൧. വിഭങ്ഗവാരോ

ഹേതുപച്ചയോ

൯൪. ഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ധമ്മസ്സ ഹേതുപച്ചയേന പച്ചയോ… ഛ…പേ… (ദസ്സനേന പഹാതബ്ബഹേതുകദുകസദിസാ).

ആരമ്മണപച്ചയോ

൯൫. ഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ധമ്മസ്സ ആരമ്മണപച്ചയേന പച്ചയോ… തീണി (ആരബ്ഭ ദസ്സനേന പഹാതബ്ബഹേതുകദുകസദിസാ).

൯൬. നഭാവനായ പഹാതബ്ബഹേതുകോ ധമ്മോ നഭാവനായ പഹാതബ്ബഹേതുകസ്സ ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം കത്വാ തം പച്ചവേക്ഖതി അസ്സാദേതി അഭിനന്ദതി, തം ആരബ്ഭ നഭാവനായ പഹാതബ്ബഹേതുകോ രാഗോ ഉപ്പജ്ജതി, ദിട്ഠി…പേ… വിചികിച്ഛാ…പേ… നഭാവനായ പഹാതബ്ബഹേതുകം ദോമനസ്സം ഉപ്പജ്ജതി, പുബ്ബേ സുചിണ്ണാനി…പേ… ഝാനാ…പേ… അരിയാ മഗ്ഗാ…പേ… ഫലസ്സ, ആവജ്ജനായ ആരമ്മണപച്ചയേന പച്ചയോ; അരിയാ നഭാവനായ പഹാതബ്ബഹേതുകേ പഹീനേ കിലേസേ…പേ… പുബ്ബേ സമുദാചിണ്ണേ…പേ… ചക്ഖും…പേ… വത്ഥും നഭാവനായ പഹാതബ്ബഹേതുകേ ഖന്ധേ ച മോഹഞ്ച അനിച്ചതോ…പേ… വിപസ്സതി അസ്സാദേതി അഭിനന്ദതി, തം ആരബ്ഭ നഭാവനായ പഹാതബ്ബഹേതുകോ രാഗോ ഉപ്പജ്ജതി, ദിട്ഠി…പേ… വിചികിച്ഛാ…പേ… നഭാവനായ പഹാതബ്ബഹേതുകം ദോമനസ്സം ഉപ്പജ്ജതി; ദിബ്ബേന ചക്ഖുനാ രൂപം പസ്സതി…പേ… അനാഗതംസഞാണസ്സ, ആവജ്ജനായ, മോഹസ്സ ച ആരമ്മണപച്ചയേന പച്ചയോ. (൧)

നഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഝാനം…പേ… ചക്ഖും…പേ… വത്ഥും നഭാവനായ പഹാതബ്ബഹേതുകേ ഖന്ധേ ച മോഹഞ്ച അസ്സാദേതി അഭിനന്ദതി, തം ആരബ്ഭ ഭാവനായ പഹാതബ്ബഹേതുകോ രാഗോ ഉപ്പജ്ജതി, ഉദ്ധച്ചം…പേ… ഭാവനായ പഹാതബ്ബഹേതുകം ദോമനസ്സം ഉപ്പജ്ജതി. (൨)

നഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ച നഭാവനായ പഹാതബ്ബഹേതുകസ്സ ച ധമ്മസ്സ ആരമ്മണപച്ചയേന പച്ചയോ – ചക്ഖും…പേ… വത്ഥും നഭാവനായ പഹാതബ്ബഹേതുകേ ഖന്ധേ ച മോഹഞ്ച ആരബ്ഭ ഉദ്ധച്ചസഹഗതാ ഖന്ധാ ച മോഹോ ച ഉപ്പജ്ജന്തി (ഘടനാരമ്മണാ തീണിപി കാതബ്ബാ). (൩)

അധിപതിപച്ചയാദി

൯൭. ഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ഭാവനായ പഹാതബ്ബഹേതുകം രാഗം ഗരും കത്വാ അസ്സാദേതി അഭിനന്ദതി, തം ഗരും കത്വാ ഭാവനായ പഹാതബ്ബഹേതുകോ രാഗോ ഉപ്പജ്ജതി. സഹജാതാധിപതി – ഭാവനായ പഹാതബ്ബഹേതുകാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

