൧. വിഭങ്ഗവാരോ

ഹേതുപച്ചയോ

൧൧൦. സവിതക്കം ധമ്മം പച്ചയാ സവിതക്കോ ധമ്മോ ഉപ്പജ്ജതി ഹേതുപച്ചയാ… തീണി (പടിച്ചവാരസദിസാ).

അവിതക്കം ധമ്മം പച്ചയാ അവിതക്കോ ധമ്മോ ഉപ്പജ്ജതി ഹേതുപച്ചയാ – അവിതക്കം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… വിതക്കം പച്ചയാ ചിത്തസമുട്ഠാനം രൂപം; പടിസന്ധിക്ഖണേ അവിതക്കം ഏകം ഖന്ധം പച്ചയാ തയോ ഖന്ധാ കടത്താ ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ വിതക്കം പച്ചയാ കടത്താരൂപം, ഖന്ധേ പച്ചയാ വത്ഥു, വത്ഥും പച്ചയാ ഖന്ധാ, വിതക്കം പച്ചയാ വത്ഥു, വത്ഥും പച്ചയാ വിതക്കോ, ഏകം മഹാഭൂതം പച്ചയാ തയോ മഹാഭൂതാ…പേ… വത്ഥും പച്ചയാ അവിതക്കാ ഖന്ധാ, വത്ഥും പച്ചയാ വിതക്കോ.

അവിതക്കം ധമ്മം പച്ചയാ സവിതക്കോ ധമ്മോ ഉപ്പജ്ജതി ഹേതുപച്ചയാ – വിതക്കം പച്ചയാ സമ്പയുത്തകാ ഖന്ധാ, വത്ഥും പച്ചയാ സവിതക്കാ ഖന്ധാ (പടിസന്ധിയാപി ദ്വേ).

അവിതക്കം ധമ്മം പച്ചയാ സവിതക്കോ ച അവിതക്കോ ച ധമ്മാ ഉപ്പജ്ജന്തി ഹേതുപച്ചയാ – വിതക്കം പച്ചയാ സമ്പയുത്തകാ ഖന്ധാ ചിത്തസമുട്ഠാനഞ്ച രൂപം, വിതക്കം പച്ചയാ സമ്പയുത്തകാ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം, വത്ഥും പച്ചയാ സവിതക്കാ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം, വത്ഥും പച്ചയാ വിതക്കോ സമ്പയുത്തകാ ച ഖന്ധാ; പടിസന്ധിക്ഖണേ…പേ… (പടിസന്ധിയാപി പവത്തിസദിസായേവ). (൩)

൧൧൧. സവിതക്കഞ്ച അവിതക്കഞ്ച ധമ്മം പച്ചയാ സവിതക്കോ ധമ്മോ ഉപ്പജ്ജതി ഹേതുപച്ചയാ – സവിതക്കം ഏകം ഖന്ധഞ്ച വിതക്കഞ്ച പച്ചയാ തയോ ഖന്ധാ…പേ… ദ്വേ ഖന്ധേ…പേ… സവിതക്കം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ… ദ്വേ ഖന്ധേ…പേ… (പടിസന്ധിക്ഖണേ ദ്വേ കാതബ്ബാ). (൧)

സവിതക്കഞ്ച അവിതക്കഞ്ച ധമ്മം പച്ചയാ അവിതക്കോ ധമ്മോ ഉപ്പജ്ജതി ഹേതുപച്ചയാ – സവിതക്കേ ഖന്ധേ ച വിതക്കഞ്ച പച്ചയാ ചിത്തസമുട്ഠാനം രൂപം, സവിതക്കേ ഖന്ധേ ച വിതക്കഞ്ച മഹാഭൂതേ ച പച്ചയാ ചിത്തസമുട്ഠാനം രൂപം, സവിതക്കേ ഖന്ധേ ച വത്ഥുഞ്ച പച്ചയാ വിതക്കോ; പടിസന്ധിക്ഖണേ…പേ… (തീണി, പടിസന്ധിയാപി). (൨)

സവിതക്കഞ്ച അവിതക്കഞ്ച ധമ്മം പച്ചയാ സവിതക്കോ ച അവിതക്കോ ച ധമ്മാ ഉപ്പജ്ജന്തി ഹേതുപച്ചയാ – സവിതക്കം ഏകം ഖന്ധഞ്ച വിതക്കഞ്ച പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… സവിതക്കം ഏകം ഖന്ധഞ്ച വിതക്കഞ്ച വത്ഥുഞ്ച പച്ചയാ തയോ ഖന്ധാ…പേ… ദ്വേ ഖന്ധേ…പേ… സവിതക്കേ ഖന്ധേ ച വിതക്കഞ്ച മഹാഭൂതേ ച പച്ചയാ ചിത്തസമുട്ഠാനം രൂപം, സവിതക്കം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ വിതക്കോ ച…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൩)