൧. വിഭങ്ഗവാരോ

ഹേതുപച്ചയോ

൨൦൬. കാമാവചരോ ധമ്മോ കാമാവചരസ്സ ധമ്മസ്സ ഹേതുപച്ചയേന പച്ചയോ – കാമാവചരാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൧)

നകാമാവചരോ ധമ്മോ നകാമാവചരസ്സ ധമ്മസ്സ ഹേതുപച്ചയേന പച്ചയോ – നകാമാവചരാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ; പടിസന്ധിക്ഖണേ…പേ…. നകാമാവചരോ ധമ്മോ കാമാവചരസ്സ ധമ്മസ്സ ഹേതുപച്ചയേന പച്ചയോ – നകാമാവചരാ ഹേതൂ ചിത്തസമുട്ഠാനാനം രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (മൂലം കാതബ്ബം.) നകാമാവചരാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൩)

ആരമ്മണപച്ചയോ

൨൦൭. കാമാവചരോ ധമ്മോ കാമാവചരസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ സീലം…പേ… ഉപോസഥകമ്മം…പേ… പുബ്ബേ സുചിണ്ണാനി പച്ചവേക്ഖതി അസ്സാദേതി അഭിനന്ദതി, തം ആരബ്ഭ രാഗോ…പേ… ദോമനസ്സം ഉപ്പജ്ജതി; അരിയാ ഗോത്രഭും പച്ചവേക്ഖന്തി, വോദാനം പച്ചവേക്ഖന്തി; പഹീനേ കിലേസേ…പേ… വിക്ഖമ്ഭിതേ കിലേസേ…പേ… പുബ്ബേ സുചിണ്ണാനി…പേ… ചക്ഖും…പേ… വത്ഥും കാമാവചരേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി; രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ ആരമ്മണപച്ചയേന പച്ചയോ. (൧)

കാമാവചരോ ധമ്മോ നകാമാവചരസ്സ ധമ്മസ്സ ആരമ്മണപച്ചയേന പച്ചയോ – ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി, ചേതോപരിയഞാണേന കാമാവചരചിത്തസമങ്ഗിസ്സ ചിത്തം ജാനാതി, കാമാവചരാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ ആരമ്മണപച്ചയേന പച്ചയോ. (൨)

൨൦൮. നകാമാവചരോ ധമ്മോ നകാമാവചരസ്സ ധമ്മസ്സ ആരമ്മണപച്ചയേന പച്ചയോ – നിബ്ബാനം മഗ്ഗസ്സ, ഫലസ്സ ആരമ്മണപച്ചയേന പച്ചയോ; ചേതോപരിയഞാണേന നകാമാവചരചിത്തസമങ്ഗിസ്സ ചിത്തം ജാനാതി, ആകാസാനഞ്ചായതനം വിഞ്ഞാണഞ്ചായതനസ്സ…പേ… ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ…പേ… നകാമാവചരാ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ ആരമ്മണപച്ചയേന പച്ചയോ. (൧)

നകാമാവചരോ ധമ്മോ കാമാവചരസ്സ ധമ്മസ്സ ആരമ്മണപച്ചയേന പച്ചയോ – ഝാനാ വുട്ഠഹിത്വാ ഝാനം പച്ചവേക്ഖതി അസ്സാദേതി അഭിനന്ദതി, തം ആരബ്ഭ രാഗോ ഉപ്പജ്ജതി, ദിട്ഠി ഉപ്പജ്ജതി…പേ… അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി; ഫലം…പേ… നിബ്ബാനം പച്ചവേക്ഖന്തി, നിബ്ബാനം ഗോത്രഭുസ്സ, വോദാനസ്സ, ആവജ്ജനായ ആരമ്മണപച്ചയേന പച്ചയോ; ആകാസാനഞ്ചായതനം പച്ചവേക്ഖതി, വിഞ്ഞാണഞ്ചായതനം പച്ചവേക്ഖതി, ആകിഞ്ചഞ്ഞായതനം പച്ചവേക്ഖതി, നേവസഞ്ഞാനാസഞ്ഞായതനം പച്ചവേക്ഖതി, ദിബ്ബം ചക്ഖും പച്ചവേക്ഖതി, ദിബ്ബം സോതധാതും പച്ചവേക്ഖതി, ഇദ്ധിവിധഞാണം പച്ചവേക്ഖതി, ചേതോപരിയഞാണം…പേ… പുബ്ബേനിവാസാനുസ്സതിഞാണം…പേ… യഥാകമ്മൂപഗഞാണം…പേ… അനാഗതംസഞാണം പച്ചവേക്ഖതി, നകാമാവചരേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി. (൨)

