൧-൭. പടിച്ചവാരാദി

പച്ചയചതുക്കം

ഹേതുപച്ചയോ

൧. നോനീവരണം കുസലം ധമ്മം പടിച്ച നോനീവരണോ കുസലോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

൨. ഹേതുയാ ഏകം, ആരമ്മണേ ഏകം…പേ… അവിഗതേ ഏകം (സംഖിത്തം).

(സഹജാതവാരേപി…പേ… പഞ്ഹാവാരേപി സബ്ബത്ഥ ഏകം).

൩. നീവരണം അകുസലം ധമ്മം പടിച്ച നീവരണോ അകുസലോ ധമ്മോ ഉപ്പജ്ജതി ഹേതുപച്ചയാ. നീവരണം അകുസലം ധമ്മം പടിച്ച നോനീവരണോ അകുസലോ ധമ്മോ ഉപ്പജ്ജതി ഹേതുപച്ചയാ. നീവരണം അകുസലം ധമ്മം പടിച്ച നീവരണോ അകുസലോ ച നോനീവരണോ അകുസലോ ച ധമ്മാ ഉപ്പജ്ജന്തി ഹേതുപച്ചയാ. (൩) (സംഖിത്തം.)

൪. ഹേതുയാ നവ, ആരമ്മണേ നവ…പേ… അവിഗതേ നവ (സംഖിത്തം).

പച്ചനീയം

നഹേതുപച്ചയോ

൫. നീവരണം അകുസലം ധമ്മം പടിച്ച നീവരണോ അകുസലോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാനീവരണം ഉദ്ധച്ചനീവരണം പടിച്ച അവിജ്ജാനീവരണം. (൧)

നോനീവരണം അകുസലം ധമ്മം പടിച്ച നീവരണോ അകുസലോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച അവിജ്ജാനീവരണം. (൧)

നീവരണഞ്ച നോനീവരണഞ്ച അകുസലം ധമ്മം പടിച്ച നീവരണോ അകുസലോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാനീവരണഞ്ച ഉദ്ധച്ചനീവരണഞ്ച സമ്പയുത്തകേ ച ഖന്ധേ പടിച്ച അവിജ്ജാനീവരണം. (൧) (സംഖിത്തം.)

൬. നഹേതുയാ തീണി, നഅധിപതിയാ നവ, നപുരേജാതേ നവ…പേ… നകമ്മേ തീണി…പേ… നവിപ്പയുത്തേ നവ (സംഖിത്തം).

(സഹജാതവാരേപി… സമ്പയുത്തവാരേപി സബ്ബത്ഥ നവ.)

൭. നീവരണോ അകുസലോ ധമ്മോ നീവരണസ്സ അകുസലസ്സ ധമ്മസ്സ ഹേതുപച്ചയേന പച്ചയോ (സംഖിത്തം).

൮. ഹേതുയാ തീണി, ആരമ്മണേ നവ, അധിപതിയാ നവ…പേ… ആസേവനേ നവ, കമ്മേ ആഹാരേ ഇന്ദ്രിയേ ഝാനേ മഗ്ഗേ തീണി, സമ്പയുത്തേ നവ…പേ… അവിഗതേ നവ (സംഖിത്തം).

നഹേതുയാ നവ, നആരമ്മണേ നവ (സംഖിത്തം).

ഹേതുപച്ചയാ നആരമ്മണേ തീണി (സംഖിത്തം).

നഹേതുപച്ചയാ ആരമ്മണേ നവ (സംഖിത്തം).

(യഥാ കുസലത്തികേ പഞ്ഹാവാരസ്സ അനുലോമമ്പി പച്ചനീയമ്പി അനുലോമപച്ചനീയമ്പി പച്ചനീയാനുലോമമ്പി ഗണിതം, ഏവം ഗണേതബ്ബം).

൯. നോനീവരണം അബ്യാകതം ധമ്മം പടിച്ച നോനീവരണോ അബ്യാകതോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

൧൦. ഹേതുയാ ഏകം, ആരമ്മണേ ഏകം…പേ… അവിഗതേ ഏകം (സംഖിത്തം).

(സഹജാതവാരേപി…പേ… പഞ്ഹാവാരേപി സബ്ബത്ഥ ഏകം.)