൧. വിഭങ്ഗവാരോ

ഹേതുപച്ചയോ

൭൫. കിലേസോ ചേവ സംകിലേസികോ ച ധമ്മോ കിലേസസ്സ ചേവ സംകിലേസികസ്സ ച ധമ്മസ്സ ഹേതുപച്ചയേന പച്ചയോ – കിലേസാ ചേവ സംകിലേസികാ ച ഹേതൂ സമ്പയുത്തകാനം കിലേസാനം ഹേതുപച്ചയേന പച്ചയോ (ഏവം ചത്താരി, കിലേസദുകസദിസം.) (൪)

ആരമ്മണപച്ചയോ

൭൬. കിലേസോ ചേവ സംകിലേസികോ ച ധമ്മോ കിലേസസ്സ ചേവ സംകിലേസികസ്സ ച ധമ്മസ്സ ആരമ്മണപച്ചയേന പച്ചയോ – കിലേസേ ആരബ്ഭ കിലേസാ ഉപ്പജ്ജന്തി. (മൂലം കാതബ്ബം.) കിലേസേ ആരബ്ഭ സംകിലേസികാ ചേവ നോ ച കിലേസാ ഖന്ധാ ഉപ്പജ്ജന്തി. (മൂലം കാതബ്ബം.) കിലേസേ ആരബ്ഭ കിലേസാ ച സമ്പയുത്തകാ ച ഖന്ധാ ഉപ്പജ്ജന്തി. (൩)

൭൭. സംകിലേസികോ ചേവ നോ ച കിലേസോ ധമ്മോ സംകിലേസികസ്സ ചേവ നോ ച കിലേസസ്സ ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം…പേ… പുബ്ബേ സുചിണ്ണാനി…പേ… ഝാനാ വുട്ഠഹിത്വാ ഝാനം പച്ചവേക്ഖതി, അസ്സാദേതി അഭിനന്ദതി, തം ആരബ്ഭ രാഗോ ഉപ്പജ്ജതി…പേ… ഉദ്ധച്ചം ഉപ്പജ്ജതി, ഝാനേ പരിഹീനേ വിപ്പടിസാരിസ്സ ദോമനസ്സം ഉപ്പജ്ജതി; അരിയാ ഗോത്രഭും പച്ചവേക്ഖന്തി, വോദാനം പച്ചവേക്ഖന്തി, ചക്ഖും…പേ… വത്ഥും സംകിലേസികേ ചേവ നോ ച കിലേസേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി; ദിബ്ബേന ചക്ഖുനാ രൂപം പസ്സതി…പേ… ആവജ്ജനായ ആരമ്മണപച്ചയേന പച്ചയോ (ഇതരേ ദ്വേ കിലേസദുകസദിസാ, ഘടനാരമ്മണാപി കിലേസദുകസദിസാ).

അധിപതിപച്ചയോ

൭൮. കിലേസോ ചേവ സംകിലേസികോ ച ധമ്മോ കിലേസസ്സ ചേവ സംകിലേസികസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി… തീണി.

സംകിലേസികോ ചേവ നോ ച കിലേസോ ധമ്മോ സംകിലേസികസ്സ ചേവ നോ ച കിലേസസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം…പേ… സീലം…പേ… ഉപോസഥകമ്മം…പേ… പുബ്ബേ സുചിണ്ണാനി…പേ… ഝാനാ വുട്ഠഹിത്വാ ഝാനം ഗരും കത്വാ പച്ചവേക്ഖതി, സേക്ഖാ ഗോത്രഭും ഗരും കത്വാ പച്ചവേക്ഖന്തി, വോദാനം ഗരും കത്വാ പച്ചവേക്ഖന്തി; ചക്ഖും…പേ… വത്ഥും സംകിലേസികേ ചേവ നോ ച കിലേസേ ഖന്ധേ ഗരും കത്വാ സംകിലേസികാ ചേവ നോ ച കിലേസാ ഖന്ധാ ഉപ്പജ്ജന്തി. സഹജാതാധിപതി – സംകിലേസികാ ചേവ നോ ച കിലേസാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (ഇതരേ ദ്വേപി കിലേസദുകസദിസാ. ഘടനാധിപതിപി.)

അനന്തരപച്ചയാദി

൭൯. കിലേസോ ചേവ സംകിലേസികോ ച ധമ്മോ കിലേസസ്സ ചേവ സംകിലേസികസ്സ ച ധമ്മസ്സ അനന്തരപച്ചയേന പച്ചയോ… തീണി (കിലേസദുകസദിസാ).

സംകിലേസികോ ചേവ നോ ച കിലേസോ ധമ്മോ സംകിലേസികസ്സ ചേവ നോ ച കിലേസസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ സംകിലേസികാ ചേവ നോ ച കിലേസാ ഖന്ധാ പച്ഛിമാനം പച്ഛിമാനം സംകിലേസികാനഞ്ചേവ നോ ച കിലേസാനം ഖന്ധാനം അനന്തരപച്ചയേന പച്ചയോ; അനുലോമം ഗോത്രഭുസ്സ… അനുലോമം വോദാനസ്സ… ആവജ്ജനാ സംകിലേസികാനഞ്ചേവ നോ ച കിലേസാനം ഖന്ധാനം അനന്തരപച്ചയേന പച്ചയോ.

(ഇതരേ ദ്വേ അനന്തരാ കിലേസദുകസദിസാ, നിന്നാനാകരണാ. ഘടനാനന്തരമ്പി സബ്ബേ പച്ചയാ കിലേസദുകസദിസാ, നിന്നാനാകരണാ. ഉപനിസ്സയേ ലോകുത്തരം നത്ഥി, ഇദം ദുകം കിലേസദുകസദിസം, നിന്നാനാകരണം.)

കിലേസസംകിലേസികദുകം നിട്ഠിതം.