൧-൭. പടിച്ചവാരാദി

പച്ചയചതുക്കം

ഹേതുപച്ചയോ

൬. കുസലം സഹേതുകം ധമ്മം പടിച്ച നകുസലോ നസഹേതുകോ ധമ്മോ ഉപ്പജ്ജതി ഹേതുപച്ചയാ. കുസലം സഹേതുകം ധമ്മം പടിച്ച നഅകുസലോ നസഹേതുകോ ധമ്മോ ഉപ്പജ്ജതി ഹേതുപച്ചയാ. കുസലം സഹേതുകം ധമ്മം പടിച്ച നകുസലോ നസഹേതുകോ ച നഅകുസലോ നസഹേതുകോ ച ധമ്മാ ഉപ്പജ്ജന്തി ഹേതുപച്ചയാ. തീണി.

അകുസലം സഹേതുകം ധമ്മം പടിച്ച നഅകുസലോ നസഹേതുകോ ധമ്മോ ഉപ്പജ്ജതി ഹേതുപച്ചയാ. അകുസലം സഹേതുകം ധമ്മം പടിച്ച നകുസലോ നസഹേതുകോ ധമ്മോ ഉപ്പജ്ജതി ഹേതുപച്ചയാ. അകുസലം സഹേതുകം ധമ്മം പടിച്ച നകുസലോ നസഹേതുകോ ച നഅകുസലോ നസഹേതുകോ ച ധമ്മാ ഉപ്പജ്ജന്തി ഹേതുപച്ചയാ. തീണി.

അബ്യാകതം സഹേതുകം ധമ്മം പടിച്ച നകുസലോ നസഹേതുകോ ധമ്മോ ഉപ്പജ്ജതി ഹേതുപച്ചയാ. അബ്യാകതം സഹേതുകം ധമ്മം പടിച്ച നഅകുസലോ നസഹേതുകോ ധമ്മോ ഉപ്പജ്ജതി ഹേതുപച്ചയാ. അബ്യാകതം സഹേതുകം ധമ്മം പടിച്ച നകുസലോ നസഹേതുകോ ച നഅകുസലോ നസഹേതുകോ ച ധമ്മാ ഉപ്പജ്ജന്തി ഹേതുപച്ചയാ. തീണി.

ഹേതുയാ നവ, ആരമ്മണേ തീണി…പേ… അവിഗതേ ഏകാദസ. (സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം.)

൭. കുസലോ സഹേതുകോ ധമ്മോ നകുസലസ്സ നസഹേതുകസ്സ ധമ്മസ്സ ഹേതുപച്ചയേന പച്ചയോ. കുസലോ സഹേതുകോ ധമ്മോ നഅകുസലസ്സ നസഹേതുകസ്സ ധമ്മസ്സ ഹേതുപച്ചയേന പച്ചയോ. കുസലോ സഹേതുകോ ധമ്മോ നകുസലസ്സ നസഹേതുകസ്സ ച നഅകുസലസ്സ നസഹേതുകസ്സ ച ധമ്മസ്സ ഹേതുപച്ചയേന പച്ചയോ. തീണി.

അകുസലോ സഹേതുകോ ധമ്മോ നഅകുസലസ്സ നസഹേതുകസ്സ ധമ്മസ്സ ഹേതുപച്ചയേന പച്ചയോ. അകുസലോ സഹേതുകോ ധമ്മോ നകുസലസ്സ നസഹേതുകസ്സ ധമ്മസ്സ ഹേതുപച്ചയേന പച്ചയോ. അകുസലോ സഹേതുകോ ധമ്മോ നകുസലസ്സ നസഹേതുകസ്സ ച നഅകുസലസ്സ നസഹേതുകസ്സ ച ധമ്മസ്സ ഹേതുപച്ചയേന പച്ചയോ. തീണി.

അബ്യാകതോ സഹേതുകോ ധമ്മോ നകുസലസ്സ നസഹേതുകസ്സ ധമ്മസ്സ ഹേതുപച്ചയേന പച്ചയോ. അബ്യാകതോ സഹേതുകോ ധമ്മോ നഅകുസലസ്സ നസഹേതുകസ്സ ധമ്മസ്സ ഹേതുപച്ചയേന പച്ചയോ. അബ്യാകതോ സഹേതുകോ ധമ്മോ നകുസലസ്സ നസഹേതുകസ്സ ച നഅകുസലസ്സ നസഹേതുകസ്സ ച ധമ്മസ്സ ഹേതുപച്ചയേന പച്ചയോ. തീണി. (സംഖിത്തം.)

൮. ഹേതുയാ നവ, ആരമ്മണേ പന്നരസ…പേ… അവിഗതേ ഏകാദസ.

൯. അകുസലം അഹേതുകം ധമ്മം പടിച്ച നകുസലോ നഅഹേതുകോ ധമ്മോ ഉപ്പജ്ജതി ഹേതുപച്ചയാ. അകുസലം അഹേതുകം ധമ്മം പടിച്ച നഅബ്യാകതോ നഅഹേതുകോ ധമ്മോ ഉപ്പജ്ജതി ഹേതുപച്ചയാ. അകുസലം അഹേതുകം ധമ്മം പടിച്ച നകുസലോ നഅഹേതുകോ ച നഅബ്യാകതോ നഅഹേതുകോ ച ധമ്മാ ഉപ്പജ്ജന്തി ഹേതുപച്ചയാ. തീണി.

അബ്യാകതം അഹേതുകം ധമ്മം പടിച്ച നകുസലോ നഅഹേതുകോ ധമ്മോ ഉപ്പജ്ജതി ഹേതുപച്ചയാ. അബ്യാകതം അഹേതുകം ധമ്മം പടിച്ച നഅകുസലോ നഅഹേതുകോ ധമ്മോ ഉപ്പജ്ജതി ഹേതുപച്ചയാ. അബ്യാകതം അഹേതുകം ധമ്മം പടിച്ച നകുസലോ നഅഹേതുകോ ച നഅകുസലോ നഅഹേതുകോ ച ധമ്മാ ഉപ്പജ്ജന്തി ഹേതുപച്ചയാ. തീണി.

ഹേതുയാ ഛ, ആരമ്മണേ ഛ…പേ… അവിഗതേ ഛ.