അധിപതിപച്ചയോ

൨൦൯. കാമാവചരോ ധമ്മോ കാമാവചരസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം…പേ… സീലം…പേ… ഉപോസഥകമ്മം…പേ… പുബ്ബേ സുചിണ്ണാനി ഗരും കത്വാ പച്ചവേക്ഖതി അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി, സേക്ഖാ ഗോത്രഭും ഗരും കത്വാ പച്ചവേക്ഖന്തി, വോദാനം ഗരും കത്വാ പച്ചവേക്ഖന്തി, ചക്ഖും…പേ… വത്ഥും കാമാവചരേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – കാമാവചരാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൧)

൨൧൦. നകാമാവചരോ ധമ്മോ നകാമാവചരസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – നിബ്ബാനം മഗ്ഗസ്സ, ഫലസ്സ അധിപതിപച്ചയേന പച്ചയോ. സഹജാതാധിപതി – നകാമാവചരാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. നകാമാവചരോ ധമ്മോ കാമാവചരസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ഝാനാ വുട്ഠഹിത്വാ ഝാനം ഗരും കത്വാ പച്ചവേക്ഖതി അസ്സാദേതി അഭിനന്ദതി, തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി, അരിയാ മഗ്ഗാ വുട്ഠഹിത്വാ മഗ്ഗം ഗരും കത്വാ പച്ചവേക്ഖന്തി, ഫലം…പേ… നിബ്ബാനം ഗരും കത്വാ പച്ചവേക്ഖന്തി, നിബ്ബാനം ഗോത്രഭുസ്സ, വോദാനസ്സ അധിപതിപച്ചയേന പച്ചയോ; ആകാസാനഞ്ചായതനം ഗരും കത്വാ പച്ചവേക്ഖതി വിഞ്ഞാണഞ്ചായതനം…പേ… ആകിഞ്ചഞ്ഞായതനം…പേ… നേവസഞ്ഞാനാസഞ്ഞായതനം ഗരും കത്വാ പച്ചവേക്ഖതി, ദിബ്ബം ചക്ഖും…പേ… ദിബ്ബം സോതധാതും…പേ… ഇദ്ധിവിധഞാണം…പേ… അനാഗതംസഞാണം ഗരും കത്വാ പച്ചവേക്ഖതി, നകാമാവചരേ ഖന്ധേ ഗരും കത്വാ അസ്സാദേതി അഭിനന്ദതി തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – നകാമാവചരാധിപതി ചിത്തസമുട്ഠാനാനം രൂപാനം അധിപതിപച്ചയേന പച്ചയോ; നകാമാവചരോ ധമ്മോ കാമാവചരസ്സ ച നകാമാവചരസ്സ ച ധമ്മസ്സ അധിപതിപച്ചയേന പച്ചയോ. സഹജാതാധിപതി – നകാമാവചരാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൩)

അനന്തരപച്ചയാദി

൨൧൧. കാമാവചരോ ധമ്മോ കാമാവചരസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ കാമാവചരാ ഖന്ധാ പച്ഛിമാനം പച്ഛിമാനം കാമാവചരാനം ഖന്ധാനം അനന്തരപച്ചയേന പച്ചയോ; അനുലോമം ഗോത്രഭുസ്സ… അനുലോമം വോദാനസ്സ… ആവജ്ജനാ കാമാവചരാനം ഖന്ധാനം അനന്തരപച്ചയേന പച്ചയോ.

