൧. വിഭങ്ഗവാരോ

ഹേതുപച്ചയോ

൮൦. കിലേസഞ്ചേവ സംകിലിട്ഠഞ്ച ധമ്മം പടിച്ച കിലേസോ ചേവ സംകിലിട്ഠോ ച ധമ്മോ ഉപ്പജ്ജതി ഹേതുപച്ചയാ – ലോഭം പടിച്ച മോഹോ ദിട്ഠി ഥിനം ഉദ്ധച്ചം അഹിരികം അനോത്തപ്പം (ചക്കം). (൧)

കിലേസഞ്ചേവ സംകിലിട്ഠഞ്ച ധമ്മം പടിച്ച സംകിലിട്ഠോ ചേവ നോ ച കിലേസോ ധമ്മോ ഉപ്പജ്ജതി ഹേതുപച്ചയാ – കിലേസേ പടിച്ച സമ്പയുത്തകാ ഖന്ധാ. (൨)

കിലേസഞ്ചേവ സംകിലിട്ഠഞ്ച ധമ്മം പടിച്ച കിലേസോ ചേവ സംകിലിട്ഠോ ച സംകിലിട്ഠോ ചേവ നോ ച കിലേസോ ച ധമ്മാ ഉപ്പജ്ജന്തി ഹേതുപച്ചയാ – ലോഭം പടിച്ച മോഹോ ദിട്ഠി ഥിനം ഉദ്ധച്ചം അഹിരികം അനോത്തപ്പം സമ്പയുത്തകാ ച ഖന്ധാ (ചക്കം). (൩)

൮൧. സംകിലിട്ഠഞ്ചേവ നോ ച കിലേസം ധമ്മം പടിച്ച സംകിലിട്ഠോ ചേവ നോ ച കിലേസോ ധമ്മോ ഉപ്പജ്ജതി ഹേതുപച്ചയാ – സംകിലിട്ഠഞ്ചേവ നോ ച കിലേസം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ…. (൧)

സംകിലിട്ഠഞ്ചേവ നോ ച കിലേസം ധമ്മം പടിച്ച കിലേസോ ചേവ സംകിലിട്ഠോ ച ധമ്മോ ഉപ്പജ്ജതി ഹേതുപച്ചയാ – സംകിലിട്ഠേ ചേവ നോ ച കിലേസേ ഖന്ധേ പടിച്ച കിലേസാ. (൨)

സംകിലിട്ഠഞ്ചേവ നോ ച കിലേസം ധമ്മം പടിച്ച കിലേസോ ചേവ സംകിലിട്ഠോ ച സംകിലിട്ഠോ ചേവ നോ ച കിലേസോ ച ധമ്മാ ഉപ്പജ്ജന്തി ഹേതുപച്ചയാ – സംകിലിട്ഠഞ്ചേവ നോ ച കിലേസം ഏകം ഖന്ധം പടിച്ച തയോ ഖന്ധാ കിലേസാ ച…പേ… ദ്വേ ഖന്ധേ…പേ…. (൩)

൮൨. കിലേസഞ്ചേവ സംകിലിട്ഠഞ്ച സംകിലിട്ഠഞ്ചേവ നോ ച കിലേസഞ്ച ധമ്മം പടിച്ച കിലേസോ ചേവ സംകിലിട്ഠോ ച ധമ്മോ ഉപ്പജ്ജതി ഹേതുപച്ചയാ – ലോഭഞ്ച സമ്പയുത്തകേ ച ഖന്ധേ പടിച്ച മോഹോ ദിട്ഠി ഥിനം ഉദ്ധച്ചം അഹിരികം അനോത്തപ്പം (ചക്കം). (൧)

കിലേസഞ്ചേവ സംകിലിട്ഠഞ്ച സംകിലിട്ഠഞ്ചേവ നോ ച കിലേസഞ്ച ധമ്മം പടിച്ച സംകിലിട്ഠോ ചേവ നോ ച കിലേസോ ധമ്മോ ഉപ്പജ്ജതി ഹേതുപച്ചയാ – സംകിലിട്ഠഞ്ചേവ നോ ച കിലേസം ഏകം ഖന്ധഞ്ച കിലേസേ ച പടിച്ച തയോ ഖന്ധാ…പേ… ദ്വേ ഖന്ധേ ച…പേ…. (൨)

കിലേസഞ്ചേവ സംകിലിട്ഠഞ്ച സംകിലിട്ഠഞ്ചേവ നോ ച കിലേസഞ്ച ധമ്മം പടിച്ച കിലേസോ ചേവ സംകിലിട്ഠോ ച സംകിലിട്ഠോ ചേവ നോ ച കിലേസോ ച ധമ്മാ ഉപ്പജ്ജന്തി ഹേതുപച്ചയാ – സംകിലിട്ഠഞ്ചേവ നോ ച കിലേസം ഏകം ഖന്ധഞ്ച ലോഭഞ്ച പടിച്ച തയോ ഖന്ധാ മോഹോ ദിട്ഠി ഥിനം ഉദ്ധച്ചം അഹിരികം അനോത്തപ്പം…പേ… ദ്വേ ഖന്ധേ ച…പേ… (ചക്കം). (൩)