൧-൬. പടിച്ചവാരാദി

പച്ചയചതുക്കം

ഹേതുപച്ചയോ

൨൦. സഞ്ഞോജനവിപ്പയുത്തം കുസലം ധമ്മം പടിച്ച സഞ്ഞോജനവിപ്പയുത്തോ കുസലോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

ഹേതുയാ ഏകം, ആരമ്മണേ ഏകം…പേ… അവിഗതേ ഏകം (സംഖിത്തം).

(സഹജാതവാരേപി …പേ… പഞ്ഹാവാരേപി സബ്ബത്ഥ ഏകം.)

൨൧. സഞ്ഞോജനസമ്പയുത്തം അകുസലം ധമ്മം പടിച്ച സഞ്ഞോജനസമ്പയുത്തോ അകുസലോ ധമ്മോ ഉപ്പജ്ജതി ഹേതുപച്ചയാ… തീണി.

സഞ്ഞോജനസമ്പയുത്തം അകുസലം ധമ്മം പടിച്ച സഞ്ഞോജനസമ്പയുത്തോ അകുസലോ ധമ്മോ ഉപ്പജ്ജതി ആരമ്മണപച്ചയാ (സംഖിത്തം).

൨൨. ഹേതുയാ തീണി, ആരമ്മണേ പഞ്ച, അധിപതിയാ ഏകം…പേ… അവിഗതേ പഞ്ച (സംഖിത്തം, അനുലോമം).

പച്ചനീയം

നഹേതുപച്ചയോ

൨൩. സഞ്ഞോജനസമ്പയുത്തം അകുസലം ധമ്മം പടിച്ച സഞ്ഞോജനസമ്പയുത്തോ അകുസലോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഖന്ധേ പടിച്ച വിചികിച്ഛാസഹഗതോ മോഹോ. സഞ്ഞോജനസമ്പയുത്തം അകുസലം ധമ്മം പടിച്ച സഞ്ഞോജനവിപ്പയുത്തോ അകുസലോ ധമ്മോ ഉപ്പജ്ജതി നഹേതുപച്ചയാ – ഉദ്ധച്ചസഹഗതേ ഖന്ധേ പടിച്ച ഉദ്ധച്ചസഹഗതോ മോഹോ. (൨) (സംഖിത്തം.)

൨൪. നഹേതുയാ ദ്വേ, നഅധിപതിയാ പഞ്ച, നപുരേജാതേ പഞ്ച…പേ… നകമ്മേ തീണി…പേ… നവിപ്പയുത്തേ പഞ്ച (സംഖിത്തം, പച്ചനീയം).