൧. വിഭങ്ഗവാരോ

ഹേതുപച്ചയോ

൨൪൫. രൂപാവചരോ ധമ്മോ രൂപാവചരസ്സ ധമ്മസ്സ ഹേതുപച്ചയേന പച്ചയോ – രൂപാവചരാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (മൂലം കാതബ്ബം.) രൂപാവചരാ ഹേതൂ ചിത്തസമുട്ഠാനാനം രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (മൂലം കാതബ്ബം.) രൂപാവചരാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൩)

നരൂപാവചരോ ധമ്മോ നരൂപാവചരസ്സ ധമ്മസ്സ ഹേതുപച്ചയേന പച്ചയോ – നരൂപാവചരാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൧)

ആരമ്മണപച്ചയോ

൨൪൬. രൂപാവചരോ ധമ്മോ രൂപാവചരസ്സ ധമ്മസ്സ ആരമ്മണപച്ചയേന പച്ചയോ – ചേതോപരിയഞാണേന രൂപാവചരചിത്തസമങ്ഗിസ്സ ചിത്തം ജാനാതി, രൂപാവചരാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ ആരമ്മണപച്ചയേന പച്ചയോ. രൂപാവചരോ ധമ്മോ നരൂപാവചരസ്സ ധമ്മസ്സ ആരമ്മണപച്ചയേന പച്ചയോ – പഠമം ഝാനം പച്ചവേക്ഖതി…പേ… ചതുത്ഥം ഝാനം പച്ചവേക്ഖതി, ദിബ്ബം ചക്ഖും പച്ചവേക്ഖതി, ദിബ്ബം സോതധാതും…പേ… ഇദ്ധിവിധഞാണം…പേ… ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം പച്ചവേക്ഖതി, രൂപാവചരേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി. (൨)

൨൪൭. നരൂപാവചരോ ധമ്മോ നരൂപാവചരസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ സീലം…പേ… ഉപോസഥകമ്മം…പേ… പുബ്ബേ സുചിണ്ണാനി പച്ചവേക്ഖതി അസ്സാദേതി അഭിനന്ദതി, തം ആരബ്ഭ രാഗോ…പേ… ദോമനസ്സം ഉപ്പജ്ജതി; അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി, ഫലം പച്ചവേക്ഖന്തി, നിബ്ബാനം പച്ചവേക്ഖന്തി, നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ, ഫലസ്സ, ആവജ്ജനായ ആരമ്മണപച്ചയേന പച്ചയോ; അരിയാ പഹീനേ കിലേസേ…പേ… വിക്ഖമ്ഭിതേ കിലേസേ…പേ… പുബ്ബേ…പേ… ചക്ഖും…പേ… വത്ഥും നരൂപാവചരേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി; ആകാസാനഞ്ചായതനം വിഞ്ഞാണഞ്ചായതനസ്സ…പേ… ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ…പേ… രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ ആരമ്മണപച്ചയേന പച്ചയോ. (൧)

നരൂപാവചരോ ധമ്മോ രൂപാവചരസ്സ ധമ്മസ്സ ആരമ്മണപച്ചയേന പച്ചയോ – ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി, ചേതോപരിയഞാണേന നരൂപാവചരചിത്തസമങ്ഗിസ്സ ചിത്തം ജാനാതി, നരൂപാവചരാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ ആരമ്മണപച്ചയേന പച്ചയോ. (൨)

അധിപതിപച്ചയോ

൨൪൮. രൂപാവചരോ ധമ്മോ രൂപാവചരസ്സ ധമ്മസ്സ അധിപതിപച്ചയേന പച്ചയോ. സഹജാതാധിപതി – രൂപാവചരാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. രൂപാവചരോ ധമ്മോ നരൂപാവചരസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – പഠമം ഝാനം ഗരും കത്വാ പച്ചവേക്ഖതി, അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി…പേ… ചതുത്ഥം ഝാനം…പേ… ദിബ്ബം ചക്ഖും…പേ… ദിബ്ബം സോതധാതും…പേ… ഇദ്ധിവിധഞാണം…പേ… ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം ഗരും കത്വാ പച്ചവേക്ഖതി അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി, രൂപാവചരേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – രൂപാവചരാധിപതി ചിത്തസമുട്ഠാനാനം രൂപാനം അധിപതിപച്ചയേന പച്ചയോ. രൂപാവചരോ ധമ്മോ രൂപാവചരസ്സ ച നരൂപാവചരസ്സ ച ധമ്മസ്സ അധിപതിപച്ചയേന പച്ചയോ. സഹജാതാധിപതി – രൂപാവചരാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൩)

