(൨) മൂലമൂലനയോ

൮൯. (ക) യേ കേചി നാമാ ധമ്മാ, സബ്ബേ തേ നാമമൂലമൂലാതി?

നവേവ നാമമൂലമൂലാനി. അവസേസാ നാമാ ധമ്മാ ന നാമമൂലമൂലാ.

(ഖ) യേ വാ പന നാമമൂലമൂലാ, സബ്ബേ തേ ധമ്മാ നാമാതി? ആമന്താ.

൯൦. (ക) യേ കേചി നാമാ ധമ്മാ, സബ്ബേ തേ നാമമൂലേന ഏകമൂലമൂലാതി?

അഹേതുകം നാമം നാമമൂലേന ന ഏകമൂലമൂലം. സഹേതുകം നാമം നാമമൂലേന ഏകമൂലമൂലം.

(ഖ) യേ വാ പന നാമമൂലേന ഏകമൂലമൂലാ, സബ്ബേ തേ ധമ്മാ നാമാതി?

നാമസമുട്ഠാനം രൂപം നാമമൂലേന ഏകമൂലമൂലം, ന നാമം. നാമം നാമമൂലേന ഏകമൂലമൂലഞ്ചേവ നാമഞ്ച.

൯൧. (ക) യേ കേചി നാമമൂലേന ഏകമൂലമൂലാ ധമ്മാ, സബ്ബേ തേ നാമമൂലേന അഞ്ഞമഞ്ഞമൂലമൂലാതി?

മൂലാനി യാനി ഏകതോ ഉപ്പജ്ജന്തി നാമമൂലാനി ഏകമൂലമൂലാനി ചേവ അഞ്ഞമഞ്ഞമൂലമൂലാനി ച. അവസേസാ നാമമൂലസഹജാതാ ധമ്മാ നാമമൂലേന ഏകമൂലമൂലാ, ന ച അഞ്ഞമഞ്ഞമൂലമൂലാ.

(ഖ) യേ വാ പന നാമമൂലേന അഞ്ഞമഞ്ഞമൂലമൂലാ, സബ്ബേ തേ ധമ്മാ നാമാതി? ആമന്താ.