കാമാവചരോ ധമ്മോ നകാമാവചരസ്സ ധമ്മസ്സ അനന്തരപച്ചയേന പച്ചയോ – കാമാവചരം ചുതിചിത്തം നകാമാവചരസ്സ ഉപപത്തിചിത്തസ്സ… ആവജ്ജനാ നകാമാവചരാനം ഖന്ധാനം അനന്തരപച്ചയേന പച്ചയോ; കാമാവചരാ ഖന്ധാ നകാമാവചരസ്സ വുട്ഠാനസ്സ അനന്തരപച്ചയേന പച്ചയോ; പഠമസ്സ ഝാനസ്സ പരികമ്മം പഠമസ്സ ഝാനസ്സ അനന്തരപച്ചയേന പച്ചയോ…പേ… ചതുത്ഥസ്സ ഝാനസ്സ…പേ… നേവസഞ്ഞാനാസഞ്ഞായതനസ്സ പരികമ്മം…പേ… ദിബ്ബസ്സ ചക്ഖുസ്സ…പേ… ദിബ്ബായ സോതധാതുയാ…പേ… ഇദ്ധിവിധഞാണസ്സ…പേ… ചേതോപരിയഞാണസ്സ…പേ… പുബ്ബേനിവാസാനുസ്സതിഞാണസ്സ…പേ… യഥാകമ്മൂപഗഞാണസ്സ…പേ… അനാഗതംസഞാണസ്സ പരികമ്മം അനാഗതംസഞാണസ്സ അനന്തരപച്ചയേന പച്ചയോ; ഗോത്രഭു മഗ്ഗസ്സ… വോദാനം മഗ്ഗസ്സ… അനുലോമം ഫലസമാപത്തിയാ അനന്തരപച്ചയേന പച്ചയോ. (൨)

൨൧൨. നകാമാവചരോ ധമ്മോ നകാമാവചരസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ നകാമാവചരാ ഖന്ധാ പച്ഛിമാനം പച്ഛിമാനം നകാമാവചരാനം ഖന്ധാനം അനന്തരപച്ചയേന പച്ചയോ; മഗ്ഗോ ഫലസ്സ, ഫലം ഫലസ്സ, നിരോധാ വുട്ഠഹന്തസ്സ, നേവസഞ്ഞാനാസഞ്ഞായതനം ഫലസമാപത്തിയാ അനന്തരപച്ചയേന പച്ചയോ. നകാമാവചരോ ധമ്മോ കാമാവചരസ്സ ധമ്മസ്സ അനന്തരപച്ചയേന പച്ചയോ – നകാമാവചരം ചുതിചിത്തം കാമാവചരസ്സ ഉപപത്തിചിത്തസ്സ, നകാമാവചരം ഭവങ്ഗം ആവജ്ജനായ, നകാമാവചരാ ഖന്ധാ കാമാവചരസ്സ വുട്ഠാനസ്സ അനന്തരപച്ചയേന പച്ചയോ…. (൨)

സമനന്തരപച്ചയേന പച്ചയോ… സഹജാതപച്ചയേന പച്ചയോ… സത്ത… അഞ്ഞമഞ്ഞപച്ചയേന പച്ചയോ… ഛ… നിസ്സയപച്ചയേന പച്ചയോ… സത്ത.

ഉപനിസ്സയപച്ചയോ

൨൧൩. കാമാവചരോ ധമ്മോ കാമാവചരസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – കാമാവചരം സദ്ധം ഉപനിസ്സായ ദാനം ദേതി…പേ… സീലം…പേ… ഉപോസഥകമ്മം…പേ… വിപസ്സനം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി; കാമാവചരം സീലം…പേ… പഞ്ഞം… രാഗം…പേ… പത്ഥനം… കായികം സുഖം… കായികം ദുക്ഖം… ഉതും… ഭോജനം… സേനാസനം ഉപനിസ്സായ ദാനം ദേതി…പേ… വിപസ്സനം ഉപ്പാദേതി, പാണം ഹനതി…പേ… സങ്ഘം ഭിന്ദതി; കാമാവചരാ സദ്ധാ…പേ… സേനാസനം കാമാവചരായ സദ്ധായ…പേ… പത്ഥനായ… കായികസ്സ സുഖസ്സ… കായികസ്സ ദുക്ഖസ്സ ഉപനിസ്സയപച്ചയേന പച്ചയോ. (൧)

