൧-൭. പടിച്ചവാരാദി

പച്ചയചതുക്കം

൭൨. വിപാകധമ്മധമ്മം സരണം ധമ്മം പടിച്ച വിപാകധമ്മധമ്മോ സരണോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

ഹേതുയാ ഏകം…പേ… അവിഗതേ ഏകം (സംഖിത്തം).

(സഹജാതവാരേപി…പേ… പഞ്ഹാവാരേപി സബ്ബത്ഥ ഏകം.)

൭൩. വിപാകം അരണം ധമ്മം പടിച്ച വിപാകോ അരണോ ധമ്മോ ഉപ്പജ്ജതി ഹേതുപച്ചയാ… തീണി.

വിപാകധമ്മധമ്മം അരണം ധമ്മം പടിച്ച വിപാകധമ്മധമ്മോ അരണോ ധമ്മോ ഉപ്പജ്ജതി ഹേതുപച്ചയാ… തീണി.

നേവവിപാകനവിപാകധമ്മധമ്മം അരണം ധമ്മം പടിച്ച നേവവിപാകനവിപാകധമ്മധമ്മോ അരണോ ധമ്മോ ഉപ്പജ്ജതി ഹേതുപച്ചയാ… തീണി.

വിപാകം അരണഞ്ച നേവവിപാകനവിപാകധമ്മധമ്മം അരണഞ്ച ധമ്മം പടിച്ച വിപാകോ അരണോ ധമ്മോ ഉപ്പജ്ജതി ഹേതുപച്ചയാ… തീണി.

വിപാകധമ്മധമ്മം അരണഞ്ച നേവവിപാകനവിപാകധമ്മധമ്മം അരണഞ്ച ധമ്മം പടിച്ച നേവവിപാകനവിപാകധമ്മധമ്മോ അരണോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൭൪. ഹേതുയാ തേരസ, ആരമ്മണേ പഞ്ച…പേ… അവിഗതേ തേരസ (സംഖിത്തം. സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം).

൭൫. വിപാകോ അരണോ ധമ്മോ വിപാകസ്സ അരണസ്സ ധമ്മസ്സ ഹേതുപച്ചയേന പച്ചയോ… തീണി.

വിപാകധമ്മധമ്മോ അരണോ ധമ്മോ വിപാകധമ്മധമ്മസ്സ അരണസ്സ ധമ്മസ്സ ഹേതുപച്ചയേന പച്ചയോ… തീണി.

നേവവിപാകനവിപാകധമ്മധമ്മോ അരണോ ധമ്മോ നേവവിപാകനവിപാകധമ്മധമ്മസ്സ അരണസ്സ ധമ്മസ്സ ഹേതുപച്ചയേന പച്ചയോ. (൧) (സംഖിത്തം.)

൭൬. ഹേതുയാ സത്ത, ആരമ്മണേ നവ…പേ… അവിഗതേ തേരസ (സംഖിത്തം).

(യഥാ കുസലത്തികേ പഞ്ഹാവാരം, ഏവം വിത്ഥാരേതബ്ബം.)