനിബ്ബന്താനം തേസം വേദനാക്ഖന്ധോ ച നുപ്പജ്ജിസ്സതി സഞ്ഞാക്ഖന്ധോ ച ന നിരുജ്ഝിസ്സതി.

(ഖ) യസ്സ വാ പന സഞ്ഞാക്ഖന്ധോ ന നിരുജ്ഝിസ്സതി തസ്സ വേദനാക്ഖന്ധോ നുപ്പജ്ജിസ്സതീതി? ആമന്താ.

(ങ) പച്ചനീകഓകാസോ

൧൮൨. യത്ഥ രൂപക്ഖന്ധോ നുപ്പജ്ജിസ്സതി…പേ….

(ച) പച്ചനീകപുഗ്ഗലോകാസാ

൧൮൩. (ക) യസ്സ യത്ഥ രൂപക്ഖന്ധോ നുപ്പജ്ജിസ്സതി തസ്സ തത്ഥ വേദനാക്ഖന്ധോ ന നിരുജ്ഝിസ്സതീതി?

പച്ഛിമഭവികാനം പഞ്ചവോകാരം ഉപപജ്ജന്താനം അരൂപാനം തേസം തത്ഥ രൂപക്ഖന്ധോ നുപ്പജ്ജിസ്സതി, നോ ച തേസം തത്ഥ വേദനാക്ഖന്ധോ ന നിരുജ്ഝിസ്സതി. പരിനിബ്ബന്താനം തേസം തത്ഥ രൂപക്ഖന്ധോ ച നുപ്പജ്ജിസ്സതി വേദനാക്ഖന്ധോ ച ന നിരുജ്ഝിസ്സതി.

(ഖ) യസ്സ വാ പന യത്ഥ വേദനാക്ഖന്ധോ ന നിരുജ്ഝിസ്സതി തസ്സ തത്ഥ രൂപക്ഖന്ധോ നുപ്പജ്ജിസ്സതീതി?

അസഞ്ഞസത്താനം തേസം തത്ഥ വേദനാക്ഖന്ധോ ന നിരുജ്ഝിസ്സതി, നോ ച തേസം തത്ഥ രൂപക്ഖന്ധോ നുപ്പജ്ജിസ്സതി. പരിനിബ്ബന്താനം തേസം തത്ഥ വേദനാക്ഖന്ധോ ച ന നിരുജ്ഝിസ്സതി രൂപക്ഖന്ധോ ച നുപ്പജ്ജിസ്സതി.

൧൮൪. (ക) യസ്സ യത്ഥ വേദനാക്ഖന്ധോ നുപ്പജ്ജിസ്സതി തസ്സ തത്ഥ സഞ്ഞാക്ഖന്ധോ ന നിരുജ്ഝിസ്സതീതി?

പച്ഛിമഭവികാനം ഉപപജ്ജന്താനം തേസം തത്ഥ വേദനാക്ഖന്ധോ നുപ്പജ്ജിസ്സതി, നോ ച തേസം തത്ഥ സഞ്ഞാക്ഖന്ധോ ന നിരുജ്ഝിസ്സതി. പരിനിബ്ബന്താനം അസഞ്ഞസത്താനം തേസം തത്ഥ വേദനാക്ഖന്ധോ ച നുപ്പജ്ജിസ്സതി സഞ്ഞാക്ഖന്ധോ ച ന നിരുജ്ഝിസ്സതി.

(ഖ) യസ്സ വാ പന യത്ഥ സഞ്ഞാക്ഖന്ധോ ന നിരുജ്ഝിസ്സതി തസ്സ തത്ഥ വേദനാക്ഖന്ധോ നുപ്പജ്ജിസ്സതീതി? ആമന്താ.