൧. വിഭങ്ഗവാരോ

നഹേതു-നആരമ്മണപച്ചയാ

൨൩൦. നരൂപാവചരം ധമ്മം പടിച്ച നരൂപാവചരോ ധമ്മോ ഉപ്പജ്ജതി നഹേതുപച്ചയാ – അഹേതുകം നരൂപാവചരം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ, ഏകം മഹാഭൂതം…പേ… (യാവ അസഞ്ഞസത്താ) വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

നആരമ്മണപച്ചയാ… തീണി.

നഅധിപതിപച്ചയാദി

൨൩൧. രൂപാവചരം ധമ്മം പടിച്ച രൂപാവചരോ ധമ്മോ ഉപ്പജ്ജതി നഅധിപതിപച്ചയാ – രൂപാവചരേ ഖന്ധേ പടിച്ച രൂപാവചരാധിപതി വിപാകം, രൂപാവചരം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. രൂപാവചരം ധമ്മം പടിച്ച നരൂപാവചരോ ധമ്മോ ഉപ്പജ്ജതി നഅധിപതിപച്ചയാ – വിപാകേ രൂപാവചരേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ…. രൂപാവചരം ധമ്മം പടിച്ച രൂപാവചരോ ച നരൂപാവചരോ ച ധമ്മാ ഉപ്പജ്ജന്തി നഅധിപതിപച്ചയാ – വിപാകം രൂപാവചരം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൩)

നരൂപാവചരം ധമ്മം പടിച്ച നരൂപാവചരോ ധമ്മോ ഉപ്പജ്ജതി നഅധിപതിപച്ചയാ – നരൂപാവചരം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… തീണി. (നകാമാവചരം പടിച്ചവാരസദിസം നിന്നാനം, ഇധ സബ്ബേ മഹാഭൂതാ കാതബ്ബാ.) (൩)

൨൩൨. രൂപാവചരഞ്ച നരൂപാവചരഞ്ച ധമ്മം പടിച്ച രൂപാവചരോ ധമ്മോ ഉപ്പജ്ജതി നഅധിപതിപച്ചയാ – പടിസന്ധിക്ഖണേ രൂപാവചരം ഏകം ഖന്ധഞ്ച വത്ഥുഞ്ച പടിച്ച തയോ ഖന്ധാ…പേ… ദ്വേ ഖന്ധേ ച…പേ…. രൂപാവചരഞ്ച നരൂപാവചരഞ്ച ധമ്മം പടിച്ച നരൂപാവചരോ ധമ്മോ ഉപ്പജ്ജതി നഅധിപതിപച്ചയാ – വിപാകേ രൂപാവചരേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ…. രൂപാവചരഞ്ച നരൂപാവചരഞ്ച ധമ്മം പടിച്ച രൂപാവചരോ ച നരൂപാവചരോ ച ധമ്മാ ഉപ്പജ്ജന്തി നഅധിപതിപച്ചയാ – പടിസന്ധിക്ഖണേ രൂപാവചരം ഏകം ഖന്ധഞ്ച വത്ഥുഞ്ച പടിച്ച തയോ ഖന്ധാ…പേ… ദ്വേ ഖന്ധേ ച…പേ… രൂപാവചരേ ഖന്ധേ ച മഹാഭൂതേ ച പടിച്ച കടത്താരൂപം. (൩) നഅനന്തരപച്ചയാ…പേ… നഉപനിസ്സയപച്ചയാ.

നപുരേജാതപച്ചയാദി

൨൩൩. രൂപാവചരം ധമ്മം പടിച്ച രൂപാവചരോ ധമ്മോ ഉപ്പജ്ജതി നപുരേജാതപച്ചയാ – പടിസന്ധിക്ഖണേ രൂപാവചരം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ…. രൂപാവചരം ധമ്മം പടിച്ച നരൂപാവചരോ ധമ്മോ ഉപ്പജ്ജതി നപുരേജാതപച്ചയാ – രൂപാവചരേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ…. രൂപാവചരം ധമ്മം പടിച്ച രൂപാവചരോ ച നരൂപാവചരോ ച ധമ്മാ ഉപ്പജ്ജന്തി നപുരേജാതപച്ചയാ – പടിസന്ധിക്ഖണേ രൂപാവചരം ഏകം ഖന്ധം പടിച്ച തയോ ഖന്ധാ കടത്താ ച രൂപം…പേ… ദ്വേ ഖന്ധേ…പേ…. (൩)

നരൂപാവചരം ധമ്മം പടിച്ച നരൂപാവചരോ ധമ്മോ ഉപ്പജ്ജതി നപുരേജാതപച്ചയാ – അരൂപേ നരൂപാവചരം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… നരൂപാവചരേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… (യാവ അസഞ്ഞസത്താ, ഇതരേ പഞ്ചപി പഞ്ഹാ, അനുലോമം കാതബ്ബം) നപച്ഛാജാതപച്ചയാ… നവ.

നആസേവനപച്ചയാദി

൨൩൪. രൂപാവചരം ധമ്മം പടിച്ച രൂപാവചരോ ധമ്മോ ഉപ്പജ്ജതി നആസേവനപച്ചയാ – വിപാകം രൂപാവചരം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. രൂപാവചരം ധമ്മം പടിച്ച നരൂപാവചരോ ധമ്മോ ഉപ്പജ്ജതി നആസേവനപച്ചയാ – രൂപാവചരേ ഖന്ധേ പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ…. രൂപാവചരം ധമ്മം പടിച്ച രൂപാവചരോ ച നരൂപാവചരോ ച ധമ്മാ ഉപ്പജ്ജന്തി നആസേവനപച്ചയാ – വിപാകം രൂപാവചരം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ …പേ…. (൩)

നരൂപാവചരം ധമ്മം പടിച്ച നരൂപാവചരോ ധമ്മോ ഉപ്പജ്ജതി നആസേവനപച്ചയാ… തീണി.

രൂപാവചരഞ്ച നരൂപാവചരഞ്ച ധമ്മം പടിച്ച രൂപാവചരോ ധമ്മോ ഉപ്പജ്ജതി നആസേവനപച്ചയാ (സംഖിത്തം. മൂലം. ഇതരേപി പഞ്ഹാ കാതബ്ബാ)… നകമ്മപച്ചയാ… ദ്വേ…പേ… നസമ്പയുത്തപച്ചയാ.

൨൩൫. നരൂപാവചരം ധമ്മം പടിച്ച നരൂപാവചരോ ധമ്മോ ഉപ്പജ്ജതി നവിപ്പയുത്തപച്ചയാ – അരൂപേ നരൂപാവചരം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… ബാഹിരം… ആഹാരസമുട്ഠാനം… ഉതുസമുട്ഠാനം… അസഞ്ഞസത്താനം…പേ… (സംഖിത്തം).