൭. പഞ്ഹാവാരോ

പച്ചയചതുക്കം

ഹേതുപച്ചയോ

൫൪. ഹേതു അബ്യാകതോ ധമ്മോ ഹേതുസ്സ അബ്യാകതസ്സ ധമ്മസ്സ ഹേതുപച്ചയേന പച്ചയോ. ഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ ഹേതുപച്ചയേന പച്ചയോ. ഹേതു അബ്യാകതോ ധമ്മോ ഹേതുസ്സ അബ്യാകതസ്സ ച നഹേതുസ്സ അബ്യാകതസ്സ ച ധമ്മസ്സ ഹേതുപച്ചയേന പച്ചയോ. (൩)

ആരമ്മണപച്ചയാദി

൫൫. ഹേതു അബ്യാകതോ ധമ്മോ ഹേതുസ്സ അബ്യാകതസ്സ ധമ്മസ്സ ആരമ്മണപച്ചയേന പച്ചയോ… നവ.

൫൬. ഹേതു അബ്യാകതോ ധമ്മോ ഹേതുസ്സ അബ്യാകതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി… തീണി.

നഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി… തീണി.

ഹേതു അബ്യാകതോ ച നഹേതു അബ്യാകതോ ച ധമ്മാ ഹേതുസ്സ അബ്യാകതസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി… തീണി…പേ….

പുരേജാതപച്ചയാദി

൫൭. നഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ പുരേജാതപച്ചയേന പച്ചയോ… തീണി.

൫൮. ഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ പച്ഛാജാതപച്ചയേന പച്ചയോ. (൧)

നഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ പച്ഛാജാതപച്ചയേന പച്ചയോ. (൧)

ഹേതു അബ്യാകതോ ച നഹേതു അബ്യാകതോ ച ധമ്മാ നഹേതുസ്സ അബ്യാകതസ്സ ധമ്മസ്സ പച്ഛാജാതപച്ചയേന പച്ചയോ. (൧)

൫൯. നഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ കമ്മപച്ചയേന പച്ചയോ… തീണി.

൬൦. ഹേതു അബ്യാകതോ ധമ്മോ ഹേതുസ്സ അബ്യാകതസ്സ ധമ്മസ്സ വിപാകപച്ചയേന പച്ചയോ… നവ.

൬൧. നഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ… ഝാനപച്ചയേന പച്ചയോ… മഗ്ഗപച്ചയേന പച്ചയോ… സമ്പയുത്തപച്ചയേന പച്ചയോ.

വിപ്പയുത്തപച്ചയോ

൬൨. ഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ വിപ്പയുത്തപച്ചയേന പച്ചയോ. (൧)

നഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ വിപ്പയുത്തപച്ചയേന പച്ചയോ… തീണി.

ഹേതു അബ്യാകതോ ച നഹേതു അബ്യാകതോ ച ധമ്മാ നഹേതുസ്സ അബ്യാകതസ്സ ധമ്മസ്സ വിപ്പയുത്തപച്ചയേന പച്ചയോ. (൧) (സംഖിത്തം.)

൬൩. ഹേതുയാ തീണി, ആരമ്മണേ നവ, അധിപതിയാ നവ, അനന്തരേ നവ, സമനന്തരേ നവ, സഹജാതേ നവ, അഞ്ഞമഞ്ഞേ നവ, നിസ്സയേ നവ, ഉപനിസ്സയേ നവ, പുരേജാതേ തീണി, പച്ഛാജാതേ തീണി, ആസേവനേ നവ, കമ്മേ തീണി, വിപാകേ നവ, ആഹാരേ തീണി, ഇന്ദ്രിയേ നവ, ഝാനേ തീണി, മഗ്ഗേ നവ, സമ്പയുത്തേ നവ, വിപ്പയുത്തേ പഞ്ച, അത്ഥിയാ നവ, നത്ഥിയാ നവ, വിഗതേ നവ, അവിഗതേ നവ.

പച്ചനീയുദ്ധാരോ

൬൪. ഹേതു അബ്യാകതോ ധമ്മോ ഹേതുസ്സ അബ്യാകതസ്സ ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ. ഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ… പച്ഛാജാതപച്ചയേന പച്ചയോ. ഹേതു അബ്യാകതോ ധമ്മോ ഹേതുസ്സ അബ്യാകതസ്സ ച നഹേതുസ്സ അബ്യാകതസ്സ ച ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ. (൩)

൬൫. നഹേതു അബ്യാകതോ ധമ്മോ നഹേതുസ്സ അബ്യാകതസ്സ ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ… പുരേജാതപച്ചയേന പച്ചയോ… പച്ഛാജാതപച്ചയേന പച്ചയോ… ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ.

൬൬. നഹേതുയാ നവ, നആരമ്മണേ നവ, നഅധിപതിയാ നവ (സംഖിത്തം, പച്ചനീയം).

ഹേതുപച്ചയാ നആരമ്മണേ തീണി (സംഖിത്തം, അനുലോമപച്ചനീയം).

നഹേതുപച്ചയാ ആരമ്മണേ നവ (സംഖിത്തം, പച്ചനീയാനുലോമം).

(യഥാ കുസലത്തികേ പഞ്ഹാവാരസ്സ അനുലോമമ്പി പച്ചനീയമ്പി അനുലോമപച്ചനീയമ്പി പച്ചനീയാനുലോമമ്പി ഗണിതം, ഏവം ഗണേതബ്ബം.)

ഹേതുദുകകുസലത്തികം നിട്ഠിതം.