൧. വിഭങ്ഗവാരോ

ഹേതുപച്ചയോ

൬൮. ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ ഹേതുപച്ചയേന പച്ചയോ – ദസ്സനേന പഹാതബ്ബഹേതുകാ ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ. (മൂലം കാതബ്ബം.) ദസ്സനേന പഹാതബ്ബഹേതുകാ ഹേതൂ ചിത്തസമുട്ഠാനാനം രൂപാനം ഹേതുപച്ചയേന പച്ചയോ. (മൂലം കാതബ്ബം.) ദസ്സനേന പഹാതബ്ബഹേതുകാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. (൩)

൬൯. നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ ഹേതുപച്ചയേന പച്ചയോ – നദസ്സനേന പഹാതബ്ബഹേതുകാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ, വിചികിച്ഛാസഹഗതോ മോഹോ ചിത്തസമുട്ഠാനാനം രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (മൂലം കാതബ്ബം.) വിചികിച്ഛാസഹഗതോ മോഹോ സമ്പയുത്തകാനം ഖന്ധാനം ഹേതുപച്ചയേന പച്ചയോ. (മൂലം കാതബ്ബം.) വിചികിച്ഛാസഹഗതോ മോഹോ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. (൩)

ആരമ്മണപച്ചയോ

൭൦. ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ ആരമ്മണപച്ചയേന പച്ചയോ – ദസ്സനേന പഹാതബ്ബഹേതുകേ ഖന്ധേ ആരബ്ഭ ദസ്സനേന പഹാതബ്ബഹേതുകാ ഖന്ധാ ഉപ്പജ്ജന്തി. (മൂലം കാതബ്ബം.) ദസ്സനേന പഹാതബ്ബഹേതുകേ ഖന്ധേ ആരബ്ഭ നദസ്സനേന പഹാതബ്ബഹേതുകാ ഖന്ധാ ച മോഹോ ച ഉപ്പജ്ജന്തി. (മൂലം കാതബ്ബം.) ദസ്സനേന പഹാതബ്ബഹേതുകേ ഖന്ധേ ആരബ്ഭ വിചികിച്ഛാസഹഗതാ ഖന്ധാ ച മോഹോ ച ഉപ്പജ്ജന്തി. (൩)

൭൧. നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം കത്വാ തം പച്ചവേക്ഖതി, അസ്സാദേതി അഭിനന്ദതി, തം ആരബ്ഭ നദസ്സനേന പഹാതബ്ബഹേതുകോ രാഗോ ഉപ്പജ്ജതി, ഉദ്ധച്ചം ഉപ്പജ്ജതി, നദസ്സനേന പഹാതബ്ബഹേതുകം ദോമനസ്സം ഉപ്പജ്ജതി, പുബ്ബേ സുചിണ്ണാനി …പേ… ഝാനാ വുട്ഠഹിത്വാ…പേ… അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി…പേ… അരിയാ നദസ്സനേന പഹാതബ്ബഹേതുകേ പഹീനേ കിലേസേ പച്ചവേക്ഖന്തി, വിക്ഖമ്ഭിതേ കിലേസേ…പേ… പുബ്ബേ സമുദാചിണ്ണേ കിലേസേ ജാനന്തി, ചക്ഖും…പേ… വത്ഥും നദസ്സനേന പഹാതബ്ബഹേതുകേ ഖന്ധേ ച മോഹഞ്ച അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ നദസ്സനേന പഹാതബ്ബഹേതുകോ രാഗോ ഉപ്പജ്ജതി, ഉദ്ധച്ചം ഉപ്പജ്ജതി, നദസ്സനേന പഹാതബ്ബഹേതുകം ദോമനസ്സം ഉപ്പജ്ജതി, ദിബ്ബേന ചക്ഖുനാ രൂപം പസ്സതി…പേ… അനാഗതംസഞാണസ്സ, ആവജ്ജനായ, മോഹസ്സ ച ആരമ്മണപച്ചയേന പച്ചയോ.

നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ ആരമ്മണപച്ചയേന പച്ചയോ – ദാനം…പേ… ഝാനം…പേ… ചക്ഖും…പേ… വത്ഥും നദസ്സനേന പഹാതബ്ബഹേതുകേ ഖന്ധേ ച മോഹഞ്ച അസ്സാദേതി അഭിനന്ദതി, തം ആരബ്ഭ ദസ്സനേന പഹാതബ്ബഹേതുകോ രാഗോ ഉപ്പജ്ജതി, ദിട്ഠി…പേ… വിചികിച്ഛാ…പേ… ദസ്സനേന പഹാതബ്ബഹേതുകം ദോമനസ്സം ഉപ്പജ്ജതി.

നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ച നദസ്സനേന പഹാതബ്ബഹേതുകസ്സ ച ധമ്മസ്സ ആരമ്മണപച്ചയേന പച്ചയോ – ചക്ഖും…പേ… വത്ഥും നദസ്സനേന പഹാതബ്ബഹേതുകേ ഖന്ധേ ച മോഹഞ്ച ആരബ്ഭ വിചികിച്ഛാസഹഗതാ ഖന്ധാ ച മോഹോ ച ഉപ്പജ്ജന്തി. (൩)

൭൨. ദസ്സനേന പഹാതബ്ബഹേതുകോ ച നദസ്സനേന പഹാതബ്ബഹേതുകോ ച ധമ്മാ ദസ്സനേന പഹാതബ്ബഹേതുകസ്സ ധമ്മസ്സ ആരമ്മണപച്ചയേന പച്ചയോ – വിചികിച്ഛാസഹഗതേ ഖന്ധേ ച മോഹഞ്ച ആരബ്ഭ ദസ്സനേന പഹാതബ്ബഹേതുകാ ഖന്ധാ ഉപ്പജ്ജന്തി. (മൂലം കാതബ്ബം.) വിചികിച്ഛാസഹഗതേ ഖന്ധേ ച മോഹഞ്ച ആരബ്ഭ നദസ്സനേന പഹാതബ്ബഹേതുകാ ഖന്ധാ ച മോഹോ ച ഉപ്പജ്ജന്തി. (മൂലം കാതബ്ബം.) വിചികിച്ഛാസഹഗതേ ഖന്ധേ ച മോഹഞ്ച ആരബ്ഭ വിചികിച്ഛാസഹഗതാ ഖന്ധാ ച മോഹോ ച ഉപ്പജ്ജന്തി. (൩)

അധിപതിപച്ചയോ

൭൩. ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദസ്സനേന പഹാതബ്ബഹേതുകേ ഖന്ധേ ഗരും കത്വാ ദസ്സനേന പഹാതബ്ബഹേതുകാ ഖന്ധാ ഉപ്പജ്ജന്തി. സഹജാതാധിപതി – ദസ്സനേന പഹാതബ്ബഹേതുകാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

ദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ അധിപതിപച്ചയേന പച്ചയോ. സഹജാതാധിപതി – ദസ്സനേന പഹാതബ്ബഹേതുകാധിപതി ചിത്തസമുട്ഠാനാനം രൂപാനം അധിപതിപച്ചയേന പച്ചയോ. (൨)

ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ച നദസ്സനേന പഹാതബ്ബഹേതുകസ്സ ച ധമ്മസ്സ അധിപതിപച്ചയേന പച്ചയോ. സഹജാതാധിപതി – ദസ്സനേന പഹാതബ്ബഹേതുകാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൩)

൭൪. നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം…പേ… സീലം…പേ… ഉപോസഥകമ്മം കത്വാ തം ഗരും കത്വാ പച്ചവേക്ഖതി അസ്സാദേതി അഭിനന്ദതി, തം ഗരും കത്വാ നദസ്സനേന പഹാതബ്ബഹേതുകോ രാഗോ ഉപ്പജ്ജതി, പുബ്ബേ സുചിണ്ണാനി…പേ… ഝാനാ…പേ… അരിയാ മഗ്ഗാ വുട്ഠഹിത്വാ മഗ്ഗം ഗരും കത്വാ…പേ… ഫലസ്സ അധിപതിപച്ചയേന പച്ചയോ; ചക്ഖും…പേ… വത്ഥും നദസ്സനേന പഹാതബ്ബഹേതുകേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ നദസ്സനേന പഹാതബ്ബഹേതുകോ രാഗോ ഉപ്പജ്ജതി. സഹജാതാധിപതി – നദസ്സനേന പഹാതബ്ബഹേതുകാധിപതി സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം അധിപതിപച്ചയേന പച്ചയോ. (൧)

നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ദാനം…പേ… സീലം…പേ… ഉപോസഥകമ്മം കത്വാ…പേ… ഝാനാ…പേ… ചക്ഖും…പേ… വത്ഥും നദസ്സനേന പഹാതബ്ബഹേതുകേ ഖന്ധേ ഗരും കത്വാ അസ്സാദേതി അഭിനന്ദതി, തം ഗരും കത്വാ ദസ്സനേന പഹാതബ്ബഹേതുകോ രാഗോ ഉപ്പജ്ജതി, ദിട്ഠി ഉപ്പജ്ജതി. (൨)

അനന്തരപച്ചയോ

൭൫. ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ ദസ്സനേന പഹാതബ്ബഹേതുകാ ഖന്ധാ പച്ഛിമാനം പച്ഛിമാനം ദസ്സനേന പഹാതബ്ബഹേതുകാനം ഖന്ധാനം അനന്തരപച്ചയേന പച്ചയോ. (മൂലം കാതബ്ബം.) പുരിമാ പുരിമാ വിചികിച്ഛാസഹഗതാ ഖന്ധാ പച്ഛിമസ്സ പച്ഛിമസ്സ വിചികിച്ഛാസഹഗതസ്സ മോഹസ്സ അനന്തരപച്ചയേന പച്ചയോ; ദസ്സനേന പഹാതബ്ബഹേതുകാ ഖന്ധാ വുട്ഠാനസ്സ അനന്തരപച്ചയേന പച്ചയോ. (മൂലം കാതബ്ബം.) പുരിമാ പുരിമാ വിചികിച്ഛാസഹഗതാ ഖന്ധാ പച്ഛിമാനം പച്ഛിമാനം വിചികിച്ഛാസഹഗതാനം ഖന്ധാനം മോഹസ്സ ച അനന്തരപച്ചയേന പച്ചയോ. (൩)

൭൬. നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ അനന്തരപച്ചയേന പച്ചയോ – പുരിമോ പുരിമോ വിചികിച്ഛാസഹഗതോ മോഹോ പച്ഛിമസ്സ പച്ഛിമസ്സ വിചികിച്ഛാസഹഗതസ്സ മോഹസ്സ അനന്തരപച്ചയേന പച്ചയോ; പുരിമാ പുരിമാ നദസ്സനേന പഹാതബ്ബഹേതുകാ ഖന്ധാ…പേ… ഫലസമാപത്തിയാ അനന്തരപച്ചയേന പച്ചയോ. (മൂലം കാതബ്ബം.) പുരിമോ പുരിമോ വിചികിച്ഛാസഹഗതോ മോഹോ പച്ഛിമാനം പച്ഛിമാനം വിചികിച്ഛാസഹഗതാനം ഖന്ധാനം അനന്തരപച്ചയേന പച്ചയോ; ആവജ്ജനാ ദസ്സനേന പഹാതബ്ബഹേതുകാനം ഖന്ധാനം അനന്തരപച്ചയേന പച്ചയോ. (മൂലം കാതബ്ബം.) പുരിമോ പുരിമോ വിചികിച്ഛാസഹഗതോ മോഹോ പച്ഛിമാനം പച്ഛിമാനം വിചികിച്ഛാസഹഗതാനം ഖന്ധാനം മോഹസ്സ ച അനന്തരപച്ചയേന പച്ചയോ; ആവജ്ജനാ വിചികിച്ഛാസഹഗതാനം ഖന്ധാനം മോഹസ്സ ച അനന്തരപച്ചയേന പച്ചയോ. (൩)

