൧-൩. കുസലത്തിക-ഉപാദിന്നത്തികം

൧൨. അബ്യാകതം ഉപാദിന്നുപാദാനിയം ധമ്മം പടിച്ച നകുസലോ നഉപാദിന്നുപാദാനിയോ ധമ്മോ ഉപ്പജ്ജതി ഹേതുപച്ചയാ. അബ്യാകതം ഉപാദിന്നുപാദാനിയം ധമ്മം പടിച്ച നഅകുസലോ നഉപാദിന്നുപാദാനിയോ ധമ്മോ ഉപ്പജ്ജതി ഹേതുപച്ചയാ. അബ്യാകതം ഉപാദിന്നുപാദാനിയം ധമ്മം പടിച്ച നകുസലോ നഉപാദിന്നുപാദാനിയോ ച നഅകുസലോ നഉപാദിന്നുപാദാനിയോ ച ധമ്മാ ഉപ്പജ്ജന്തി ഹേതുപച്ചയാ. ഹേതുയാ തീണി.

൧൩. കുസലോ അനുപാദിന്നുപാദാനിയോ ധമ്മോ നകുസലസ്സ നഅനുപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ. കുസലോ അനുപാദിന്നുപാദാനിയോ ധമ്മോ നഅകുസലസ്സ നഅനുപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ. കുസലോ അനുപാദിന്നുപാദാനിയോ ധമ്മോ നകുസലസ്സ നഅനുപാദിന്നുപാദാനിയസ്സ ച നഅകുസലസ്സ നഅനുപാദിന്നുപാദാനിയസ്സ ച ധമ്മസ്സ ആരമ്മണപച്ചയേന പച്ചയോ. തീണി.

അകുസലേ തീണി. അബ്യാകതം അനുപാദിന്നുപാദാനിയേ തീണിയേവ…പേ….

൧൪. കുസലം അനുപാദിന്നഅനുപാദാനിയം ധമ്മം പടിച്ച നകുസലോ നഅനുപാദിന്നഅനുപാദാനിയോ ധമ്മോ ഉപ്പജ്ജതി ഹേതുപച്ചയാ… തീണി.

അബ്യാകതം അനുപാദിന്നഅനുപാദാനിയം ധമ്മം പടിച്ച നകുസലോ നഅനുപാദിന്നഅനുപാദാനിയോ ധമ്മോ ഉപ്പജ്ജതി ഹേതുപച്ചയാ… തീണി. …ഹേതുയാ ഛ.