൭. പഞ്ഹാവാരോ

പച്ചയചതുക്കം

ഹേതുപച്ചയാദി

൧൯൮. ഹേതു അസംകിലിട്ഠസംകിലേസികോ ധമ്മോ ഹേതുസ്സ അസംകിലിട്ഠസംകിലേസികസ്സ ധമ്മസ്സ ഹേതുപച്ചയേന പച്ചയോ… തീണി.

ഹേതു അസംകിലിട്ഠസംകിലേസികോ ധമ്മോ ഹേതുസ്സ അസംകിലിട്ഠസംകിലേസികസ്സ ധമ്മസ്സ ആരമ്മണപച്ചയേന പച്ചയോ… നവ.

ഹേതു അസംകിലിട്ഠസംകിലേസികോ ധമ്മോ ഹേതുസ്സ അസംകിലിട്ഠസംകിലേസികസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി… തീണി.

നഹേതു അസംകിലിട്ഠസംകിലേസികോ ധമ്മോ നഹേതുസ്സ അസംകിലിട്ഠസംകിലേസികസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി… തീണി.

ഹേതു അസംകിലിട്ഠസംകിലേസികോ ച നഹേതു അസംകിലിട്ഠസംകിലേസികോ ച ധമ്മാ ഹേതുസ്സ അസംകിലിട്ഠസംകിലേസികസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി… തീണി (സംഖിത്തം).

൧൯൯. ഹേതുയാ തീണി, ആരമ്മണേ നവ, അധിപതിയാ നവ, അനന്തരേ നവ, സമനന്തരേ നവ, സഹജാതേ നവ, അഞ്ഞമഞ്ഞേ നവ, നിസ്സയേ നവ, ഉപനിസ്സയേ നവ, പുരേജാതേ തീണി, പച്ഛാജാതേ തീണി, ആസേവനേ നവ, കമ്മേ തീണി, വിപാകേ നവ, ആഹാരേ തീണി, ഇന്ദ്രിയേ നവ, ഝാനേ തീണി, മഗ്ഗേ നവ, സമ്പയുത്തേ നവ, വിപ്പയുത്തേ പഞ്ച, അത്ഥിയാ നവ, നത്ഥിയാ നവ, വിഗതേ നവ, അവിഗതേ നവ (സംഖിത്തം).

പച്ചനീയുദ്ധാരോ

൨൦൦. ഹേതു അസംകിലിട്ഠസംകിലേസികോ ധമ്മോ ഹേതുസ്സ അസംകിലിട്ഠസംകിലേസികസ്സ ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ (സംഖിത്തം).

൨൦൧. നഹേതുയാ നവ, നആരമ്മണേ നവ (സംഖിത്തം).

ഹേതുപച്ചയാ നആരമ്മണേ തീണി (സംഖിത്തം).

നഹേതുപച്ചയാ ആരമ്മണേ നവ (സംഖിത്തം).

(യഥാ കുസലത്തികേ പഞ്ഹാവാരസ്സ അനുലോമമ്പി പച്ചനീയമ്പി അനുലോമപച്ചനീയമ്പി പച്ചനീയാനുലോമമ്പി ഗണിതം, ഏവം ഗണേതബ്ബം.)