(൫) പച്ചുപ്പന്നാനാഗതവാരോ

(ക) അനുലോമപുഗ്ഗലോ

൮൦. (ക) യസ്സ രൂപക്ഖന്ധോ ഉപ്പജ്ജതി തസ്സ വേദനാക്ഖന്ധോ ഉപ്പജ്ജിസ്സതീതി?

പച്ഛിമഭവികാനം പഞ്ചവോകാരം ഉപപജ്ജന്താനം തേസം രൂപക്ഖന്ധോ ഉപ്പജ്ജതി, നോ ച തേസം വേദനാക്ഖന്ധോ ഉപ്പജ്ജിസ്സതി. ഇതരേസം പഞ്ചവോകാരം ഉപപജ്ജന്താനം അസഞ്ഞസത്തം ഉപപജ്ജന്താനം തേസം രൂപക്ഖന്ധോ ച ഉപ്പജ്ജതി വേദനാക്ഖന്ധോ ച ഉപ്പജ്ജിസ്സതി.

(ഖ) യസ്സ വാ പന വേദനാക്ഖന്ധോ ഉപ്പജ്ജിസ്സതി തസ്സ രൂപക്ഖന്ധോ ഉപ്പജ്ജതീതി?

സബ്ബേസം ചവന്താനം അരൂപം ഉപപജ്ജന്താനം തേസം വേദനാക്ഖന്ധോ ഉപ്പജ്ജിസ്സതി, നോ ച തേസം രൂപക്ഖന്ധോ ഉപ്പജ്ജതി. പഞ്ചവോകാരം ഉപപജ്ജന്താനം അസഞ്ഞസത്തം ഉപപജ്ജന്താനം തേസം വേദനാക്ഖന്ധോ ച ഉപ്പജ്ജിസ്സതി രൂപക്ഖന്ധോ ച ഉപ്പജ്ജതി.

൮൧. (ക) യസ്സ വേദനാക്ഖന്ധോ ഉപ്പജ്ജതി തസ്സ സഞ്ഞാക്ഖന്ധോ ഉപ്പജ്ജിസ്സതീതി?

പച്ഛിമഭവികാനം ഉപപജ്ജന്താനം തേസം വേദനാക്ഖന്ധോ ഉപ്പജ്ജതി, നോ ച തേസം സഞ്ഞാക്ഖന്ധോ ഉപ്പജ്ജിസ്സതി. ഇതരേസം ചതുവോകാരം പഞ്ചവോകാരം ഉപപജ്ജന്താനം തേസം വേദനാക്ഖന്ധോ ച ഉപ്പജ്ജതി സഞ്ഞാക്ഖന്ധോ ച ഉപ്പജ്ജിസ്സതി.

(ഖ) യസ്സ വാ പന സഞ്ഞാക്ഖന്ധോ ഉപ്പജ്ജിസ്സതി തസ്സ വേദനാക്ഖന്ധോ ഉപ്പജ്ജതീതി?

സബ്ബേസം ചവന്താനം അസഞ്ഞസത്തം ഉപപജ്ജന്താനം തേസം സഞ്ഞാക്ഖന്ധോ ഉപ്പജ്ജിസ്സതി, നോ ച തേസം വേദനാക്ഖന്ധോ ഉപ്പജ്ജതി. ചതുവോകാരം പഞ്ചവോകാരം ഉപപജ്ജന്താനം തേസം സഞ്ഞാക്ഖന്ധോ ച ഉപ്പജ്ജിസ്സതി വേദനാക്ഖന്ധോ ച ഉപ്പജ്ജതി.

(ഖ) അനുലോമഓകാസോ

൮൨. (ക) യത്ഥ രൂപക്ഖന്ധോ ഉപ്പജ്ജതി തത്ഥ വേദനാക്ഖന്ധോ ഉപ്പജ്ജിസ്സതീതി?

അസഞ്ഞസത്തേ തത്ഥ രൂപക്ഖന്ധോ ഉപ്പജ്ജതി, നോ ച തത്ഥ വേദനാക്ഖന്ധോ ഉപ്പജ്ജിസ്സതി. പഞ്ചവോകാരേ തത്ഥ രൂപക്ഖന്ധോ ച ഉപ്പജ്ജതി വേദനാക്ഖന്ധോ ച ഉപ്പജ്ജിസ്സതി.

