൧൦൦. സരണദുകം

൧-൭. പടിച്ചവാരാദി

൫൫. നസരണം ധമ്മം പടിച്ച അരണോ ധമ്മോ ഉപ്പജ്ജതി ഹേതുപച്ചയാ. ഏകം.

നഅരണം ധമ്മം പടിച്ച അരണോ ധമ്മോ ഉപ്പജ്ജതി ഹേതുപച്ചയാ… തീണി.

നസരണഞ്ച നഅരണഞ്ച ധമ്മം പടിച്ച അരണോ ധമ്മോ ഉപ്പജ്ജതി ഹേതുപച്ചയാ. ഏകം. ഹേതുയാ പഞ്ച, ആരമ്മണേ ദ്വേ…പേ… അവിഗതേ പഞ്ച.

പച്ചനീയം

നഹേതുപച്ചയോ

൫൬. നസരണം ധമ്മം പടിച്ച അരണോ ധമ്മോ ഉപ്പജ്ജതി നഹേതുപച്ചയാ. നഅരണം ധമ്മം പടിച്ച സരണോ ധമ്മോ ഉപ്പജ്ജതി നഹേതുപച്ചയാ (സംഖിത്തം).

നഹേതുയാ ദ്വേ, നആരമ്മണേ തീണി…പേ… നോവിഗതേ തീണി.

(സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം.)

ഹേതു-ആരമ്മണപച്ചയാ

൫൭. നസരണോ ധമ്മോ അരണസ്സ ധമ്മസ്സ ഹേതുപച്ചയേന പച്ചയോ. (൧)

നഅരണോ ധമ്മോ അരണസ്സ ധമ്മസ്സ ഹേതുപച്ചയേന പച്ചയോ. നഅരണോ ധമ്മോ സരണസ്സ ധമ്മസ്സ ഹേതുപച്ചയേന പച്ചയോ. നഅരണോ ധമ്മോ സരണസ്സ ച അരണസ്സ ച ധമ്മസ്സ ഹേതുപച്ചയേന പച്ചയോ. (൩)

൫൮. നസരണോ ധമ്മോ സരണസ്സ ധമ്മസ്സ ആരമ്മണപച്ചയേന പച്ചയോ. നസരണോ ധമ്മോ അരണസ്സ ധമ്മസ്സ ആരമ്മണപച്ചയേന പച്ചയോ. ദ്വേ.

നഅരണോ ധമ്മോ അരണസ്സ ധമ്മസ്സ ആരമ്മണപച്ചയേന പച്ചയോ. നഅരണോ ധമ്മോ സരണസ്സ ധമ്മസ്സ ആരമ്മണപച്ചയേന പച്ചയോ. ദ്വേ.

൫൯. ഹേതുയാ ചത്താരി, ആരമ്മണേ ചത്താരി…പേ… അവിഗതേ സത്ത.

പച്ചനീയുദ്ധാരോ

൬൦. നസരണോ ധമ്മോ സരണസ്സ ധമ്മസ്സ ആരമ്മണപച്ചയേന പച്ചയോ, ഉപനിസ്സയപച്ചയേന പച്ചയോ, പുരേജാതപച്ചയേന പച്ചയോ (സംഖിത്തം).

നഹേതുയാ സത്ത, നആരമ്മണേ സത്ത…പേ… നോഅവിഗതേ ചത്താരി.

(യഥാ കുസലത്തികേ പഞ്ഹാവാരസ്സ അനുലോമമ്പി പച്ചനീയമ്പി അനുലോമപച്ചനീയമ്പി പച്ചനീയാനുലോമമ്പി ഗണിതം, ഏവം ഗണേതബ്ബം.)

ധമ്മപച്ചനീയാനുലോമേ ദുകപട്ഠാനം നിട്ഠിതം.