(൪) പച്ചുപ്പന്നാതീതവാരോ

(ക) അനുലോമപുഗ്ഗലോ

൧൨൨. (ക) യസ്സ രൂപക്ഖന്ധോ നിരുജ്ഝതി തസ്സ വേദനാക്ഖന്ധോ നിരുജ്ഝിത്ഥാതി? ആമന്താ.

(ഖ) യസ്സ വാ പന വേദനാക്ഖന്ധോ നിരുജ്ഝിത്ഥ തസ്സ രൂപക്ഖന്ധോ നിരുജ്ഝതീതി?

സബ്ബേസം ഉപപജ്ജന്താനം അരൂപാ ചവന്താനം തേസം വേദനാക്ഖന്ധോ നിരുജ്ഝിത്ഥ, നോ ച തേസം രൂപക്ഖന്ധോ നിരുജ്ഝതി. പഞ്ചവോകാരാ ചവന്താനം അസഞ്ഞസത്താ ചവന്താനം തേസം വേദനാക്ഖന്ധോ ച നിരുജ്ഝിത്ഥ രൂപക്ഖന്ധോ ച നിരുജ്ഝതി.

൧൨൩. (ക) യസ്സ വേദനാക്ഖന്ധോ നിരുജ്ഝതി തസ്സ സഞ്ഞാക്ഖന്ധോ നിരുജ്ഝിത്ഥാതി? ആമന്താ.

(ഖ) യസ്സ വാ പന സഞ്ഞാക്ഖന്ധോ നിരുജ്ഝിത്ഥ തസ്സ വേദനാക്ഖന്ധോ നിരുജ്ഝതീതി?

സബ്ബേസം ഉപപജ്ജന്താനം അസഞ്ഞസത്താ ചവന്താനം തേസം സഞ്ഞാക്ഖന്ധോ നിരുജ്ഝിത്ഥ, നോ ച തേസം വേദനാക്ഖന്ധോ നിരുജ്ഝതി. ചതുവോകാരാ പഞ്ചവോകാരാ ചവന്താനം തേസം സഞ്ഞാക്ഖന്ധോ ച നിരുജ്ഝിത്ഥ വേദനാക്ഖന്ധോ ച നിരുജ്ഝതി.

(ഖ) അനുലോമഓകാസോ

൧൨൪. (ക) യത്ഥ രൂപക്ഖന്ധോ നിരുജ്ഝതി തത്ഥ വേദനാക്ഖന്ധോ നിരുജ്ഝിത്ഥാതി?

അസഞ്ഞസത്തേ തത്ഥ രൂപക്ഖന്ധോ നിരുജ്ഝതി, നോ ച തത്ഥ വേദനാക്ഖന്ധോ നിരുജ്ഝിത്ഥ. പഞ്ചവോകാരേ തത്ഥ രൂപക്ഖന്ധോ ച നിരുജ്ഝതി വേദനാക്ഖന്ധോ ച നിരുജ്ഝിത്ഥ.

(ഖ) യത്ഥ വാ പന വേദനാക്ഖന്ധോ നിരുജ്ഝിത്ഥ തത്ഥ രൂപക്ഖന്ധോ നിരുജ്ഝതീതി?

അരൂപേ തത്ഥ വേദനാക്ഖന്ധോ നിരുജ്ഝിത്ഥ, നോ ച തത്ഥ രൂപക്ഖന്ധോ നിരുജ്ഝതി. പഞ്ചവോകാരേ തത്ഥ വേദനാക്ഖന്ധോ ച നിരുജ്ഝിത്ഥ രൂപക്ഖന്ധോ ച നിരുജ്ഝതി.

൧൨൫. (ക) യത്ഥ വേദനാക്ഖന്ധോ നിരുജ്ഝതി തത്ഥ സഞ്ഞാക്ഖന്ധോ നിരുജ്ഝിത്ഥാതി? ആമന്താ.

(ഖ) യത്ഥ വാ പന സഞ്ഞാക്ഖന്ധോ നിരുജ്ഝിത്ഥ തത്ഥ വേദനാക്ഖന്ധോ നിരുജ്ഝതീതി? ആമന്താ.

