൧-൭. പടിച്ചവാരാദി

പച്ചയചതുക്കം

ഹേതുപച്ചയോ

൮൨. സംകിലിട്ഠസംകിലേസികം സരണം ധമ്മം പടിച്ച സംകിലിട്ഠസംകിലേസികോ സരണോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

ഹേതുയാ ഏകം…പേ… അവിഗതേ ഏകം (സംഖിത്തം).

(സഹജാതവാരേപി…പേ… പഞ്ഹാവാരേപി സബ്ബത്ഥ ഏകം.)

൮൩. അസംകിലിട്ഠസംകിലേസികം അരണം ധമ്മം പടിച്ച അസംകിലിട്ഠസംകിലേസികോ അരണോ ധമ്മോ ഉപ്പജ്ജതി ഹേതുപച്ചയാ. (൧)

അസംകിലിട്ഠഅസംകിലേസികം അരണം ധമ്മം പടിച്ച അസംകിലിട്ഠഅസംകിലേസികോ അരണോ ധമ്മോ ഉപ്പജ്ജതി ഹേതുപച്ചയാ… തീണി.

അസംകിലിട്ഠസംകിലേസികം അരണഞ്ച അസംകിലിട്ഠഅസംകിലേസികം അരണഞ്ച ധമ്മം പടിച്ച അസംകിലിട്ഠസംകിലേസികോ അരണോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൮൪. ഹേതുയാ പഞ്ച, ആരമ്മണേ ദ്വേ…പേ… അവിഗതേ പഞ്ച (സംഖിത്തം). (സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം).

൮൫. അസംകിലിട്ഠസംകിലേസികോ അരണോ ധമ്മോ അസംകിലിട്ഠസംകിലേസികസ്സ അരണസ്സ ധമ്മസ്സ ഹേതുപച്ചയേന പച്ചയോ. (൧)

അസംകിലിട്ഠഅസംകിലേസികോ അരണോ ധമ്മോ അസംകിലിട്ഠഅസംകിലേസികസ്സ അരണസ്സ ധമ്മസ്സ ഹേതുപച്ചയേന പച്ചയോ… തീണി (സംഖിത്തം).

൮൬. ഹേതുയാ ചത്താരി, ആരമ്മണേ തീണി…പേ… അവിഗതേ സത്ത (സംഖിത്തം).

(യഥാ കുസലത്തികേ പഞ്ഹാവാരം, ഏവം വിത്ഥാരേതബ്ബം.)