൭. പഞ്ഹാവാരോ

പച്ചയചതുക്കം

ഹേതുപച്ചയാദി

൧൬൯. ഹേതു അനുപാദിന്നുപാദാനിയോ ധമ്മോ ഹേതുസ്സ അനുപാദിന്നുപാദാനിയസ്സ ധമ്മസ്സ ഹേതുപച്ചയേന പച്ചയോ… തീണി.

൧൭൦. ഹേതു അനുപാദിന്നുപാദാനിയോ ധമ്മോ ഹേതുസ്സ അനുപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ… തീണി.

നഹേതു അനുപാദിന്നുപാദാനിയോ ധമ്മോ നഹേതുസ്സ അനുപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ… നവ.

൧൭൧. ഹേതു അനുപാദിന്നുപാദാനിയോ ധമ്മോ ഹേതുസ്സ അനുപാദിന്നുപാദാനിയസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി… തീണി.

നഹേതു അനുപാദിന്നുപാദാനിയോ ധമ്മോ നഹേതുസ്സ അനുപാദിന്നുപാദാനിയസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി… നവ…പേ….

൧൭൨. ഹേതു അനുപാദിന്നുപാദാനിയോ ധമ്മോ ഹേതുസ്സ അനുപാദിന്നുപാദാനിയസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ… നവ.

൧൭൩. നഹേതു അനുപാദിന്നുപാദാനിയോ ധമ്മോ നഹേതുസ്സ അനുപാദിന്നുപാദാനിയസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം… തീണി (സംഖിത്തം).

൧൭൪. ഹേതുയാ തീണി, ആരമ്മണേ നവ, അധിപതിയാ നവ, അനന്തരേ നവ, സമനന്തരേ നവ, സഹജാതേ നവ, അഞ്ഞമഞ്ഞേ നവ, നിസ്സയേ നവ, ഉപനിസ്സയേ നവ, പുരേജാതേ തീണി, പച്ഛാജാതേ തീണി, ആസേവനേ നവ, കമ്മേ തീണി, ആഹാരേ തീണി, ഇന്ദ്രിയേ നവ, ഝാനേ തീണി, മഗ്ഗേ നവ, സമ്പയുത്തേ നവ, വിപ്പയുത്തേ തീണി, അത്ഥിയാ നവ, നത്ഥിയാ നവ, വിഗതേ നവ, അവിഗതേ നവ.

പച്ചനീയുദ്ധാരോ

൧൭൫. ഹേതു അനുപാദിന്നുപാദാനിയോ ധമ്മോ ഹേതുസ്സ അനുപാദിന്നുപാദാനിയസ്സ ധമ്മസ്സ ആരമ്മണപച്ചയേന പച്ചയോ… സഹജാതപച്ചയേന പച്ചയോ… ഉപനിസ്സയപച്ചയേന പച്ചയോ (സംഖിത്തം).

൧൭൬. നഹേതുയാ നവ, നആരമ്മണേ നവ (സംഖിത്തം).

ഹേതുപച്ചയാ നആരമ്മണേ തീണി (സംഖിത്തം).

നഹേതുപച്ചയാ ആരമ്മണേ നവ (സംഖിത്തം).

(യഥാ കുസലത്തികേ പഞ്ഹാവാരസ്സ അനുലോമമ്പി പച്ചനീയമ്പി അനുലോമപച്ചനീയമ്പി പച്ചനീയാനുലോമമ്പി ഗണിതം, ഏവം ഗണേതബ്ബം.)