(ഗ) അനുലോമപുഗ്ഗലോകാസാ

൧൨൬. (ക) യസ്സ യത്ഥ രൂപക്ഖന്ധോ നിരുജ്ഝതി തസ്സ തത്ഥ വേദനാക്ഖന്ധോ നിരുജ്ഝിത്ഥാതി?

സുദ്ധാവാസേ പരിനിബ്ബന്താനം അസഞ്ഞസത്താ ചവന്താനം തേസം തത്ഥ രൂപക്ഖന്ധോ നിരുജ്ഝതി, നോ ച തേസം തത്ഥ വേദനാക്ഖന്ധോ നിരുജ്ഝിത്ഥ. ഇതരേസം പഞ്ചവോകാരാ ചവന്താനം തേസം തത്ഥ രൂപക്ഖന്ധോ ച നിരുജ്ഝതി വേദനാക്ഖന്ധോ ച നിരുജ്ഝിത്ഥ.

(ഖ) യസ്സ വാ പന യത്ഥ വേദനാക്ഖന്ധോ നിരുജ്ഝിത്ഥ തസ്സ തത്ഥ രൂപക്ഖന്ധോ നിരുജ്ഝതീതി?

പഞ്ചവോകാരം ഉപപജ്ജന്താനം അരൂപാനം തേസം തത്ഥ വേദനാക്ഖന്ധോ നിരുജ്ഝിത്ഥ, നോ ച തേസം തത്ഥ രൂപക്ഖന്ധോ നിരുജ്ഝതി. പഞ്ചവോകാരാ ചവന്താനം തേസം തത്ഥ വേദനാക്ഖന്ധോ ച നിരുജ്ഝിത്ഥ രൂപക്ഖന്ധോ ച നിരുജ്ഝതി.

൧൨൭. (ക) യസ്സ യത്ഥ വേദനാക്ഖന്ധോ നിരുജ്ഝതി തസ്സ തത്ഥ സഞ്ഞാക്ഖന്ധോ നിരുജ്ഝിത്ഥാതി?

സുദ്ധാവാസേ പരിനിബ്ബന്താനം തേസം തത്ഥ വേദനാക്ഖന്ധോ നിരുജ്ഝതി, നോ ച തേസം തത്ഥ സഞ്ഞാക്ഖന്ധോ നിരുജ്ഝിത്ഥ. ഇതരേസം ചതുവോകാരാ പഞ്ചവോകാരാ ചവന്താനം തേസം തത്ഥ വേദനാക്ഖന്ധോ ച നിരുജ്ഝതി സഞ്ഞാക്ഖന്ധോ ച നിരുജ്ഝിത്ഥ.

(ഖ) യസ്സ വാ പന യത്ഥ സഞ്ഞാക്ഖന്ധോ നിരുജ്ഝിത്ഥ തസ്സ തത്ഥ വേദനാക്ഖന്ധോ നിരുജ്ഝതീതി?

ചതുവോകാരം പഞ്ചവോകാരം ഉപപജ്ജന്താനം തേസം തത്ഥ സഞ്ഞാക്ഖന്ധോ നിരുജ്ഝിത്ഥ, നോ ച തേസം തത്ഥ വേദനാക്ഖന്ധോ നിരുജ്ഝതി. ചതുവോകാരാ പഞ്ചവോകാരാ ചവന്താനം തേസം തത്ഥ സഞ്ഞാക്ഖന്ധോ ച നിരുജ്ഝിത്ഥ വേദനാക്ഖന്ധോ ച നിരുജ്ഝതി.

(ഘ) പച്ചനീകപുഗ്ഗലോ

൧൨൮. (ക) യസ്സ രൂപക്ഖന്ധോ ന നിരുജ്ഝതി തസ്സ വേദനാക്ഖന്ധോ ന നിരുജ്ഝിത്ഥാതി? നിരുജ്ഝിത്ഥ.

(ഖ) യസ്സ വാ പന വേദനാക്ഖന്ധോ ന നിരുജ്ഝിത്ഥ തസ്സ രൂപക്ഖന്ധോ ന നിരുജ്ഝതീതി? നത്ഥി.

൧൨൯. (ക) യസ്സ വേദനാക്ഖന്ധോ ന നിരുജ്ഝതി തസ്സ സഞ്ഞാക്ഖന്ധോ ന നിരുജ്ഝിത്ഥാതി? നിരുജ്ഝിത്ഥ.