൭൭. ദസ്സനേന പഹാതബ്ബഹേതുകോ ച നദസ്സനേന പഹാതബ്ബഹേതുകോ ച ധമ്മാ ദസ്സനേന പഹാതബ്ബഹേതുകസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ വിചികിച്ഛാസഹഗതാ ഖന്ധാ ച മോഹോ ച പച്ഛിമാനം പച്ഛിമാനം വിചികിച്ഛാസഹഗതാനം ഖന്ധാനം അനന്തരപച്ചയേന പച്ചയോ. (മൂലം കാതബ്ബം.) പുരിമാ പുരിമാ വിചികിച്ഛാസഹഗതാ ഖന്ധാ ച മോഹോ ച പച്ഛിമസ്സ പച്ഛിമസ്സ വിചികിച്ഛാസഹഗതസ്സ മോഹസ്സ അനന്തരപച്ചയേന പച്ചയോ; വിചികിച്ഛാസഹഗതാ ഖന്ധാ ച മോഹോ ച വുട്ഠാനസ്സ അനന്തരപച്ചയേന പച്ചയോ. (മൂലം കാതബ്ബം.) പുരിമാ പുരിമാ വിചികിച്ഛാസഹഗതാ ഖന്ധാ ച മോഹോ ച പച്ഛിമാനം പച്ഛിമാനം വിചികിച്ഛാസഹഗതാനം ഖന്ധാനം മോഹസ്സ ച അനന്തരപച്ചയേന പച്ചയോ. (൩)

സമനന്തരപച്ചയേന പച്ചയോ… നവ… സഹജാതപച്ചയേന പച്ചയോ… നവ… അഞ്ഞമഞ്ഞപച്ചയേന പച്ചയോ… ഛ… നിസ്സയപച്ചയേന പച്ചയോ… നവ.

ഉപനിസ്സയപച്ചയോ

൭൮. ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ദസ്സനേന പഹാതബ്ബഹേതുകാ ഖന്ധാ ദസ്സനേന പഹാതബ്ബഹേതുകാനം ഖന്ധാനം ഉപനിസ്സയപച്ചയേന പച്ചയോ. (അവസേസേസു ദ്വീസു അനന്തരൂപനിസ്സയോ, പകതൂപനിസ്സയോ.) (മൂലം കാതബ്ബം.) ദസ്സനേന പഹാതബ്ബഹേതുകാ ഖന്ധാ നദസ്സനേന പഹാതബ്ബഹേതുകാനം ഖന്ധാനം മോഹസ്സ ച ഉപനിസ്സയപച്ചയേന പച്ചയോ. (മൂലം കാതബ്ബം.) ദസ്സനേന പഹാതബ്ബഹേതുകാ ഖന്ധാ വിചികിച്ഛാസഹഗതാനം ഖന്ധാനം മോഹസ്സ ച ഉപനിസ്സയപച്ചയേന പച്ചയോ. (൩)

൭൯. നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സദ്ധം ഉപനിസ്സായ ദാനം ദേതി…പേ… സമാപത്തിം ഉപ്പാദേതി മാനം ജപ്പേതി; സീലം …പേ… പഞ്ഞം… നദസ്സനേന പഹാതബ്ബഹേതുകം രാഗം… ദോസം… മോഹം… മാനം… പത്ഥനം… കായികം സുഖം… കായികം ദുക്ഖം… ഉതും… ഭോജനം… സേനാസനം ഉപനിസ്സായ ദാനം ദേതി…പേ… സമാപത്തിം ഉപ്പാദേതി; സദ്ധാ…പേ… സേനാസനം സദ്ധായ…പേ… പഞ്ഞായ നദസ്സനേന പഹാതബ്ബഹേതുകസ്സ രാഗസ്സ…പേ… പത്ഥനായ ഫലസമാപത്തിയാ ഉപനിസ്സയപച്ചയേന പച്ചയോ. (൧)

നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സദ്ധം ഉപനിസ്സായ ദിട്ഠിം ഗണ്ഹാതി; സീലം…പേ… പഞ്ഞം… നദസ്സനേന പഹാതബ്ബഹേതുകം രാഗം… ദോസം… മോഹം… മാനം… പത്ഥനം… കായികം സുഖം… കായികം ദുക്ഖം… ഉതും… ഭോജനം… സേനാസനം ഉപനിസ്സായ പാണം ഹനതി…പേ… സങ്ഘം ഭിന്ദതി; സദ്ധാ…പേ… സേനാസനം ദസ്സനേന പഹാതബ്ബഹേതുകസ്സ രാഗസ്സ… ദോസസ്സ… മോഹസ്സ… ദിട്ഠിയാ… പത്ഥനായ ഉപനിസ്സയപച്ചയേന പച്ചയോ. (൨)

നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ച നദസ്സനേന പഹാതബ്ബഹേതുകസ്സ ച ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സദ്ധാ…പേ… പഞ്ഞാ, നദസ്സനേന പഹാതബ്ബഹേതുകോ രാഗോ… ദോസോ… മോഹോ… മാനോ… പത്ഥനാ… കായികം സുഖം…പേ… സേനാസനം, വിചികിച്ഛാസഹഗതാനം ഖന്ധാനം മോഹസ്സ ച ഉപനിസ്സയപച്ചയേന പച്ചയോ. (൩)

൮൦. ദസ്സനേന പഹാതബ്ബഹേതുകോ ച നദസ്സനേന പഹാതബ്ബഹേതുകോ ച ധമ്മാ ദസ്സനേന പഹാതബ്ബഹേതുകസ്സ ധമ്മസ്സ ഉപനിസ്സയപച്ചയേന പച്ചയോ – അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – വിചികിച്ഛാസഹഗതാ ഖന്ധാ ച മോഹോ ച ദസ്സനേന പഹാതബ്ബഹേതുകാനം ഖന്ധാനം ഉപനിസ്സയപച്ചയേന പച്ചയോ. (മൂലം കാതബ്ബം.) വിചികിച്ഛാസഹഗതാ ഖന്ധാ ച മോഹോ ച നദസ്സനേന പഹാതബ്ബഹേതുകാനം ഖന്ധാനം മോഹസ്സ ച ഉപനിസ്സയപച്ചയേന പച്ചയോ. (മൂലം കാതബ്ബം.) വിചികിച്ഛാസഹഗതാ ഖന്ധാ ച മോഹോ ച വിചികിച്ഛാസഹഗതാനം ഖന്ധാനം മോഹസ്സ ച ഉപനിസ്സയപച്ചയേന പച്ചയോ. (൩)

പുരേജാതപച്ചയോ

൮൧. നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… വത്ഥും അനിച്ചതോ…പേ… വിപസ്സതി, അസ്സാദേതി അഭിനന്ദതി, തം ആരബ്ഭ നദസ്സനേന പഹാതബ്ബഹേതുകോ രാഗോ ഉപ്പജ്ജതി, ഉദ്ധച്ചം ഉപ്പജ്ജതി, നദസ്സനേന പഹാതബ്ബഹേതുകം ദോമനസ്സം ഉപ്പജ്ജതി; ദിബ്ബേന…പേ…. (സംഖിത്തം. വത്ഥുപുരേജാതം സംഖിത്തം.) (൧)

നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… വത്ഥും അസ്സാദേതി അഭിനന്ദതി, തം ആരബ്ഭ ദസ്സനേന പഹാതബ്ബഹേതുകോ രാഗോ ഉപ്പജ്ജതി, ദിട്ഠി…പേ… വിചികിച്ഛാ…പേ… ദസ്സനേന പഹാതബ്ബഹേതുകം ദോമനസ്സം ഉപ്പജ്ജതി. (വത്ഥുപുരേജാതം സംഖിത്തം.) (൨)

നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ച നദസ്സനേന പഹാതബ്ബഹേതുകസ്സ ച ധമ്മസ്സ പുരേജാതപച്ചയേന പച്ചയോ – ആരമ്മണപുരേജാതം, വത്ഥുപുരേജാതം. ആരമ്മണപുരേജാതം – ചക്ഖും…പേ… വത്ഥും ആരബ്ഭ വിചികിച്ഛാസഹഗതാ ഖന്ധാ ച മോഹോ ച ഉപ്പജ്ജന്തി. (വത്ഥുപുരേജാതം സംഖിത്തം.) (൩)

പച്ഛാജാതാസേവനപച്ചയാ

൮൨. ദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ പച്ഛാജാതപച്ചയേന പച്ചയോ (സംഖിത്തം). നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ പച്ഛാജാതപച്ചയേന പച്ചയോ (സംഖിത്തം). ദസ്സനേന പഹാതബ്ബഹേതുകോ ച നദസ്സനേന പഹാതബ്ബഹേതുകോ ച ധമ്മാ നദസ്സനേന പഹാതബ്ബഹേതുകസ്സ ധമ്മസ്സ പച്ഛാജാതപച്ചയേന പച്ചയോ (സംഖിത്തം)… ആസേവനപച്ചയേന പച്ചയോ.

