൧. വിഭങ്ഗവാരോ

നഹേതുപച്ചയോ

൫. കിലേസം ധമ്മം പടിച്ച കിലേസോ ധമ്മോ ഉപ്പജ്ജതി നഹേതുപച്ചയാ – വിചികിച്ഛം പടിച്ച മോഹോ, ഉദ്ധച്ചം പടിച്ച മോഹോ. (൧)

നോകിലേസം ധമ്മം പടിച്ച നോകിലേസോ ധമ്മോ ഉപ്പജ്ജതി നഹേതുപച്ചയാ – അഹേതുകം നോകിലേസം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… (യാവ അസഞ്ഞസത്താ). (൧)

നോകിലേസം ധമ്മം പടിച്ച കിലേസോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൨)

കിലേസഞ്ച നോകിലേസഞ്ച ധമ്മം പടിച്ച കിലേസോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഖന്ധേ ച വിചികിച്ഛഞ്ച പടിച്ച വിചികിച്ഛാസഹഗതോ മോഹോ, ഉദ്ധച്ചസഹഗതേ ഖന്ധേ ച ഉദ്ധച്ചഞ്ച പടിച്ച ഉദ്ധച്ചസഹഗതോ മോഹോ. (൧)

നആരമ്മണപച്ചയാദി

൬. കിലേസം ധമ്മം പടിച്ച നോകിലേസോ ധമ്മോ ഉപ്പജ്ജതി നആരമ്മണപച്ചയാ – കിലേസേ പടിച്ച ചിത്തസമുട്ഠാനം രൂപം. (൧)

നോകിലേസം ധമ്മം പടിച്ച നോകിലേസോ ധമ്മോ ഉപ്പജ്ജതി നആരമ്മണപച്ചയാ – നോകിലേസേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… ഖന്ധേ പടിച്ച വത്ഥു (യാവ അസഞ്ഞസത്താ). (൧)

കിലേസഞ്ച നോകിലേസഞ്ച ധമ്മം പടിച്ച നോകിലേസോ ധമ്മോ ഉപ്പജ്ജതി നആരമ്മണപച്ചയാ – കിലേസേ ച സമ്പയുത്തകേ ച ഖന്ധേ പടിച്ച ചിത്തസമുട്ഠാനം രൂപം, കിലേസേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)

നഅധിപതിപച്ചയാ… നഅനന്തരപച്ചയാ… നസമനന്തരപച്ചയാ… നഅഞ്ഞമഞ്ഞപച്ചയാ… നഉപനിസ്സയപച്ചയാ.

നപുരേജാതപച്ചയാദി

൭. കിലേസം ധമ്മം പടിച്ച കിലേസോ ധമ്മോ ഉപ്പജ്ജതി നപുരേജാതപച്ചയാ – അരൂപേ ലോഭം പടിച്ച മോഹോ ദിട്ഠി ഥിനം ഉദ്ധച്ചം അഹിരികം അനോത്തപ്പം, ലോഭം പടിച്ച മോഹോ ദിട്ഠി ഉദ്ധച്ചം അഹിരികം അനോത്തപ്പം, ലോഭം പടിച്ച മോഹോ മാനോ ഥിനം ഉദ്ധച്ചം അഹിരികം അനോത്തപ്പം, ലോഭം പടിച്ച മോഹോ മാനോ ഉദ്ധച്ചം അഹിരികം അനോത്തപ്പം, ലോഭം പടിച്ച മോഹോ ഥിനം ഉദ്ധച്ചം അഹിരികം അനോത്തപ്പം, ലോഭം പടിച്ച മോഹോ ഉദ്ധച്ചം അഹിരികം അനോത്തപ്പം; വിചികിച്ഛം പടിച്ച മോഹോ ഉദ്ധച്ചം അഹിരികം അനോത്തപ്പം; ഉദ്ധച്ചം പടിച്ച മോഹോ അഹിരികം അനോത്തപ്പം (അരൂപേ ദോസമൂലകം നത്ഥി). (൧)

കിലേസം ധമ്മം പടിച്ച നോകിലേസോ ധമ്മോ ഉപ്പജ്ജതി നപുരേജാതപച്ചയാ – അരൂപേ കിലേസേ പടിച്ച സമ്പയുത്തകാ ഖന്ധാ, കിലേസേ പടിച്ച ചിത്തസമുട്ഠാനം രൂപം (ഏവം നവപി പഞ്ഹാ കാതബ്ബാ), നപച്ഛാജാതപച്ചയാ, നആസേവനപച്ചയാ.

നകമ്മപച്ചയോ

൮. കിലേസം ധമ്മം പടിച്ച നോകിലേസോ ധമ്മോ ഉപ്പജ്ജതി നകമ്മപച്ചയാ – കിലേസേ പടിച്ച സമ്പയുത്തകാ ചേതനാ. (൧)

നോകിലേസം ധമ്മം പടിച്ച നോകിലേസോ ധമ്മോ ഉപ്പജ്ജതി നകമ്മപച്ചയാ – നോകിലേസേ ഖന്ധേ പടിച്ച സമ്പയുത്തകാ ചേതനാ; ബാഹിരം… ആഹാരസമുട്ഠാനം… ഉതുസമുട്ഠാനം…പേ…. (൧)

കിലേസഞ്ച നോകിലേസഞ്ച ധമ്മം പടിച്ച നോകിലേസോ ധമ്മോ ഉപ്പജ്ജതി നകമ്മപച്ചയാ – കിലേസേ ച സമ്പയുത്തകേ ച ഖന്ധേ പടിച്ച സമ്പയുത്തകാ ചേതനാ. (൧) (ഏവം സബ്ബേ പച്ചയാ കാതബ്ബാ.)