കാമാവചരോ ധമ്മോ നകാമാവചരസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – കാമാവചരം സദ്ധം ഉപനിസ്സായ നകാമാവചരം ഝാനം ഉപ്പാദേതി, മഗ്ഗം…പേ… അഭിഞ്ഞം…പേ… സമാപത്തിം ഉപ്പാദേതി; കാമാവചരം സീലം…പേ… സേനാസനം ഉപനിസ്സായ നകാമാവചരം ഝാനം ഉപ്പാദേതി, മഗ്ഗം…പേ… അഭിഞ്ഞം…പേ… സമാപത്തിം ഉപ്പാദേതി; കാമാവചരാ സദ്ധാ…പേ… സേനാസനം നകാമാവചരായ സദ്ധായ…പേ… പഞ്ഞായ… മഗ്ഗസ്സ, ഫലസമാപത്തിയാ ഉപനിസ്സയപച്ചയേന പച്ചയോ; പഠമസ്സ ഝാനസ്സ പരികമ്മം പഠമസ്സ ഝാനസ്സ…പേ… ചതുത്ഥസ്സ ഝാനസ്സ…പേ… ആകാസാനഞ്ചായതനസ്സ…പേ… പഠമസ്സ മഗ്ഗസ്സ…പേ… ചതുത്ഥസ്സ മഗ്ഗസ്സ പരികമ്മം ചതുത്ഥസ്സ മഗ്ഗസ്സ ഉപനിസ്സയപച്ചയേന പച്ചയോ. (൨)

൨൧൪. നകാമാവചരോ ധമ്മോ നകാമാവചരസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – നകാമാവചരം സദ്ധം ഉപനിസ്സായ ഝാനം ഉപ്പാദേതി, മഗ്ഗം…പേ… അഭിഞ്ഞം…പേ… സമാപത്തിം ഉപ്പാദേതി; നകാമാവചരം സീലം …പേ… പഞ്ഞം ഉപനിസ്സായ നകാമാവചരം ഝാനം ഉപ്പാദേതി…പേ… മഗ്ഗം…പേ… അഭിഞ്ഞം…പേ… സമാപത്തിം ഉപ്പാദേതി; നകാമാവചരാ സദ്ധാ…പേ… പഞ്ഞാ നകാമാവചരായ സദ്ധായ…പേ… പഞ്ഞായ, മഗ്ഗസ്സ, ഫലസമാപത്തിയാ ഉപനിസ്സയപച്ചയേന പച്ചയോ; പഠമം ഝാനം ദുതിയസ്സ ഝാനസ്സ ഉപനിസ്സയപച്ചയേന പച്ചയോ…പേ… തതിയം ഝാനം…പേ… ചതുത്ഥം ഝാനം…പേ… ആകാസാനഞ്ചായതനം വിഞ്ഞാണഞ്ചായതനസ്സ …പേ… ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ ഉപനിസ്സയപച്ചയേന പച്ചയോ; പഠമോ മഗ്ഗോ ദുതിയസ്സ മഗ്ഗസ്സ…പേ… ദുതിയോ മഗ്ഗോ തതിയസ്സ മഗ്ഗസ്സ…പേ… തതിയോ മഗ്ഗോ ചതുത്ഥസ്സ മഗ്ഗസ്സ ഉപനിസ്സയപച്ചയേന പച്ചയോ; മഗ്ഗോ ഫലസമാപത്തിയാ ഉപനിസ്സയപച്ചയേന പച്ചയോ. (൧)