൨൪൯. നരൂപാവചരോ ധമ്മോ നരൂപാവചരസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം…പേ… സീലം…പേ… ഉപോസഥകമ്മം…പേ… പുബ്ബേ സുചിണ്ണാനി ഗരും കത്വാ പച്ചവേക്ഖതി അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി; അരിയാ മഗ്ഗാ വുട്ഠഹിത്വാ മഗ്ഗം ഗരും കത്വാ…പേ… ഫലം…പേ… നിബ്ബാനം ഗരും കത്വാ പച്ചവേക്ഖന്തി, നിബ്ബാനം ഗോത്രഭുസ്സ, വോദാനസ്സ, മഗ്ഗസ്സ, ഫലസ്സ അധിപതിപച്ചയേന പച്ചയോ; ചക്ഖും…പേ… വത്ഥും നരൂപാവചരേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി; ആകാസാനഞ്ചായതനം ഗരും കത്വാ പച്ചവേക്ഖതി…പേ… നേവസഞ്ഞാനാസഞ്ഞായതനം ഗരും കത്വാ പച്ചവേക്ഖതി. സഹജാതാധിപതി – നരൂപാവചരാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൧)

അനന്തരപച്ചയാദി

൨൫൦. രൂപാവചരോ ധമ്മോ രൂപാവചരസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ രൂപാവചരാ ഖന്ധാ പച്ഛിമാനം പച്ഛിമാനം രൂപാവചരാനം ഖന്ധാനം അനന്തരപച്ചയേന പച്ചയോ. രൂപാവചരോ ധമ്മോ നരൂപാവചരസ്സ ധമ്മസ്സ അനന്തരപച്ചയേന പച്ചയോ – രൂപാവചരം ചുതിചിത്തം നരൂപാവചരസ്സ ഉപപത്തിചിത്തസ്സ അനന്തരപച്ചയേന പച്ചയോ; രൂപാവചരം ഭവങ്ഗം ആവജ്ജനായ… രൂപാവചരാ ഖന്ധാ നരൂപാവചരസ്സ വുട്ഠാനസ്സ അനന്തരപച്ചയേന പച്ചയോ. (൨)

൨൫൧. നരൂപാവചരോ ധമ്മോ നരൂപാവചരസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ നരൂപാവചരാ ഖന്ധാ പച്ഛിമാനം പച്ഛിമാനം നരൂപാവചരാനം ഖന്ധാനം അനന്തരപച്ചയേന പച്ചയോ; അനുലോമം ഗോത്രഭുസ്സ…പേ… നേവസഞ്ഞാനാസഞ്ഞായതനം ഫലസമാപത്തിയാ അനന്തരപച്ചയേന പച്ചയോ. നരൂപാവചരോ ധമ്മോ രൂപാവചരസ്സ ധമ്മസ്സ അനന്തരപച്ചയേന പച്ചയോ – നരൂപാവചരം ചുതിചിത്തം രൂപാവചരസ്സ ഉപപത്തിചിത്തസ്സ അനന്തരപച്ചയേന പച്ചയോ; നരൂപാവചരാ ഖന്ധാ രൂപാവചരസ്സ വുട്ഠാനസ്സ അനന്തരപച്ചയേന പച്ചയോ; പഠമസ്സ ഝാനസ്സ പരികമ്മം പഠമസ്സ ഝാനസ്സ അനന്തരപച്ചയേന പച്ചയോ…പേ… ചതുത്ഥസ്സ ഝാനസ്സ…പേ… ദിബ്ബസ്സ ചക്ഖുസ്സ…പേ… ദിബ്ബായ സോതധാതുയാ…പേ… ഇദ്ധിവിധഞാണസ്സ…പേ… ചേതോപരിയഞാണസ്സ…പേ… പുബ്ബേനിവാസാനുസ്സതിഞാണസ്സ…പേ… യഥാകമ്മൂപഗഞാണസ്സ…പേ… അനാഗതംസഞാണസ്സ, പരികമ്മം അനാഗതംസഞാണസ്സ അനന്തരപച്ചയേന പച്ചയോ. (൨)

