൧-൪. പച്ചയാനുലോമാദി

ഹേതുപച്ചയോ

൧൧൫. സവിതക്കം ധമ്മം സംസട്ഠോ സവിതക്കോ ധമ്മോ ഉപ്പജ്ജതി ഹേതുപച്ചയാ – സവിതക്കം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. സവിതക്കം ധമ്മം സംസട്ഠോ അവിതക്കോ ധമ്മോ ഉപ്പജ്ജതി ഹേതുപച്ചയാ – സവിതക്കേ ഖന്ധേ സംസട്ഠോ വിതക്കോ; പടിസന്ധിക്ഖണേ…പേ…. സവിതക്കം ധമ്മം സംസട്ഠോ സവിതക്കോ ച അവിതക്കോ ച ധമ്മാ ഉപ്പജ്ജന്തി ഹേതുപച്ചയാ – സവിതക്കം ഏകം ഖന്ധം സംസട്ഠാ തയോ ഖന്ധാ വിതക്കോ ച…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൩)

അവിതക്കം ധമ്മം സംസട്ഠോ അവിതക്കോ ധമ്മോ ഉപ്പജ്ജതി ഹേതുപച്ചയാ – അവിതക്കം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. അവിതക്കം ധമ്മം സംസട്ഠോ സവിതക്കോ ധമ്മോ ഉപ്പജ്ജതി ഹേതുപച്ചയാ – വിതക്കം സംസട്ഠാ സമ്പയുത്തകാ ഖന്ധാ; പടിസന്ധിക്ഖണേ…പേ…. (൨)

സവിതക്കഞ്ച അവിതക്കഞ്ച ധമ്മം സംസട്ഠോ സവിതക്കോ ധമ്മോ ഉപ്പജ്ജതി ഹേതുപച്ചയാ – സവിതക്കം ഏകം ഖന്ധഞ്ച വിതക്കഞ്ച സംസട്ഠാ തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൧) (സംഖിത്തം.)

ഹേതുയാ ഛ, ആരമ്മണേ ഛ, അധിപതിയാ ഛ (സബ്ബത്ഥ ഛ) അവിഗതേ ഛ.

അനുലോമം.

സവിതക്കം ധമ്മം സംസട്ഠോ സവിതക്കോ ധമ്മോ ഉപ്പജ്ജതി നഹേതുപച്ചയാ. (ഏവം ഛ പഞ്ഹാ കാതബ്ബാ അനുലോമസദിസാ, അഹേതുകാതി നിയാമേതബ്ബാ, തീണിയേവ, മോഹോ ഉദ്ധരിതബ്ബോ.)

നഹേതുയാ ഛ, നഅധിപതിയാ ഛ, നപുരേജാതേ ഛ, നപച്ഛാജാതേ ഛ, നആസേവനേ ഛ, നകമ്മേ ചത്താരി, നവിപാകേ ഛ, നഝാനേ ഏകം, നമഗ്ഗേ ഛ, നവിപ്പയുത്തേ ഛ.

പച്ചനീയം.