നകാമാവചരോ ധമ്മോ കാമാവചരസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – നകാമാവചരം സദ്ധം ഉപനിസ്സായ ദാനം ദേതി, സീലം…പേ… ഉപോസഥകമ്മം…പേ… വിപസ്സനം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി; നകാമാവചരം സീലം…പേ… പഞ്ഞം ഉപനിസ്സായ ദാനം ദേതി, സീലം…പേ… ഉപോസഥകമ്മം…പേ… വിപസ്സനം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി; നകാമാവചരാ സദ്ധാ…പേ… പഞ്ഞാ കാമാവചരായ സദ്ധായ…പേ… പഞ്ഞായ, രാഗസ്സ…പേ… പത്ഥനായ കായികസ്സ സുഖസ്സ, കായികസ്സ ദുക്ഖസ്സ ഉപനിസ്സയപച്ചയേന പച്ചയോ; അരിയാ മഗ്ഗം ഉപനിസ്സായ സങ്ഖാരേ അനിച്ചതോ…പേ… വിപസ്സന്തി, മഗ്ഗോ അരിയാനം അത്ഥപടിസമ്ഭിദായ… ധമ്മപടിസമ്ഭിദായ… നിരുത്തിപടിസമ്ഭിദായ… പടിഭാനപടിസമ്ഭിദായ… ഠാനാഠാനകോസല്ലസ്സ ഉപനിസ്സയപച്ചയേന പച്ചയോ; ഫലസമാപത്തി കായികസ്സ സുഖസ്സ ഉപനിസ്സയപച്ചയേന പച്ചയോ. (൨)

പുരേജാതപച്ചയാദി

൨൧൫. കാമാവചരോ ധമ്മോ കാമാവചരസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… വത്ഥും അനിച്ചതോ…പേ… ദോമനസ്സം ഉപ്പജ്ജതി; രൂപായതനം ചക്ഖുവിഞ്ഞാണസ്സ…പേ… ഫോട്ഠബ്ബായതനം കായവിഞ്ഞാണസ്സ …പേ…. വത്ഥുപുരേജാതം – ചക്ഖായതനം ചക്ഖുവിഞ്ഞാണസ്സ…പേ… കായായതനം കായവിഞ്ഞാണസ്സ…പേ… വത്ഥു കാമാവചരാനം ഖന്ധാനം പുരേജാതപച്ചയേന പച്ചയോ. കാമാവചരോ ധമ്മോ നകാമാവചരസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ദിബ്ബേന ചക്ഖുനാ രൂപം പസ്സതി, ദിബ്ബായ സോതധാതുയാ സദ്ദം സുണാതി. വത്ഥുപുരേജാതം – വത്ഥു നകാമാവചരാനം ഖന്ധാനം പുരേജാതപച്ചയേന പച്ചയോ. (൨)

പച്ഛാജാതപച്ചയേന പച്ചയോ… ദ്വേ… ആസേവനപച്ചയേന പച്ചയോ… തീണി.

കമ്മപച്ചയാദി

൨൧൬. കാമാവചരോ ധമ്മോ കാമാവചരസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ (സംഖിത്തം).

നകാമാവചരോ ധമ്മോ നകാമാവചരസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ (സംഖിത്തം). നകാമാവചരോ ധമ്മോ കാമാവചരസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ (സംഖിത്തം). നകാമാവചരോ ധമ്മോ കാമാവചരസ്സ ച നകാമാവചരസ്സ ച ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ (സംഖിത്തം). (൩)

വിപാകപച്ചയേന പച്ചയോ… ചത്താരി… ആഹാരപച്ചയേന പച്ചയോ… ചത്താരി… ഇന്ദ്രിയപച്ചയേന പച്ചയോ… ചത്താരി… ഝാനപച്ചയേന പച്ചയോ… ചത്താരി… മഗ്ഗപച്ചയേന പച്ചയോ… ചത്താരി… സമ്പയുത്തപച്ചയേന പച്ചയോ… ദ്വേ.