(ഖ) യത്ഥ വാ പന വേദനാക്ഖന്ധോ ഉപ്പജ്ജിസ്സതി തത്ഥ രൂപക്ഖന്ധോ ഉപ്പജ്ജതീതി?

അരൂപേ തത്ഥ വേദനാക്ഖന്ധോ ഉപ്പജ്ജിസ്സതി, നോ ച തത്ഥ രൂപക്ഖന്ധോ ഉപ്പജ്ജതി. പഞ്ചവോകാരേ തത്ഥ വേദനാക്ഖന്ധോ ച ഉപ്പജ്ജിസ്സതി രൂപക്ഖന്ധോ ച ഉപ്പജ്ജതി.

൮൩. (ക) യത്ഥ വേദനാക്ഖന്ധോ ഉപ്പജ്ജതി തത്ഥ സഞ്ഞാക്ഖന്ധോ ഉപ്പജ്ജിസ്സതീതി? ആമന്താ.

(ഖ) യത്ഥ വാ പന സഞ്ഞാക്ഖന്ധോ ഉപ്പജ്ജിസ്സതി തത്ഥ വേദനാക്ഖന്ധോ ഉപ്പജ്ജതീതി? ആമന്താ.

(ഗ) അനുലോമപുഗ്ഗലോകാസാ

൮൪. (ക) യസ്സ യത്ഥ രൂപക്ഖന്ധോ ഉപ്പജ്ജതി തസ്സ തത്ഥ വേദനാക്ഖന്ധോ ഉപ്പജ്ജിസ്സതീതി?

പച്ഛിമഭവികാനം പഞ്ചവോകാരം ഉപപജ്ജന്താനം അസഞ്ഞസത്തം ഉപപജ്ജന്താനം തേസം തത്ഥ രൂപക്ഖന്ധോ ഉപ്പജ്ജതി, നോ ച തേസം തത്ഥ വേദനാക്ഖന്ധോ ഉപ്പജ്ജിസ്സതി. ഇതരേസം പഞ്ചവോകാരം ഉപപജ്ജന്താനം തേസം തത്ഥ രൂപക്ഖന്ധോ ച ഉപ്പജ്ജതി വേദനാക്ഖന്ധോ ച ഉപ്പജ്ജിസ്സതി.

(ഖ) യസ്സ വാ പന യത്ഥ വേദനാക്ഖന്ധോ ഉപ്പജ്ജിസ്സതി തസ്സ തത്ഥ രൂപക്ഖന്ധോ ഉപ്പജ്ജതീതി?

പഞ്ചവോകാരാ ചവന്താനം അരൂപാനം തേസം തത്ഥ വേദനാക്ഖന്ധോ ഉപ്പജ്ജിസ്സതി, നോ ച തേസം തത്ഥ രൂപക്ഖന്ധോ ഉപ്പജ്ജതി. പഞ്ചവോകാരം ഉപപജ്ജന്താനം തേസം തത്ഥ വേദനാക്ഖന്ധോ ച ഉപ്പജ്ജിസ്സതി രൂപക്ഖന്ധോ ച ഉപ്പജ്ജതി.

൮൫. (ക) യസ്സ യത്ഥ വേദനാക്ഖന്ധോ ഉപ്പജ്ജതി തസ്സ തത്ഥ സഞ്ഞാക്ഖന്ധോ ഉപ്പജ്ജിസ്സതീതി?

പച്ഛിമഭവികാനം ഉപപജ്ജന്താനം തേസം തത്ഥ വേദനാക്ഖന്ധോ ഉപ്പജ്ജതി, നോ ച തേസം തത്ഥ സഞ്ഞാക്ഖന്ധോ ഉപ്പജ്ജിസ്സതി. ഇതരേസം ചതുവോകാരം പഞ്ചവോകാരം ഉപപജ്ജന്താനം തേസം തത്ഥ വേദനാക്ഖന്ധോ ച ഉപ്പജ്ജതി സഞ്ഞാക്ഖന്ധോ ച ഉപ്പജ്ജിസ്സതി.

(ഖ) യസ്സ വാ പന യത്ഥ സഞ്ഞാക്ഖന്ധോ ഉപ്പജ്ജിസ്സതി തസ്സ തത്ഥ വേദനാക്ഖന്ധോ ഉപ്പജ്ജതീതി?