കമ്മപച്ചയാദി

൮൩. ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ കമ്മപച്ചയേന പച്ചയോ – ദസ്സനേന പഹാതബ്ബഹേതുകാ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ. (മൂലം കാതബ്ബം.) സഹജാതാ, നാനാക്ഖണികാ. സഹജാതാ – ദസ്സനേന പഹാതബ്ബഹേതുകാ ചേതനാ ചിത്തസമുട്ഠാനാനം രൂപാനം കമ്മപച്ചയേന പച്ചയോ. നാനാക്ഖണികാ – ദസ്സനേന പഹാതബ്ബഹേതുകാ ചേതനാ വിപാകാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ച നദസ്സനേന പഹാതബ്ബഹേതുകസ്സ ച ധമ്മസ്സ കമ്മപച്ചയേന പച്ചയോ – ദസ്സനേന പഹാതബ്ബഹേതുകാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ. (൩)

നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – നദസ്സനേന പഹാതബ്ബഹേതുകാ ചേതനാ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – നദസ്സനേന പഹാതബ്ബഹേതുകാ ചേതനാ വിപാകാനം ഖന്ധാനം കടത്താ ച രൂപാനം കമ്മപച്ചയേന പച്ചയോ. (൧)

വിപാകപച്ചയേന പച്ചയോ… ആഹാരപച്ചയേന പച്ചയോ… ഇന്ദ്രിയപച്ചയേന പച്ചയോ… ഝാനപച്ചയേന പച്ചയോ… മഗ്ഗപച്ചയേന പച്ചയോ… സമ്പയുത്തപച്ചയേന പച്ചയോ… ഛ… വിപ്പയുത്തപച്ചയേന പച്ചയോ… പഞ്ച.

അത്ഥിപച്ചയാദി

൮൪. ദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ അത്ഥിപച്ചയേന പച്ചയോ… തീണി.

നദസ്സനേന പഹാതബ്ബഹേതുകോ ധമ്മോ നദസ്സനേന പഹാതബ്ബഹേതുകസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സംഖിത്തം). നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം (സംഖിത്തം). നദസ്സനേന പഹാതബ്ബഹേതുകോ ധമ്മോ ദസ്സനേന പഹാതബ്ബഹേതുകസ്സ ച നദസ്സനേന പഹാതബ്ബഹേതുകസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം (സംഖിത്തം). (൩)

൮൫. ദസ്സനേന പഹാതബ്ബഹേതുകോ ച നദസ്സനേന പഹാതബ്ബഹേതുകോ ച ധമ്മാ ദസ്സനേന പഹാതബ്ബഹേതുകസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം. സഹജാതോ – ദസ്സനേന പഹാതബ്ബഹേതുകോ ഏകോ ഖന്ധോ ച വത്ഥു ച തിണ്ണന്നം ഖന്ധാനം അത്ഥിപച്ചയേന പച്ചയോ…പേ… ദ്വേ ഖന്ധാ ച…പേ… വിചികിച്ഛാസഹഗതോ ഏകോ ഖന്ധോ ച മോഹോ ച തിണ്ണന്നം ഖന്ധാനം അത്ഥിപച്ചയേന പച്ചയോ…പേ… ദ്വേ ഖന്ധാ ച…പേ…. ദസ്സനേന പഹാതബ്ബഹേതുകോ ച നദസ്സനേന പഹാതബ്ബഹേതുകോ ച ധമ്മാ നദസ്സനേന പഹാതബ്ബഹേതുകസ്സ ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം, പച്ഛാജാതം, ആഹാരം, ഇന്ദ്രിയം (സംഖിത്തം). ദസ്സനേന പഹാതബ്ബഹേതുകോ ച നദസ്സനേന പഹാതബ്ബഹേതുകോ ച ധമ്മാ ദസ്സനേന പഹാതബ്ബഹേതുകസ്സ ച നദസ്സനേന പഹാതബ്ബഹേതുകസ്സ ച ധമ്മസ്സ അത്ഥിപച്ചയേന പച്ചയോ – സഹജാതം, പുരേജാതം (സംഖിത്തം). (൩)

നത്ഥിപച്ചയേന പച്ചയോ… വിഗതപച്ചയേന പച്ചയോ… അവിഗതപച്ചയേന പച്ചയോ.