സമനന്തരപച്ചയേന പച്ചയോ… സഹജാതപച്ചയേന പച്ചയോ… സത്ത… അഞ്ഞമഞ്ഞപച്ചയേന പച്ചയോ… ഛ… നിസ്സയപച്ചയേന പച്ചയോ… സത്ത.

ഉപനിസ്സയപച്ചയോ

൨൫൨. രൂപാവചരോ ധമ്മോ രൂപാവചരസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – രൂപാവചരം സദ്ധം ഉപനിസ്സായ രൂപാവചരം ഝാനം ഉപ്പാദേതി, അഭിഞ്ഞം…പേ… സമാപത്തിം ഉപ്പാദേതി; രൂപാവചരം സീലം…പേ… പഞ്ഞം ഉപനിസ്സായ രൂപാവചരം ഝാനം…പേ… അഭിഞ്ഞം…പേ… സമാപത്തിം ഉപ്പാദേതി; രൂപാവചരാ സദ്ധാ…പേ… പഞ്ഞാ രൂപാവചരായ സദ്ധായ…പേ… പഞ്ഞായ ഉപനിസ്സയപച്ചയേന പച്ചയോ, പഠമം ഝാനം ദുതിയസ്സ ഝാനസ്സ ഉപനിസ്സയപച്ചയേന പച്ചയോ, ദുതിയം ഝാനം തതിയസ്സ ഝാനസ്സ…പേ… തതിയം ഝാനം ചതുത്ഥസ്സ ഝാനസ്സ ഉപനിസ്സയപച്ചയേന പച്ചയോ. (൧)

രൂപാവചരോ ധമ്മോ നരൂപാവചരസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – രൂപാവചരം സദ്ധം ഉപനിസ്സായ ദാനം ദേതി, സീലം…പേ… ഉപോസഥകമ്മം കരോതി; രൂപാവചരം ഝാനം…പേ… വിപസ്സനം…പേ… മഗ്ഗം…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി; രൂപാവചരം സീലം…പേ… പഞ്ഞം ഉപനിസ്സായ ദാനം ദേതി…പേ… മാനം ജപ്പേതി, ദിട്ഠിം ഗണ്ഹാതി; രൂപാവചരാ സദ്ധാ…പേ… പഞ്ഞാ നരൂപാവചരായ സദ്ധായ…പേ… പഞ്ഞായ… രാഗസ്സ…പേ… പത്ഥനായ… കായികസ്സ സുഖസ്സ… കായികസ്സ ദുക്ഖസ്സ… മഗ്ഗസ്സ, ഫലസമാപത്തിയാ ഉപനിസ്സയപച്ചയേന പച്ചയോ. (൨)

൨൫൩. നരൂപാവചരോ ധമ്മോ നരൂപാവചരസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – നരൂപാവചരം സദ്ധം ഉപനിസ്സായ ദാനം…പേ… സീലം…പേ… ഉപോസഥകമ്മം കരോതി; നരൂപാവചരം ഝാനം…പേ… വിപസ്സനം…പേ… മഗ്ഗം…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി; നരൂപാവചരം സീലം…പേ… പഞ്ഞം, രാഗം…പേ… ഭോജനം, സേനാസനം ഉപനിസ്സായ ദാനം ദേതി…പേ… പാണം ഹനതി…പേ… സങ്ഘം ഭിന്ദതി; നരൂപാവചരാ സദ്ധാ…പേ… പഞ്ഞാ… രാഗോ…പേ… സേനാസനം നരൂപാവചരായ സദ്ധായ…പേ… പഞ്ഞായ… രാഗസ്സ…പേ… പത്ഥനായ… കായികസ്സ സുഖസ്സ… കായികസ്സ ദുക്ഖസ്സ… മഗ്ഗസ്സ, ഫലസമാപത്തിയാ ഉപനിസ്സയപച്ചയേന പച്ചയോ. (൧)

