൧. വിഭങ്ഗവാരോ

നഹേതു-നആരമ്മണപച്ചയാ

൩൦൨. അനിയ്യാനികം ധമ്മം പടിച്ച അനിയ്യാനികോ ധമ്മോ ഉപ്പജ്ജതി നഹേതുപച്ചയാ – അഹേതുകം അനിയ്യാനികം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ, ഏകം മഹാഭൂതം…പേ… (യാവ അസഞ്ഞസത്താ) വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧) നആരമ്മണപച്ചയാ… തീണി.

നഅധിപതിപച്ചയാദി

൩൦൩. നിയ്യാനികം ധമ്മം പടിച്ച നിയ്യാനികോ ധമ്മോ ഉപ്പജ്ജതി നഅധിപതിപച്ചയാ – നിയ്യാനികേ ഖന്ധേ പടിച്ച നിയ്യാനികാധിപതി. (൧)

അനിയ്യാനികം ധമ്മം പടിച്ച അനിയ്യാനികോ ധമ്മോ ഉപ്പജ്ജതി നഅധിപതിപച്ചയാ – അനിയ്യാനികം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ… (യാവ അസഞ്ഞസത്താ കാതബ്ബാ). (൧)

നഅനന്തരപച്ചയാ… നസമനന്തരപച്ചയാ… നഅഞ്ഞമഞ്ഞപച്ചയാ…പേ….

നപുരേജാതപച്ചയോ

൩൦൪. നിയ്യാനികം ധമ്മം പടിച്ച നിയ്യാനികോ ധമ്മോ ഉപ്പജ്ജതി നപുരേജാതപച്ചയാ – അരൂപേ നിയ്യാനികം ഏകം ഖന്ധം…പേ…. നിയ്യാനികം ധമ്മം പടിച്ച അനിയ്യാനികോ ധമ്മോ ഉപ്പജ്ജതി നപുരേജാതപച്ചയാ – നിയ്യാനികേ ഖന്ധേ പടിച്ച ചിത്തസമുട്ഠാനം രൂപം. (൨)

അനിയ്യാനികം ധമ്മം പടിച്ച അനിയ്യാനികോ ധമ്മോ ഉപ്പജ്ജതി നപുരേജാതപച്ചയാ – അരൂപേ അനിയ്യാനികം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… അനിയ്യാനികേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… (യാവ അസഞ്ഞസത്താ). (൧)

നിയ്യാനികഞ്ച അനിയ്യാനികഞ്ച ധമ്മം പടിച്ച അനിയ്യാനികോ ധമ്മോ ഉപ്പജ്ജതി നപുരേജാതപച്ചയാ – നിയ്യാനികേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം. (൧)