൫. പഞ്ചകഉദ്ദേസോ

൧൧. പഞ്ച പുഗ്ഗലാ –

(൧) അത്ഥേകച്ചോ പുഗ്ഗലോ ആരഭതി [ആരമ്ഭതി (സീ. സ്യാ.)] ച വിപ്പടിസാരീ ച ഹോതി, തഞ്ച ചേതോവിമുത്തിം പഞ്ഞാവിമുത്തിം യഥാഭൂതം നപ്പജാനാതി, യത്ഥസ്സ തേ ഉപ്പന്നാ പാപകാ അകുസലാ ധമ്മാ അപരിസേസാ നിരുജ്ഝന്തി. അത്ഥേകച്ചോ പുഗ്ഗലോ ആരഭതി ന വിപ്പടിസാരീ ച ഹോതി, തഞ്ച ചേതോവിമുത്തിം പഞ്ഞാവിമുത്തിം യഥാഭൂതം നപ്പജാനാതി, യത്ഥസ്സ തേ ഉപ്പന്നാ പാപകാ അകുസലാ ധമ്മാ അപരിസേസാ നിരുജ്ഝന്തി. അത്ഥേകച്ചോ പുഗ്ഗലോ നാരഭതി വിപ്പടിസാരീ ച ഹോതി, തഞ്ച ചേതോവിമുത്തിം പഞ്ഞാവിമുത്തിം യഥാഭൂതം നപ്പജാനാതി, യത്ഥസ്സ തേ ഉപ്പന്നാ പാപകാ അകുസലാ ധമ്മാ അപരിസേസാ നിരുജ്ഝന്തി. അത്ഥേകച്ചോ പുഗ്ഗലോ നാരഭതി ന വിപ്പടിസാരീ ഹോതി, തഞ്ച ചേതോവിമുത്തിം പഞ്ഞാവിമുത്തിം യഥാഭൂതം നപ്പജാനാതി, യത്ഥസ്സ തേ ഉപ്പന്നാ പാപകാ അകുസലാ ധമ്മാ അപരിസേസാ നിരുജ്ഝന്തി. അത്ഥേകച്ചോ പുഗ്ഗലോ നാരഭതി ന വിപ്പടിസാരീ ഹോതി, തഞ്ച ചേതോവിമുത്തിം പഞ്ഞാവിമുത്തിം യഥാഭൂതം പജാനാതി, യത്ഥസ്സ തേ ഉപ്പന്നാ പാപകാ അകുസലാ ധമ്മാ അപരിസേസാ നിരുജ്ഝന്തി.

(൨) ദത്വാ അവജാനാതി, സംവാസേന അവജാനാതി, ആധേയ്യമുഖോ ഹോതി, ലോലോ ഹോതി, മന്ദോ മോമൂഹോ ഹോതി.

(൩) പഞ്ച യോധാജീവൂപമാ പുഗ്ഗലാ.

(൪) പഞ്ച പിണ്ഡപാതികാ.

(൫) പഞ്ച ഖലുപച്ഛാഭത്തികാ.

(൬) പഞ്ച ഏകാസനികാ.

(൭) പഞ്ച പംസുകൂലികാ.

(൮) പഞ്ച തേചീവരികാ.

(൯) പഞ്ച ആരഞ്ഞികാ.

(൧൦) പഞ്ച രുക്ഖമൂലികാ.

(൧൧) പഞ്ച അബ്ഭോകാസികാ.

(൧൨) പഞ്ച നേസജ്ജികാ.

(൧൩) പഞ്ച യഥാസന്ഥതികാ.

(൧൪) പഞ്ച സോസാനികാ.

പഞ്ചകം.