നരൂപാവചരോ ധമ്മോ രൂപാവചരസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – നരൂപാവചരം സദ്ധം ഉപനിസ്സായ രൂപാവചരം ഝാനം…പേ… അഭിഞ്ഞം …പേ… സമാപത്തിം ഉപ്പാദേതി; നരൂപാവചരം സീലം…പേ… സേനാസനം ഉപനിസ്സായ രൂപാവചരം ഝാനം…പേ… അഭിഞ്ഞം…പേ… സമാപത്തിം ഉപ്പാദേതി; നരൂപാവചരാ സദ്ധാ…പേ… സേനാസനം രൂപാവചരായ സദ്ധായ…പേ… പഞ്ഞായ ഉപനിസ്സയപച്ചയേന പച്ചയോ, പഠമസ്സ ഝാനസ്സ പരികമ്മം പഠമസ്സ ഝാനസ്സ ഉപനിസ്സയപച്ചയേന പച്ചയോ…പേ… ചതുത്ഥസ്സ ഝാനസ്സ…പേ… ദിബ്ബസ്സ ചക്ഖുസ്സ പരികമ്മം…പേ… ദിബ്ബായ സോതധാതുയാ…പേ… ഇദ്ധിവിധഞാണസ്സ…പേ… ചേതോപരിയഞാണസ്സ…പേ… പുബ്ബേനിവാസാനുസ്സതിഞാണസ്സ…പേ… യഥാകമ്മൂപഗഞാണസ്സ…പേ… അനാഗതംസഞാണസ്സ പരികമ്മം അനാഗതംസഞാണസ്സ ഉപനിസ്സയപച്ചയേന പച്ചയോ. (൨)

പുരേജാതപച്ചയാദി

൨൫൪. നരൂപാവചരോ ധമ്മോ നരൂപാവചരസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും …പേ… വത്ഥും അനിച്ചതോ…പേ… ദോമനസ്സം ഉപ്പജ്ജതി, രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ പുരേജാതപച്ചയേന പച്ചയോ. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ…പേ… കായായതനം കായവിഞ്ഞാണസ്സ പുരേജാതപച്ചയേന പച്ചയോ; വത്ഥു നരൂപാവചരാനം ഖന്ധാനം പുരേജാതപച്ചയേന പച്ചയോ. നരൂപാവചരോ ധമ്മോ രൂപാവചരസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. വത്ഥുപുരേജാതം – വത്ഥു രൂപാവചരാനം ഖന്ധാനം പുരേജാതപച്ചയേന പച്ചയോ. (൨)

പച്ഛാജാതപച്ചയേന പച്ചയോ… ദ്വേ… ആസേവനപച്ചയേന പച്ചയോ… തീണി.

കമ്മപച്ചയാദി

൨൫൫. രൂപാവചരോ ധമ്മോ രൂപാവചരസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – രൂപാവചരാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – രൂപാവചരാ ചേതനാ വിപാകാനം രൂപാവചരാനം ഖന്ധാനം കമ്മപച്ചയേന പച്ചയോ. രൂപാവചരോ ധമ്മോ നരൂപാവചരസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – രൂപാവചരാ ചേതനാ ചിത്തസമുട്ഠാനാനം രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – രൂപാവചരാ ചേതനാ കടത്താരൂപാനം കമ്മപച്ചയേന പച്ചയോ. രൂപാവചരോ ധമ്മോ രൂപാവചരസ്സ ച നരൂപാവചരസ്സ ച ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – രൂപാവചരാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – രൂപാവചരാ ചേതനാ വിപാകാനം രൂപാവചരാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. (൩)

