൫. പഞ്ചകനിദ്ദേസോ

൮൦൪. (൧) തത്ഥ കതമോ പഞ്ചങ്ഗികോ സമ്മാസമാധി? പീതിഫരണതാ, സുഖഫരണതാ, ചേതോഫരണതാ, ആലോകഫരണതാ, പച്ചവേക്ഖണാനിമിത്തം. ദ്വീസു ഝാനേസു പഞ്ഞാ പീതിഫരണതാ. തീസു ഝാനേസു പഞ്ഞാ സുഖഫരണതാ. പരചിത്തേ ഞാണം ചേതോഫരണതാ. ദിബ്ബചക്ഖു ആലോകഫരണതാ. തമ്ഹാ തമ്ഹാ സമാധിമ്ഹാ വുട്ഠിതസ്സ പച്ചവേക്ഖണാഞാണം പച്ചവേക്ഖണാനിമിത്തം. അയം വുച്ചതി പഞ്ചങ്ഗികോ സമ്മാസമാധി.

(൨) തത്ഥ കതമോ പഞ്ചഞാണികോ സമ്മാസമാധി? ‘‘അയം സമാധി പച്ചുപ്പന്നസുഖോ ചേവ ആയതിഞ്ച സുഖവിപാകോ’’തി പച്ചത്തഞ്ഞേവ ഞാണം ഉപ്പജ്ജതി. ‘‘അയം സമാധി അരിയോ നിരാമിസോ’’തി പച്ചത്തഞ്ഞേവ ഞാണം ഉപ്പജ്ജതി. ‘‘അയം സമാധി അകാപുരിസസേവിതോ’’തി പച്ചത്തഞ്ഞേവ ഞാണം ഉപ്പജ്ജതി. ‘‘അയം സമാധി സന്തോ പണീതോ പടിപ്പസ്സദ്ധലദ്ധോ ഏകോദിഭാവാധിഗതോ ന സസങ്ഖാരനിഗ്ഗയ്ഹവാരിതഗതോ’’തി പച്ചത്തഞ്ഞേവ ഞാണം ഉപ്പജ്ജതി. സോ ഖോ പനാഹം ഇമം സമാധിം സതോ സമാപജ്ജാമി സതോ വുട്ഠഹാമീ’’തി പച്ചത്തഞ്ഞേവ ഞാണം ഉപ്പജ്ജതി. അയം പഞ്ചഞാണികോ സമ്മാസമാധി. ഏവം പഞ്ചവിധേന ഞാണവത്ഥു.

പഞ്ചകം.