ചതുവോകാരാ പഞ്ചവോകാരാ ചവന്താനം തേസം തത്ഥ സഞ്ഞാക്ഖന്ധോ ഉപ്പജ്ജിസ്സതി, നോ ച തേസം തത്ഥ വേദനാക്ഖന്ധോ ഉപ്പജ്ജതി. ചതുവോകാരം പഞ്ചവോകാരം ഉപപജ്ജന്താനം തേസം തത്ഥ സഞ്ഞാക്ഖന്ധോ ച ഉപ്പജ്ജിസ്സതി വേദനാക്ഖന്ധോ ച ഉപ്പജ്ജതി.

(ഘ) പച്ചനീകപുഗ്ഗലോ

൮൬. (ക) യസ്സ രൂപക്ഖന്ധോ നുപ്പജ്ജതി തസ്സ വേദനാക്ഖന്ധോ നുപ്പജ്ജിസ്സതീതി?

സബ്ബേസം ചവന്താനം അരൂപം ഉപപജ്ജന്താനം തേസം രൂപക്ഖന്ധോ നുപ്പജ്ജതി, നോ ച തേസം വേദനാക്ഖന്ധോ നുപ്പജ്ജിസ്സതി. പഞ്ചവോകാരേ പരിനിബ്ബന്താനം അരൂപേ പച്ഛിമഭവികാനം തേസം രൂപക്ഖന്ധോ ച നുപ്പജ്ജതി വേദനാക്ഖന്ധോ ച നുപ്പജ്ജിസ്സതി.

(ഖ) യസ്സ വാ പന വേദനാക്ഖന്ധോ നുപ്പജ്ജിസ്സതി തസ്സ രൂപക്ഖന്ധോ നുപ്പജ്ജതീതി?

പച്ഛിമഭവികാനം പഞ്ചവോകാരം ഉപപജ്ജന്താനം തേസം വേദനാക്ഖന്ധോ നുപ്പജ്ജിസ്സതി, നോ ച തേസം രൂപക്ഖന്ധോ നുപ്പജ്ജതി. പഞ്ചവോകാരേ പരിനിബ്ബന്താനം അരൂപേ പച്ഛിമഭവികാനം തേസം വേദനാക്ഖന്ധോ ച നുപ്പജ്ജിസ്സതി രൂപക്ഖന്ധോ ച നുപ്പജ്ജതി.

൮൭. (ക) യസ്സ വേദനാക്ഖന്ധോ നുപ്പജ്ജതി തസ്സ സഞ്ഞാക്ഖന്ധോ നുപ്പജ്ജിസ്സതീതി?

സബ്ബേസം ചവന്താനം അസഞ്ഞസത്തം ഉപപജ്ജന്താനം തേസം വേദനാക്ഖന്ധോ നുപ്പജ്ജതി, നോ ച തേസം സഞ്ഞാക്ഖന്ധോ നുപ്പജ്ജിസ്സതി. പരിനിബ്ബന്താനം തേസം വേദനാക്ഖന്ധോ ച നുപ്പജ്ജതി സഞ്ഞാക്ഖന്ധോ ച നുപ്പജ്ജിസ്സതി.

(ഖ) യസ്സ വാ പന സഞ്ഞാക്ഖന്ധോ നുപ്പജ്ജിസ്സതി തസ്സ വേദനാക്ഖന്ധോ നുപ്പജ്ജതീതി?

പച്ഛിമഭവികാനം ഉപപജ്ജന്താനം [പച്ഛിമഭവികാനം പഞ്ചവോകാരം ഉപപജ്ജന്താനം (സീ. സ്യാ.)] തേസം സഞ്ഞാക്ഖന്ധോ നുപ്പജ്ജിസ്സതി, നോ ച തേസം വേദനാക്ഖന്ധോ നുപ്പജ്ജതി. പരിനിബ്ബന്താനം തേസം സഞ്ഞാക്ഖന്ധോ ച നുപ്പജ്ജിസ്സതി വേദനാക്ഖന്ധോ ച നുപ്പജ്ജതി.

(ങ) പച്ചനീകഓകാസോ

൮൮. (ക) യത്ഥ രൂപക്ഖന്ധോ നുപ്പജ്ജതി തത്ഥ വേദനാക്ഖന്ധോ നുപ്പജ്ജിസ്സതീതി? ഉപ്പജ്ജിസ്സതി.

(ഖ) യത്ഥ വാ പന വേദനാക്ഖന്ധോ നുപ്പജ്ജിസ്സതി തത്ഥ രൂപക്ഖന്ധോ നുപ്പജ്ജതീതി? ഉപ്പജ്ജതി.

