൧൦. ദസകനിദ്ദേസോ

(൧) ദസ കിലേസവത്ഥൂനി

൯൬൬. തത്ഥ കതമാനി ദസ കിലേസവത്ഥൂനി? ലോഭോ, ദോസോ, മോഹോ, മാനോ, ദിട്ഠി, വിചികിച്ഛാ, ഥിനം, ഉദ്ധച്ചം, അഹിരികം, അനോത്തപ്പം – ഇമാനി ദസ കിലേസവത്ഥൂനി.

(൨) ദസ ആഘാതവത്ഥൂനി

൯൬൭. തത്ഥ കതമാനി ദസ ആഘാതവത്ഥൂനി? ‘‘അനത്ഥം മേ അചരീ’’തി ആഘാതോ ജായതി, ‘‘അനത്ഥം മേ ചരതീ’’തി ആഘാതോ ജായതി, ‘‘അനത്ഥം മേ ചരിസ്സതീ’’തി ആഘാതോ ജായതി, ‘‘പിയസ്സ മേ മനാപസ്സ അനത്ഥം അചരി’’…പേ… അനത്ഥം ചരതി…പേ… അനത്ഥം ചരിസ്സതീതി ആഘാതോ ജായതി, അപ്പിയസ്സ മേ അമനാപസ്സ അത്ഥം അചരി…പേ… അത്ഥം ചരതി…പേ… അത്ഥം ചരിസ്സതീതി ആഘാതോ ജായതി, അട്ഠാനേ വാ പന ആഘാതോ ജായതി – ഇമാനി ദസ ആഘാതവത്ഥൂനി.

(൩) ദസ അകുസലകമ്മപഥാ

൯൬൮. തത്ഥ കതമേ ദസ അകുസലകമ്മപഥാ? പാണാതിപാതോ, അദിന്നാദാനം, കാമേസുമിച്ഛാചാരോ, മുസാവാദോ, പിസുണാ വാചാ, ഫരുസാ വാചാ, സമ്ഫപ്പലാപോ, അഭിജ്ഝാ, ബ്യാപാദോ, മിച്ഛാദിട്ഠി – ഇമേ ദസ അകുസലകമ്മപഥാ.

(൪) ദസ സംയോജനാനി

൯൬൯. തത്ഥ കതമാനി ദസ സംയോജനാനി? കാമരാഗസംയോജനം, പടിഘസംയോജനം, മാനസംയോജനം, ദിട്ഠിസംയോജനം, വിചികിച്ഛാസംയോജനം, സീലബ്ബതപരാമാസസംയോജനം, ഭവരാഗസംയോജനം, ഇസ്സാസംയോജനം, മച്ഛരിയസംയോജനം, അവിജ്ജാസംയോജനം – ഇമാനി ദസ സംയോജനാനി.

(൫) ദസ മിച്ഛത്താ

൯൭൦. തത്ഥ കതമേ ദസ മിച്ഛത്താ? മിച്ഛാദിട്ഠി, മിച്ഛാസങ്കപ്പോ, മിച്ഛാവാചാ, മിച്ഛാകമ്മന്തോ, മിച്ഛാആജീവോ, മിച്ഛാവായാമോ, മിച്ഛാസതി, മിച്ഛാസമാധി, മിച്ഛാഞാണം, മിച്ഛാവിമുത്തി – ഇമേ ദസ മിച്ഛത്താ.

(൬) ദസവത്ഥുകാ മിച്ഛാദിട്ഠി

൯൭൧. തത്ഥ കതമാ ദസവത്ഥുകാ മിച്ഛാദിട്ഠി? നത്ഥി ദിന്നം, നത്ഥി യിട്ഠം, നത്ഥി ഹുതം, നത്ഥി സുകതദുക്കടാനം കമ്മാനം ഫലം വിപാകോ, നത്ഥി അയം ലോകോ, നത്ഥി പരോ ലോകോ, നത്ഥി മാതാ, നത്ഥി പിതാ, നത്ഥി സത്താ ഓപപാതികാ, നത്ഥി ലോകേ സമണബ്രാഹ്മണാ സമ്മഗ്ഗതാ [സമഗ്ഗതാ (ക.)] സമ്മാ പടിപന്നാ യേ ഇമഞ്ച ലോകം പരഞ്ച ലോകം സയം അഭിഞ്ഞാ സച്ഛികത്വാ പവേദേന്തീതി – അയം ദസവത്ഥുകാ മിച്ഛാദിട്ഠി.

(൭) ദസവത്ഥുകാ അന്തഗ്ഗാഹികാ ദിട്ഠി

൯൭൨. തത്ഥ കതമാ ദസവത്ഥുകാ അന്തഗ്ഗാഹികാ ദിട്ഠി? സസ്സതോ ലോകോതി വാ, അസസ്സതോ ലോകോതി വാ, അന്തവാ ലോകോതി വാ, അനന്തവാ ലോകോതി വാ, തം ജീവം തം സരീരന്തി വാ, അഞ്ഞം ജീവം അഞ്ഞം സരീരന്തി വാ, ഹോതി തഥാഗതോ പരം മരണാതി വാ, ന ഹോതി തഥാഗതോ പരം മരണാതി വാ, ഹോതി ച ന ച ഹോതി തഥാഗതോ പരം മരണാതി വാ, നേവ ഹോതി ന ന ഹോതി തഥാഗതോ പരം മരണാതി വാ – അയം ദസവത്ഥുകാ അന്തഗ്ഗാഹികാ ദിട്ഠി.

ദസകം.