൧-൧൩-൧൮. ഹേതുദുക-ആസവഗോച്ഛകാനി

൧൪. നഹേതും നോആസവം ധമ്മം പടിച്ച ഹേതു ആസവോ ധമ്മോ ഉപ്പജ്ജതി ഹേതുപച്ചയാ. നഹേതും നോആസവം ധമ്മം പടിച്ച നഹേതു ആസവോ ധമ്മോ ഉപ്പജ്ജതി ഹേതുപച്ചയാ. നഹേതും നോആസവം ധമ്മം പടിച്ച ഹേതു ആസവോ ച നഹേതു ആസവോ ച ധമ്മാ ഉപ്പജ്ജന്തി ഹേതുപച്ചയാ. തീണി.

നനഹേതും നോആസവം ധമ്മം പടിച്ച ഹേതു ആസവോ ധമ്മോ ഉപ്പജ്ജതി ഹേതുപച്ചയാ. ഏകം.

നഹേതും നോആസവഞ്ച നനഹേതും നോആസവഞ്ച ധമ്മം പടിച്ച ഹേതു ആസവോ ധമ്മോ ഉപ്പജ്ജതി ഹേതുപച്ചയാ. ഏകം. ഹേതുയാ പഞ്ച.

നഹേതും നനോആസവം ധമ്മം പടിച്ച നഹേതു നോആസവോ ധമ്മോ ഉപ്പജ്ജതി ഹേതുപച്ചയാ. ഏകം.

നനഹേതും നനോആസവം ധമ്മം പടിച്ച നഹേതു നോആസവോ ധമ്മോ ഉപ്പജ്ജതി ഹേതുപച്ചയാ. നനഹേതും നനോആസവം ധമ്മം പടിച്ച ഹേതു നോആസവോ ധമ്മോ ഉപ്പജ്ജതി ഹേതുപച്ചയാ. നനഹേതും നനോആസവം ധമ്മം പടിച്ച ഹേതു നോആസവോ ച നഹേതു നോആസവോ ച ധമ്മാ ഉപ്പജ്ജന്തി ഹേതുപച്ചയാ തീണി.

നഹേതും നനോആസവഞ്ച നനഹേതും നനോആസവഞ്ച ധമ്മം പടിച്ച നഹേതു നോആസവോ ധമ്മോ ഉപ്പജ്ജതി ഹേതുപച്ചയാ. ഏകം. ഹേതുയാ പഞ്ച.

൧൫. നഹേതും നസാസവം ധമ്മം പടിച്ച നഹേതു സാസവോ ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.

നഹേതും നഅനാസവം ധമ്മം പച്ചയാ ഹേതു അനാസവോ ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.

൧൬. നനഹേതും നആസവസമ്പയുത്തം ധമ്മം പടിച്ച നഹേതു ആസവസമ്പയുത്തോ ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.

നഹേതും നആസവവിപ്പയുത്തം ധമ്മം പടിച്ച ഹേതു ആസവവിപ്പയുത്തോ ധമ്മോ ഉപ്പജ്ജതി ഹേതുപച്ചയാ… ഹേതുയാ നവ.

൧൭. നഹേതും നആസവഞ്ചേവ നഅനാസവഞ്ച ധമ്മം പടിച്ച ഹേതു ആസവോ ചേവ സാസവോ ച ധമ്മോ ഉപ്പജ്ജതി ഹേതുപച്ചയാ… ഹേതുയാ പഞ്ച.

നഹേതും നഅനാസവഞ്ചേവ നനോ ച ആസവം ധമ്മം പടിച്ച നഹേതു സാസവോ ചേവ നോ ച ആസവോ ധമ്മോ ഉപ്പജ്ജതി ഹേതുപച്ചയാ… ഹേതുയാ പഞ്ച.

൧൮. നഹേതും നആസവഞ്ചേവ നആസവവിപ്പയുത്തഞ്ച ധമ്മം പടിച്ച ഹേതു ആസവോ ചേവ ആസവസമ്പയുത്തോ ച ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.

നഹേതും നആസവവിപ്പയുത്തഞ്ചേവ നനോ ച ആസവം ധമ്മം പടിച്ച നഹേതു ആസവസമ്പയുത്തോ ചേവ നോ ച ആസവോ ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.

൧൯. നഹേതും ആസവവിപ്പയുത്തം നസാസവം ധമ്മം പടിച്ച നഹേതു ആസവവിപ്പയുത്തോ സാസവോ ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.

നഹേതും ആസവവിപ്പയുത്തം നഅനാസവം ധമ്മം പച്ചയാ ഹേതു ആസവവിപ്പയുത്തോ അനാസവോ ധമ്മോ ഉപ്പജ്ജതി ഹേതുപച്ചയാ… ഹേതുയാ തീണി.