൮൯. (ക) യത്ഥ വേദനാക്ഖന്ധോ നുപ്പജ്ജതി തത്ഥ സഞ്ഞാക്ഖന്ധോ നുപ്പജ്ജിസ്സതീതി? ആമന്താ.

(ഖ) യത്ഥ വാ പന സഞ്ഞാക്ഖന്ധോ നുപ്പജ്ജിസ്സതി തത്ഥ വേദനാക്ഖന്ധോ നുപ്പജ്ജതീതി? ആമന്താ.

(ച) പച്ചനീകപുഗ്ഗലോകാസാ

൯൦. (ക) യസ്സ യത്ഥ രൂപക്ഖന്ധോ നുപ്പജ്ജതി തസ്സ തത്ഥ വേദനാക്ഖന്ധോ നുപ്പജ്ജിസ്സതീതി?

പഞ്ചവോകാരാ ചവന്താനം അരൂപാനം തേസം തത്ഥ രൂപക്ഖന്ധോ നുപ്പജ്ജതി, നോ ച തേസം തത്ഥ വേദനാക്ഖന്ധോ നുപ്പജ്ജിസ്സതി. പഞ്ചവോകാരേ പരിനിബ്ബന്താനം അരൂപേ പച്ഛിമഭവികാനം അസഞ്ഞസത്താ ചവന്താനം തേസം തത്ഥ രൂപക്ഖന്ധോ ച നുപ്പജ്ജതി വേദനാക്ഖന്ധോ ച നുപ്പജ്ജിസ്സതി.

(ഖ) യസ്സ വാ പന യത്ഥ വേദനാക്ഖന്ധോ നുപ്പജ്ജിസ്സതി തസ്സ തത്ഥ രൂപക്ഖന്ധോ നുപ്പജ്ജതീതി?

പച്ഛിമഭവികാനം പഞ്ചവോകാരം ഉപപജ്ജന്താനം അസഞ്ഞസത്തം ഉപപജ്ജന്താനം തേസം തത്ഥ വേദനാക്ഖന്ധോ നുപ്പജ്ജിസ്സതി, നോ ച തേസം തത്ഥ രൂപക്ഖന്ധോ നുപ്പജ്ജതി. പഞ്ചവോകാരേ പരിനിബ്ബന്താനം അരൂപേ പച്ഛിമഭവികാനം അസഞ്ഞസത്താ ചവന്താനം തേസം തത്ഥ വേദനാക്ഖന്ധോ ച നുപ്പജ്ജിസ്സതി രൂപക്ഖന്ധോ ച നുപ്പജ്ജതി.

൯൧. (ക) യസ്സ യത്ഥ വേദനാക്ഖന്ധോ നുപ്പജ്ജതി തസ്സ തത്ഥ സഞ്ഞാക്ഖന്ധോ നുപ്പജ്ജിസ്സതീതി?

ചതുവോകാരാ പഞ്ചവോകാരാ ചവന്താനം തേസം തത്ഥ വേദനാക്ഖന്ധോ നുപ്പജ്ജതി, നോ ച തേസം തത്ഥ സഞ്ഞാക്ഖന്ധോ നുപ്പജ്ജിസ്സതി. പരിനിബ്ബന്താനം അസഞ്ഞസത്താനം തേസം തത്ഥ വേദനാക്ഖന്ധോ ച നുപ്പജ്ജതി സഞ്ഞാക്ഖന്ധോ ച നുപ്പജ്ജിസ്സതി.

(ഖ) യസ്സ വാ പന യത്ഥ സഞ്ഞാക്ഖന്ധോ നുപ്പജ്ജിസ്സതി തസ്സ തത്ഥ വേദനാക്ഖന്ധോ നുപ്പജ്ജതീതി?

പച്ഛിമഭവികാനം ഉപപജ്ജന്താനം തേസം തത്ഥ സഞ്ഞാക്ഖന്ധോ നുപ്പജ്ജിസ്സതി, നോ ച തേസം തത്ഥ വേദനാക്ഖന്ധോ നുപ്പജ്ജതി. പരിനിബ്ബന്താനം അസഞ്ഞസത്താനം തേസം തത്ഥ സഞ്ഞാക്ഖന്ധോ ച നുപ്പജ്ജിസ്സതി വേദനാക്ഖന്ധോ ച നുപ്പജ്ജതി.