൧. പടിച്ചവാരാദി

പച്ചയചതുക്കം

ഹേതുപച്ചയോ

൮൩. ഹേതും ദുക്ഖായ വേദനായ സമ്പയുത്തം ധമ്മം പടിച്ച ഹേതു ദുക്ഖായ വേദനായ സമ്പയുത്തോ ധമ്മോ ഉപ്പജ്ജതി ഹേതുപച്ചയാ. ഹേതും ദുക്ഖായ വേദനായ സമ്പയുത്തം ധമ്മം പടിച്ച നഹേതു ദുക്ഖായ വേദനായ സമ്പയുത്തോ ധമ്മോ ഉപ്പജ്ജതി ഹേതുപച്ചയാ. ഹേതും ദുക്ഖായ വേദനായ സമ്പയുത്തം ധമ്മം പടിച്ച ഹേതു ദുക്ഖായ വേദനായ സമ്പയുത്തോ ച നഹേതു ദുക്ഖായ വേദനായ സമ്പയുത്തോ ച ധമ്മാ ഉപ്പജ്ജന്തി ഹേതുപച്ചയാ. (൩)

നഹേതും ദുക്ഖായ വേദനായ സമ്പയുത്തം ധമ്മം പടിച്ച നഹേതു ദുക്ഖായ വേദനായ സമ്പയുത്തോ ധമ്മോ ഉപ്പജ്ജതി ഹേതുപച്ചയാ… തീണി.

ഹേതും ദുക്ഖായ വേദനായ സമ്പയുത്തഞ്ച നഹേതും ദുക്ഖായ വേദനായ സമ്പയുത്തഞ്ച ധമ്മം പടിച്ച ഹേതു ദുക്ഖായ വേദനായ സമ്പയുത്തോ ധമ്മോ ഉപ്പജ്ജതി ഹേതുപച്ചയാ… തീണി (സംഖിത്തം).

൮൪. ഹേതുയാ നവ, ആരമ്മണേ നവ, അധിപതിയാ നവ, അനന്തരേ നവ, സമനന്തരേ നവ, സഹജാതേ നവ, അഞ്ഞമഞ്ഞേ നവ, നിസ്സയേ നവ, ഉപനിസ്സയേ നവ, പുരേജാതേ നവ, ആസേവനേ നവ, കമ്മേ നവ, വിപാകേ ഏകം, ആഹാരേ നവ, ഇന്ദ്രിയേ നവ, ഝാനേ നവ, മഗ്ഗേ നവ, സമ്പയുത്തേ നവ, വിപ്പയുത്തേ നവ, അത്ഥിയാ നവ, നത്ഥിയാ നവ, വിഗതേ നവ, അവിഗതേ നവ (അനുലോമം).

നഹേതു-നഅധിപതിപച്ചയാ

൮൫. നഹേതും ദുക്ഖായ വേദനായ സമ്പയുത്തം ധമ്മം പടിച്ച നഹേതു ദുക്ഖായ വേദനായ സമ്പയുത്തോ ധമ്മോ ഉപ്പജ്ജതി നഹേതുപച്ചയാ (൧)

൮൬. ഹേതും ദുക്ഖായ വേദനായ സമ്പയുത്തം ധമ്മം പടിച്ച ഹേതു ദുക്ഖായ വേദനായ സമ്പയുത്തോ ധമ്മോ ഉപ്പജ്ജതി നഅധിപതിപച്ചയാ (സംഖിത്തം).

൮൭. നഹേതുയാ ഏകം, നഅധിപതിയാ നവ, നപച്ഛാജാതേ നവ, നആസേവനേ നവ, നകമ്മേ തീണി, നവിപാകേ നവ, നഝാനേ ഏകം, നമഗ്ഗേ ഏകം (പച്ചനീയം).

ഹേതുപച്ചയാ നഅധിപതിയാ നവ (സംഖിത്തം, അനുലോമപച്ചനീയം).

നഹേതുപച്ചയാ ആരമ്മണേ ഏകം (സംഖിത്തം, പച്ചനീയാനുലോമം).

(സഹജാതവാരോപി പച്ചയവാരോപി നിസ്സയവാരോപി സംസട്ഠവാരോപി സമ്പയുത്തവാരോപി പടിച്ചവാരസദിസാ വിത്ഥാരേതബ്ബാ.)