൧-൭. പടിച്ചവാരാദി

പച്ചയചതുക്കം

൨൦. കുസലം സപ്പീതികം ധമ്മം പടിച്ച കുസലോ സപ്പീതികോ ധമ്മോ ഉപ്പജ്ജതി ഹേതുപച്ചയാ. (൧)

അകുസലം സപ്പീതികം ധമ്മം പടിച്ച അകുസലോ സപ്പീതികോ ധമ്മോ ഉപ്പജ്ജതി ഹേതുപച്ചയാ. (൧)

അബ്യാകതം സപ്പീതികം ധമ്മം പടിച്ച അബ്യാകതോ സപ്പീതികോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൨൧. ഹേതുയാ തീണി, ആരമ്മണേ തീണി…പേ… അവിഗതേ തീണി (സംഖിത്തം. സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം).

൨൨. കുസലോ സപ്പീതികോ ധമ്മോ കുസലസ്സ സപ്പീതികസ്സ ധമ്മസ്സ ഹേതുപച്ചയേന പച്ചയോ. (൧)

അകുസലോ സപ്പീതികോ ധമ്മോ അകുസലസ്സ സപ്പീതികസ്സ ധമ്മസ്സ ഹേതുപച്ചയേന പച്ചയോ. (൧)

അബ്യാകതോ സപ്പീതികോ ധമ്മോ അബ്യാകതസ്സ സപ്പീതികസ്സ ധമ്മസ്സ ഹേതുപച്ചയേന പച്ചയോ. (൧) (സംഖിത്തം.)

൨൩. ഹേതുയാ തീണി, ആരമ്മണേ നവ…പേ… അവിഗതേ തീണി (സംഖിത്തം).

അപ്പീതികപദം

ഹേതുപച്ചയോ

൨൪. കുസലം അപ്പീതികം ധമ്മം പടിച്ച കുസലോ അപ്പീതികോ ധമ്മോ ഉപ്പജ്ജതി ഹേതുപച്ചയാ… തീണി.

അകുസലം അപ്പീതികം ധമ്മം പടിച്ച അകുസലോ അപ്പീതികോ ധമ്മോ ഉപ്പജ്ജതി ഹേതുപച്ചയാ… തീണി.

അബ്യാകതം അപ്പീതികം ധമ്മം പടിച്ച അബ്യാകതോ അപ്പീതികോ ധമ്മോ ഉപ്പജ്ജതി ഹേതുപച്ചയാ. (൧)

കുസലം അപ്പീതികഞ്ച അബ്യാകതം അപ്പീതികഞ്ച ധമ്മം പടിച്ച അബ്യാകതോ അപ്പീതികോ ധമ്മോ ഉപ്പജ്ജതി ഹേതുപച്ചയാ. (൧)

അകുസലം അപ്പീതികഞ്ച അബ്യാകതം അപ്പീതികഞ്ച ധമ്മം പടിച്ച അബ്യാകതോ അപ്പീതികോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൨൫. ഹേതുയാ നവ, ആരമ്മണേ തീണി…പേ… അവിഗതേ നവ (സംഖിത്തം. സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം).

൨൬. കുസലോ അപ്പീതികോ ധമ്മോ കുസലസ്സ അപ്പീതികസ്സ ധമ്മസ്സ ഹേതുപച്ചയേന പച്ചയോ (സംഖിത്തം).

ഹേതുയാ സത്ത, ആരമ്മണേ നവ…പേ… അവിഗതേ തേരസ (സംഖിത്തം. യഥാ കുസലത്തികേ പഞ്ഹാവാരം, ഏവം വിത്ഥാരേതബ്ബം).