വിപ്പയുത്തപച്ചയോ

൨൧൭. കാമാവചരോ ധമ്മോ കാമാവചരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം, പച്ഛാജാതം (സംഖിത്തം). കാമാവചരോ ധമ്മോ നകാമാവചരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പുരേജാതം. സഹജാതം (സംഖിത്തം) പടിസന്ധിക്ഖണേ വത്ഥു നകാമാവചരാനം ഖന്ധാനം വിപ്പയുത്തപച്ചയേന പച്ചയോ. പുരേജാതം – വത്ഥു നകാമാവചരാനം ഖന്ധാനം വിപ്പയുത്തപച്ചയേന പച്ചയോ. (൨)

നകാമാവചരോ ധമ്മോ കാമാവചരസ്സ ധമ്മസ്സ വിപ്പയുത്തപച്ചയേന പച്ചയോ – സഹജാതം, പച്ഛാജാതം. സഹജാതാ – നകാമാവചരാ ഖന്ധാ ചിത്തസമുട്ഠാനാനം രൂപാനം വിപ്പയുത്തപച്ചയേന പച്ചയോ; പടിസന്ധിക്ഖണേ…പേ…. പച്ഛാജാതാ – നകാമാവചരാ ഖന്ധാ പുരേജാതസ്സ ഇമസ്സ കായസ്സ വിപ്പയുത്തപച്ചയേന പച്ചയോ. (൧)

അത്ഥിപച്ചയാദി

൨൧൮. കാമാവചരോ ധമ്മോ കാമാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സംഖിത്തം). കാമാവചരോ ധമ്മോ നകാമാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതം – പടിസന്ധിക്ഖണേ വത്ഥു നകാമാവചരാനം ഖന്ധാനം അത്ഥിപച്ചയേന പച്ചയോ. പുരേജാതം – ദിബ്ബേന ചക്ഖുനാ രൂപം പസ്സതി…പേ… (പുരേജാതസദിസം). (൨)

നകാമാവചരോ ധമ്മോ നകാമാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം (സംഖിത്തം). നകാമാവചരോ ധമ്മോ കാമാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പച്ഛാജാതം (വിപ്പയുത്തസദിസം). നകാമാവചരോ ധമ്മോ കാമാവചരസ്സ ച നകാമാവചരസ്സ ച ധമ്മസ്സ അത്ഥിപച്ചയേന പച്ചയോ (പടിച്ചസദിസം). (൩)

൨൧൯. കാമാവചരോ ച നകാമാവചരോ ച ധമ്മാ കാമാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പച്ഛാജാതം, ആഹാരം, ഇന്ദ്രിയം. സഹജാതാ – നകാമാവചരാ ഖന്ധാ ച മഹാഭൂതാ ച ചിത്തസമുട്ഠാനാനം രൂപാനം അത്ഥിപച്ചയേന പച്ചയോ; പടിസന്ധിക്ഖണേ…പേ…. പച്ഛാജാതാ – നകാമാവചരാ ഖന്ധാ ച കബളീകാരോ ആഹാരോ ച ഇമസ്സ കായസ്സ അത്ഥിപച്ചയേന പച്ചയോ. പച്ഛാജാതാ – നകാമാവചരാ ഖന്ധാ ച രൂപജീവിതിന്ദ്രിയഞ്ച കടത്താരൂപാനം അത്ഥിപച്ചയേന പച്ചയോ. കാമാവചരോ ച നകാമാവചരോ ച ധമ്മാ നകാമാവചരസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതോ – നകാമാവചരോ ഏകോ ഖന്ധോ ച വത്ഥു ച തിണ്ണന്നം ഖന്ധാനം അത്ഥിപച്ചയേന പച്ചയോ…പേ… ദ്വേ ഖന്ധാ ച…പേ… പടിസന്ധിക്ഖണേ…പേ…. നത്ഥിപച്ചയേന പച്ചയോ… വിഗതപച്ചയേന പച്ചയോ… അവിഗതപച്ചയേന പച്ചയോ. (൨)