(ഖ) യസ്സ വാ പന സഞ്ഞാക്ഖന്ധോ ന നിരുജ്ഝിത്ഥ തസ്സ വേദനാക്ഖന്ധോ ന നിരുജ്ഝതീതി? നത്ഥി.

(ങ) പച്ചനീകഓകാസോ

൧൩൦. യത്ഥ രൂപക്ഖന്ധോ ന നിരുജ്ഝതി (യത്ഥകം പരിപുണ്ണം കാതബ്ബം).

(ച) പച്ചനീകപുഗ്ഗലോകാസാ

൧൩൧. (ക) യസ്സ യത്ഥ രൂപക്ഖന്ധോ ന നിരുജ്ഝതി തസ്സ തത്ഥ വേദനാക്ഖന്ധോ ന നിരുജ്ഝിത്ഥാതി?

പഞ്ചവോകാരം ഉപപജ്ജന്താനം അരൂപാനം തേസം തത്ഥ രൂപക്ഖന്ധോ ന നിരുജ്ഝതി, നോ ച തേസം തത്ഥ വേദനാക്ഖന്ധോ ന നിരുജ്ഝിത്ഥ. സുദ്ധാവാസം ഉപപജ്ജന്താനം അസഞ്ഞസത്തം ഉപപജ്ജന്താനം തേസം തത്ഥ രൂപക്ഖന്ധോ ച ന നിരുജ്ഝതി വേദനാക്ഖന്ധോ ച ന നിരുജ്ഝിത്ഥ.

(ഖ) യസ്സ വാ പന യത്ഥ വേദനാക്ഖന്ധോ ന നിരുജ്ഝിത്ഥ തസ്സ തത്ഥ രൂപക്ഖന്ധോ ന നിരുജ്ഝതീതി?

സുദ്ധാവാസേ പരിനിബ്ബന്താനം അസഞ്ഞസത്താ ചവന്താനം തേസം തത്ഥ വേദനാക്ഖന്ധോ ന നിരുജ്ഝിത്ഥ, നോ ച തേസം തത്ഥ രൂപക്ഖന്ധോ ന നിരുജ്ഝതി. സുദ്ധാവാസം ഉപപജ്ജന്താനം അസഞ്ഞസത്തം ഉപപജ്ജന്താനം തേസം തത്ഥ വേദനാക്ഖന്ധോ ച ന നിരുജ്ഝിത്ഥ രൂപക്ഖന്ധോ ച ന നിരുജ്ഝതി.

൧൩൨. (ക) യസ്സ യത്ഥ വേദനാക്ഖന്ധോ ന നിരുജ്ഝതി തസ്സ തത്ഥ സഞ്ഞാക്ഖന്ധോ ന നിരുജ്ഝിത്ഥാതി?

ചതുവോകാരം പഞ്ചവോകാരം ഉപപജ്ജന്താനം തേസം തത്ഥ വേദനാക്ഖന്ധോ ന നിരുജ്ഝതി, നോ ച തേസം തത്ഥ സഞ്ഞാക്ഖന്ധോ ന നിരുജ്ഝിത്ഥ. സുദ്ധാവാസം ഉപപജ്ജന്താനം അസഞ്ഞസത്താനം തേസം തത്ഥ വേദനാക്ഖന്ധോ ച ന നിരുജ്ഝതി സഞ്ഞാക്ഖന്ധോ ച ന നിരുജ്ഝിത്ഥ.

(ഖ) യസ്സ വാ പന യത്ഥ സഞ്ഞാക്ഖന്ധോ ന നിരുജ്ഝിത്ഥ തസ്സ തത്ഥ വേദനാക്ഖന്ധോ ന നിരുജ്ഝതീതി?

സുദ്ധാവാസേ പരിനിബ്ബന്താനം തേസം തത്ഥ സഞ്ഞാക്ഖന്ധോ ന നിരുജ്ഝിത്ഥ, നോ ച തേസം തത്ഥ വേദനാക്ഖന്ധോ ന നിരുജ്ഝതി. സുദ്ധാവാസം ഉപപജ്ജന്താനം അസഞ്ഞസത്താനം തേസം തത്ഥ സഞ്ഞാക്ഖന്ധോ ച ന നിരുജ്ഝിത്ഥ വേദനാക്ഖന്ധോ ച ന നിരുജ്ഝതി.