൪-൫-൧. ഹേതുസഹേതുകദുകാദി-കുസലത്തികം

൩൬. നഹേതുഞ്ചേവ നഅഹേതുകഞ്ച നകുസലം ധമ്മം പടിച്ച നഹേതു ചേവ നഅഹേതുകോ ച നകുസലോ ധമ്മോ ഉപ്പജ്ജതി ഹേതുപച്ചയാ. നഹേതുഞ്ചേവ നഅഹേതുകഞ്ച നകുസലം ധമ്മം പടിച്ച നഅഹേതുകോ ചേവ നന ച ഹേതു നകുസലോ ധമ്മോ ഉപ്പജ്ജതി ഹേതുപച്ചയാ. നഹേതുഞ്ചേവ നഅഹേതുകഞ്ച നകുസലം ധമ്മം പടിച്ച നഹേതു ചേവ നഅഹേതുകോ ച നകുസലോ ച നഅഹേതുകോ ചേവ നന ച ഹേതു നകുസലോ ച ധമ്മാ ഉപ്പജ്ജന്തി ഹേതുപച്ചയാ. (൩)

നഅഹേതുകഞ്ചേവ നന ച ഹേതും നകുസലം ധമ്മം പടിച്ച നഅഹേതുകോ ചേവ നന ച ഹേതു നകുസലോ ധമ്മോ ഉപ്പജ്ജതി ഹേതുപച്ചയാ… തീണി.

നഹേതുഞ്ചേവ നഅഹേതുകഞ്ച നകുസലഞ്ച നഅഹേതുകഞ്ചേവ നന ച ഹേതും നകുസലഞ്ച ധമ്മം പടിച്ച നഹേതു ചേവ നഅഹേതുകോ ച നകുസലോ ധമ്മോ ഉപ്പജ്ജതി ഹേതുപച്ചയാ… തീണി. (സംഖിത്തം.)

ഹേതുയാ നവ.

൩൭. നഹേതുഞ്ചേവ നഅഹേതുകഞ്ച നഅകുസലം ധമ്മം പടിച്ച നഹേതു ചേവ നഅഹേതുകോ ച നഅകുസലോ ധമ്മോ ഉപ്പജ്ജതി ഹേതുപച്ചയാ. (സംഖിത്തം.)

ഹേതുയാ നവ.

൩൮. നഹേതുഞ്ചേവ നഅഹേതുകഞ്ച നഅബ്യാകതം ധമ്മം പടിച്ച നഹേതു ചേവ നഅഹേതുകോ ച നഅബ്യാകതോ ധമ്മോ ഉപ്പജ്ജതി ഹേതുപച്ചയാ. (സംഖിത്തം.)

ഹേതുയാ നവ.

(ഹേതുഹേതുസമ്പയുത്തദുകം ഹേതുസഹേതുകദുകസദിസം.)