ഭാവനായ പഹാതബ്ബഹേതുകോ ധമ്മോ നഭാവനായ പഹാതബ്ബഹേതുകസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ഭാവനായ പഹാതബ്ബഹേതുകം രാഗം ഗരും കത്വാ അസ്സാദേതി അഭിനന്ദതി, തം ഗരും കത്വാ നഭാവനായ പഹാതബ്ബഹേതുകോ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – ഭാവനായ പഹാതബ്ബഹേതുകാധിപതി ചിത്തസമുട്ഠാനാനം രൂപാനം അധിപതിപച്ചയേന പച്ചയോ. (൨)

ഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ച നഭാവനായ പഹാതബ്ബഹേതുകസ്സ ച ധമ്മസ്സ അധിപതിപച്ചയേന പച്ചയോ. സഹജാതാധിപതി – ഭാവനായ പഹാതബ്ബഹേതുകാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൩)

൯൮. നഭാവനായ പഹാതബ്ബഹേതുകോ ധമ്മോ നഭാവനായ പഹാതബ്ബഹേതുകസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം…പേ… സീലം…പേ… ഉപോസഥകമ്മം കത്വാ തം ഗരും കത്വാ പച്ചവേക്ഖതി അസ്സാദേതി അഭിനന്ദതി, തം ഗരും കത്വാ നഭാവനായ പഹാതബ്ബഹേതുകോ രാഗോ ഉപ്പജ്ജതി, ദിട്ഠി ഉപ്പജ്ജതി, പുബ്ബേ…പേ… ഝാനാ…പേ… അരിയാ മഗ്ഗാ വുട്ഠഹിത്വാ…പേ… ഫലസ്സ അധിപതിപച്ചയേന പച്ചയോ; ചക്ഖും…പേ… വത്ഥും നഭാവനായ പഹാതബ്ബഹേതുകേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ നഭാവനായ പഹാതബ്ബഹേതുകോ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – നഭാവനായ പഹാതബ്ബഹേതുകാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൧)

നഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി – ദാനം…പേ… ഝാനം…പേ… ചക്ഖും…പേ… വത്ഥും നഭാവനായ പഹാതബ്ബഹേതുകേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ ഭാവനായ പഹാതബ്ബഹേതുകോ രാഗോ ഉപ്പജ്ജതി. (൨)

(അനന്തരപച്ചയേ നഭാവനായ പഹാതബ്ബഹേതുകകാരണാ വിചികിച്ഛാസഹഗതോ മോഹോ ന കാതബ്ബോ, ഉദ്ധച്ചസഹഗതോ മോഹോ കാതബ്ബോ.) സമനന്തരപച്ചയേന പച്ചയോ… സഹജാതപച്ചയേന പച്ചയോ… നവ… അഞ്ഞമഞ്ഞപച്ചയേന പച്ചയോ… ഛ… നിസ്സയപച്ചയേന പച്ചയോ… നവ.

ഉപനിസ്സയപച്ചയോ

൯൯. ഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഭാവനായ പഹാതബ്ബഹേതുകാ ഖന്ധാ ഭാവനായ പഹാതബ്ബഹേതുകാനം ഖന്ധാനം ഉപനിസ്സയപച്ചയേന പച്ചയോ. (മൂലം കാതബ്ബം.) ഭാവനായ പഹാതബ്ബഹേതുകാ ഖന്ധാ നഭാവനായ പഹാതബ്ബഹേതുകാനം ഖന്ധാനം മോഹസ്സ ച ഉപനിസ്സയപച്ചയേന പച്ചയോ; സകഭണ്ഡേ ഛന്ദരാഗോ പരഭണ്ഡേ ഛന്ദരാഗസ്സ ഉപനിസ്സയപച്ചയേന പച്ചയോ; സകപരിഗ്ഗഹേ ഛന്ദരാഗോ പരപരിഗ്ഗഹേ ഛന്ദരാഗസ്സ ഉപനിസ്സയപച്ചയേന പച്ചയോ. (മൂലം കാതബ്ബം.) ഭാവനായ പഹാതബ്ബഹേതുകാ ഖന്ധാ ഉദ്ധച്ചസഹഗതാനം ഖന്ധാനം മോഹസ്സ ച ഉപനിസ്സയപച്ചയേന പച്ചയോ. (൩)