നരൂപാവചരോ ധമ്മോ നരൂപാവചരസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – നരൂപാവചരാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – നരൂപാവചരാ ചേതനാ വിപാകാനം നരൂപാവചരാനം ഖന്ധാനം കടത്താ ച രൂപാനം കമ്മപച്ചയേന പച്ചയോ…. (൧)

വിപാകപച്ചയേന പച്ചയോ… ചത്താരി… ആഹാരപച്ചയേന പച്ചയോ… ചത്താരി… ഇന്ദ്രിയപച്ചയേന പച്ചയോ… ചത്താരി… ഝാനപച്ചയേന പച്ചയോ… ചത്താരി… മഗ്ഗപച്ചയേന പച്ചയോ… ചത്താരി… സമ്പയുത്തപച്ചയേന പച്ചയോ… ദ്വേ.

വിപ്പയുത്തപച്ചയോ

൨൫൬. രൂപാവചരോ ധമ്മോ നരൂപാവചരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം (സംഖിത്തം). (൧)

നരൂപാവചരോ ധമ്മോ നരൂപാവചരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം (സംഖിത്തം). നരൂപാവചരോ ധമ്മോ രൂപാവചരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം. സഹജാതം – പടിസന്ധിക്ഖണേ വത്ഥു രൂപാവചരാനം ഖന്ധാനം വിപ്പയുത്തപച്ചയേന പച്ചയോ. പുരേജാതം – വത്ഥു രൂപാവചരാനം ഖന്ധാനം വിപ്പയുത്തപച്ചയേന പച്ചയോ. (൨)

അത്ഥിപച്ചയാദി

൨൫൭. രൂപാവചരോ ധമ്മോ രൂപാവചരസ്സ ധമ്മസ്സ അത്ഥിപച്ചയേന പച്ചയോ (പടിച്ചസദിസം). രൂപാവചരോ ധമ്മോ നരൂപാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം. രൂപാവചരോ ധമ്മോ രൂപാവചരസ്സ ച നരൂപാവചരസ്സ ച ധമ്മസ്സ അത്ഥിപച്ചയേന പച്ചയോ (പടിച്ചസദിസം). (൩)

നരൂപാവചരോ ധമ്മോ നരൂപാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സംഖിത്തം). നരൂപാവചരോ ധമ്മോ രൂപാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതം – പടിസന്ധിക്ഖണേ വത്ഥു രൂപാവചരാനം ഖന്ധാനം അത്ഥിപച്ചയേന പച്ചയോ. പുരേജാതം – ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി, വത്ഥു രൂപാവചരാനം ഖന്ധാനം അത്ഥിപച്ചയേന പച്ചയോ. (൨)

൨൫൮. രൂപാവചരോ ച നരൂപാവചരോ ച ധമ്മാ രൂപാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതോ – രൂപാവചരോ ഏകോ ഖന്ധോ ച വത്ഥു ച തിണ്ണന്നം ഖന്ധാനം അത്ഥിപച്ചയേന പച്ചയോ…പേ… ദ്വേ ഖന്ധാ ച…പേ… പടിസന്ധിക്ഖണേ…പേ…. രൂപാവചരോ ച നരൂപാവചരോ ച ധമ്മാ നരൂപാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പച്ഛാജാതം, ആഹാരം, ഇന്ദ്രിയം. സഹജാതാ – രൂപാവചരാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം അത്ഥിപച്ചയേന പച്ചയോ; പടിസന്ധിക്ഖണേ…പേ…. പച്ഛാജാതാ – രൂപാവചരാ ഖന്ധാ ച കബളീകാരോ ആഹാരോ ച പുരേജാതസ്സ ഇമസ്സ കായസ്സ അത്ഥിപച്ചയേന പച്ചയോ. പച്ഛാജാതാ – രൂപാവചരാ ഖന്ധാ ച രൂപജീവിതിന്ദ്രിയഞ്ച കടത്താരൂപാനം അത്ഥിപച്ചയേന പച്ചയോ. (൨)

നത്ഥിപച്ചയേന പച്ചയോ… വിഗതപച്ചയേന പച്ചയോ… അവിഗതപച്ചയേന പച്ചയോ.