൭. പഞ്ഹാവാരോ

പച്ചയചതുക്കം

ഹേതുപച്ചയാദി

൨൨൨. ഹേതു അവിതക്കവിചാരമത്തോ ധമ്മോ ഹേതുസ്സ അവിതക്കവിചാരമത്തസ്സ ധമ്മസ്സ ഹേതുപച്ചയേന പച്ചയോ… തീണി.

ഹേതു അവിതക്കവിചാരമത്തോ ധമ്മോ നഹേതുസ്സ അവിതക്കവിചാരമത്തസ്സ ധമ്മസ്സ ആരമ്മണപച്ചയേന പച്ചയോ… തീണി.

ഹേതു അവിതക്കവിചാരമത്തോ ധമ്മോ ഹേതുസ്സ അവിതക്കവിചാരമത്തസ്സ ധമ്മസ്സ അധിപതിപച്ചയേന പച്ചയോ – സഹജാതാധിപതി… തീണി.

നഹേതു അവിതക്കവിചാരമത്തോ ധമ്മോ നഹേതുസ്സ അവിതക്കവിചാരമത്തസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി… തീണി.

ഹേതു അവിതക്കവിചാരമത്തോ ച നഹേതു അവിതക്കവിചാരമത്തോ ച ധമ്മാ നഹേതുസ്സ അവിതക്കവിചാരമത്തസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി (സംഖിത്തം).

൨൨൩. ഹേതുയാ തീണി, ആരമ്മണേ തീണി, അധിപതിയാ സത്ത, അനന്തരേ നവ, സമനന്തരേ നവ, സഹജാതേ നവ, അഞ്ഞമഞ്ഞേ നവ, നിസ്സയേ നവ, ഉപനിസ്സയേ നവ, ആസേവനേ നവ, കമ്മേ തീണി, വിപാകേ നവ, ആഹാരേ തീണി, ഇന്ദ്രിയേ നവ, ഝാനേ തീണി, മഗ്ഗേ നവ, സമ്പയുത്തേ നവ, അത്ഥിയാ നവ, നത്ഥിയാ നവ, വിഗതേ നവ, അവിഗതേ നവ (സംഖിത്തം).

പച്ചനീയുദ്ധാരോ

൨൨൪. ഹേതു അവിതക്കവിചാരമത്തോ ധമ്മോ ഹേതുസ്സ അവിതക്കവിചാരമത്തസ്സ ധമ്മസ്സ സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ (സംഖിത്തം).

൨൨൫. നഹേതുയാ നവ, നആരമ്മണേ നവ (സംഖിത്തം).

ഹേതുപച്ചയാ നആരമ്മണേ തീണി (സംഖിത്തം).

നഹേതുപച്ചയാ ആരമ്മണേ തീണി (സംഖിത്തം).

(യഥാ കുസലത്തികേ പഞ്ഹാവാരസ്സ അനുലോമമ്പി പച്ചനീയമ്പി അനുലോമപച്ചനീയമ്പി പച്ചനീയാനുലോമമ്പി ഗണിതം, ഏവം ഗണേതബ്ബം.)