൧-൬. പടിച്ചവാരാദി

പച്ചയചതുക്കം

ഹേതുപച്ചയോ

൪൮൫. ഹേതും അതീതാരമ്മണം ധമ്മം പടിച്ച ഹേതു അതീതാരമ്മണോ ധമ്മോ ഉപ്പജ്ജതി ഹേതുപച്ചയാ… തീണി.

നഹേതും അതീതാരമ്മണം ധമ്മം പടിച്ച നഹേതു അതീതാരമ്മണോ ധമ്മോ ഉപ്പജ്ജതി ഹേതുപച്ചയാ… തീണി.

ഹേതും അതീതാരമ്മണഞ്ച നഹേതും അതീതാരമ്മണഞ്ച ധമ്മം പടിച്ച ഹേതു അതീതാരമ്മണോ ധമ്മോ ഉപ്പജ്ജതി ഹേതുപച്ചയാ… തീണി (സംഖിത്തം).

൪൮൬. ഹേതുയാ നവ, ആരമ്മണേ നവ, അധിപതിയാ നവ, അനന്തരേ നവ, സമനന്തരേ നവ…പേ… കമ്മേ നവ…പേ… അവിഗതേ നവ (സംഖിത്തം).

നഹേതു-നഅധിപതിപച്ചയാ

൪൮൭. നഹേതും അതീതാരമ്മണം ധമ്മം പടിച്ച നഹേതു അതീതാരമ്മണോ ധമ്മോ ഉപ്പജ്ജതി നഹേതുപച്ചയാ. നഹേതും അതീതാരമ്മണം ധമ്മം പടിച്ച ഹേതു അതീതാരമ്മണോ ധമ്മോ ഉപ്പജ്ജതി നഹേതുപച്ചയാ. (൨)

ഹേതും അതീതാരമ്മണം ധമ്മം പടിച്ച ഹേതു അതീതാരമ്മണോ ധമ്മോ ഉപ്പജ്ജതി നഅധിപതിപച്ചയാ (സംഖിത്തം).

൪൮൮. നഹേതുയാ ദ്വേ, നഅധിപതിയാ നവ, നപുരേജാതേ നവ, നപച്ഛാജാതേ നവ, നആസേവനേ നവ, നകമ്മേ തീണി, നവിപാകേ നവ, നമഗ്ഗേ ഏകം, നവിപ്പയുത്തേ നവ (സംഖിത്തം).

ഹേതുപച്ചയാ നഅധിപതിയാ നവ (സംഖിത്തം).

നഹേതുപച്ചയാ ആരമ്മണേ ദ്വേ (സംഖിത്തം).

(സഹജാതവാരോപി പച്ചയവാരോപി നിസ്സയവാരോപി സംസട്ഠവാരോപി സമ്പയുത്തവാരോപി പടിച്ചവാരസദിസാ വിത്ഥാരേതബ്ബാ.)