൧൦൦. നഭാവനായ പഹാതബ്ബഹേതുകോ ധമ്മോ നഭാവനായ പഹാതബ്ബഹേതുകസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സദ്ധം ഉപനിസ്സായ ദാനം ദേതി…പേ… സമാപത്തിം ഉപ്പാദേതി, ദിട്ഠിം ഗണ്ഹാതി; സീലം…പേ… പഞ്ഞം… നഭാവനായ പഹാതബ്ബഹേതുകം രാഗം… ദോസം… മോഹം… ദിട്ഠിം… പത്ഥനം… കായികം സുഖം… കായികം ദുക്ഖം…പേ… സേനാസനം ഉപനിസ്സായ ദാനം ദേതി…പേ… പാണം ഹനതി…പേ… സങ്ഘം ഭിന്ദതി; സദ്ധാ…പേ… സേനാസനം സദ്ധായ…പേ… പഞ്ഞായ… നഭാവനായ പഹാതബ്ബഹേതുകസ്സ രാഗസ്സ … ദോസസ്സ… മോഹസ്സ… ദിട്ഠിയാ… പത്ഥനായ… കായികസ്സ സുഖസ്സ…പേ… ഫലസമാപത്തിയാ ഉപനിസ്സയപച്ചയേന പച്ചയോ. (൧)

നഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സദ്ധം ഉപനിസ്സായ മാനം ജപ്പേതി…പേ… സദ്ധാ …പേ… സേനാസനം ഭാവനായ പഹാതബ്ബഹേതുകസ്സ രാഗസ്സ… ദോസസ്സ… മോഹസ്സ… മാനസ്സ… പത്ഥനായ ഉപനിസ്സയപച്ചയേന പച്ചയോ. (൨)

നഭാവനായ പഹാതബ്ബഹേതുകോ ധമ്മോ ഭാവനായ പഹാതബ്ബഹേതുകസ്സ ച നഭാവനായ പഹാതബ്ബഹേതുകസ്സ ച ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സദ്ധാ…പേ… പഞ്ഞാ… കായികം സുഖം…പേ… സേനാസനം ഉദ്ധച്ചസഹഗതാനം ഖന്ധാനം മോഹസ്സ ച ഉപനിസ്സയപച്ചയേന പച്ചയോ (ഘടനൂപനിസ്സയാപി തീണിപി കാതബ്ബാ). (൩)

പുരേജാതപച്ചയാദി

൧൦൧. നഭാവനായ പഹാതബ്ബഹേതുകോ ധമ്മോ നഭാവനായ പഹാതബ്ബഹേതുകസ്സ ധമ്മസ്സ പുരേജാതപച്ചയേന പച്ചയോ… തീണി… പച്ഛാജാതപച്ചയേന പച്ചയോ… തീണി… ആസേവനപച്ചയേന പച്ചയോ… നവ… കമ്മപച്ചയേന പച്ചയോ (നഭാവനായ പഹാതബ്ബഭാജനകാരണേ നാനാക്ഖണികാ ലബ്ഭതി ) …പേ… നോവിഗതപച്ചയേന പച്ചയോ. (സംഖിത്തം. യഥാ ദസ്സനേന പഹാതബ്ബഹേതുകദുകം ഏവം ഭാവനായ പഹാതബ്ബഹേതുകപച്ചയാപി പച്ചനീയാപി വിഭാഗോപി ഗണനാപി നിന്നാനാകരണാ.)

നദസ്സനേന പഹാതബ്ബോ ധമ്മോ നദസ്സനേന പഹാതബ്ബസ്സ ധമ്മസ്സ…പേ…. (പരന്തേന സകഭണ്ഡഛന്ദരാഗോപി കാതബ്ബോ.)

ഭാവനായ പഹാതബ്ബോ ധമ്മോ നഭാവനായ പഹാതബ്ബസ്സ ധമ്മസ്സ…പേ…. (പരന്തേന ‘‘സകഭണ്ഡഛന്ദരാഗോ’’തി കാതബ്ബം.)

ഭാവനായപഹാതബ്ബഹേതുകദുകം നിട്ഠിതം.