൧-൪. പച്ചയചതുക്കം

ഹേതുപച്ചയോ

൬൪. ദസ്സനേന പഹാതബ്ബഹേതുകം ധമ്മം സംസട്ഠോ ദസ്സനേന പഹാതബ്ബഹേതുകോ ധമ്മോ ഉപ്പജ്ജതി ഹേതുപച്ചയാ – ദസ്സനേന പഹാതബ്ബഹേതുകം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ…. (൧)

നദസ്സനേന പഹാതബ്ബഹേതുകം ധമ്മം സംസട്ഠോ നദസ്സനേന പഹാതബ്ബഹേതുകോ ധമ്മോ ഉപ്പജ്ജതി ഹേതുപച്ചയാ – നദസ്സനേന പഹാതബ്ബഹേതുകം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൧)

നദസ്സനേന പഹാതബ്ബഹേതുകം ധമ്മം സംസട്ഠോ ദസ്സനേന പഹാതബ്ബഹേതുകോ ധമ്മോ ഉപ്പജ്ജതി ഹേതുപച്ചയാ – വിചികിച്ഛാസഹഗതം മോഹം സംസട്ഠാ സമ്പയുത്തകാ ഖന്ധാ. (൨)

ദസ്സനേന പഹാതബ്ബഹേതുകഞ്ച നദസ്സനേന പഹാതബ്ബഹേതുകഞ്ച ധമ്മം സംസട്ഠോ ദസ്സനേന പഹാതബ്ബഹേതുകോ ധമ്മോ ഉപ്പജ്ജതി ഹേതുപച്ചയാ – വിചികിച്ഛാസഹഗതം ഏകം ഖന്ധഞ്ച മോഹഞ്ച സംസട്ഠാ തയോ ഖന്ധാ…പേ… ദ്വേ ഖന്ധേ ച…പേ…. (൧)

ആരമ്മണപച്ചയോ

൬൫. ദസ്സനേന പഹാതബ്ബഹേതുകം ധമ്മം സംസട്ഠോ ദസ്സനേന പഹാതബ്ബഹേതുകോ ധമ്മോ ഉപ്പജ്ജതി ആരമ്മണപച്ചയാ… തീണി (പടിച്ചസദിസാ).

നദസ്സനേന പഹാതബ്ബഹേതുകം ധമ്മം സംസട്ഠോ നദസ്സനേന പഹാതബ്ബഹേതുകോ ധമ്മോ ഉപ്പജ്ജതി ആരമ്മണപച്ചയാ – നദസ്സനേന പഹാതബ്ബഹേതുകം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൧)

നദസ്സനേന പഹാതബ്ബഹേതുകം ധമ്മം സംസട്ഠോ ദസ്സനേന പഹാതബ്ബഹേതുകോ ധമ്മോ ഉപ്പജ്ജതി ആരമ്മണപച്ചയാ (പടിച്ചസദിസം). (൨)

ദസ്സനേന പഹാതബ്ബഹേതുകഞ്ച നദസ്സനേന പഹാതബ്ബഹേതുകഞ്ച ധമ്മം സംസട്ഠോ ദസ്സനേന പഹാതബ്ബഹേതുകോ ധമ്മോ ഉപ്പജ്ജതി ആരമ്മണപച്ചയാ (പടിച്ചസദിസം, സംഖിത്തം). (൧)

൬൬. ഹേതുയാ ചത്താരി, ആരമ്മണേ ഛ, അധിപതിയാ ദ്വേ, അനന്തരേ ഛ (സബ്ബത്ഥ ഛ), വിപാകേ ഏകം…പേ… അവിഗതേ ഛ.

അനുലോമം.

നഹേതുപച്ചയോ

൬൭. ദസ്സനേന പഹാതബ്ബഹേതുകം ധമ്മം സംസട്ഠോ നദസ്സനേന പഹാതബ്ബഹേതുകോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഖന്ധേ സംസട്ഠോ വിചികിച്ഛാസഹഗതോ മോഹോ. (൧)

നദസ്സനേന പഹാതബ്ബഹേതുകം ധമ്മം സംസട്ഠോ നദസ്സനേന പഹാതബ്ബഹേതുകോ ധമ്മോ ഉപ്പജ്ജതി നഹേതുപച്ചയാ – അഹേതുകം നദസ്സനേന പഹാതബ്ബഹേതുകം ഏകം ഖന്ധം സംസട്ഠാ തയോ ഖന്ധാ…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… ഉദ്ധച്ചസഹഗതേ ഖന്ധേ സംസട്ഠോ ഉദ്ധച്ചസഹഗതോ മോഹോ. (൧)

നഹേതുയാ ദ്വേ, നഅധിപതിയാ ഛ, നപുരേജാതേ ഛ, നപച്ഛാജാതേ ഛ, നആസേവനേ ഛ, നകമ്മേ ചത്താരി, നവിപാകേ ഛ, നഝാനേ ഏകം, നമഗ്ഗേ ഏകം, നവിപ്പയുത്തേ ഛ.

പച്ചനീയം.

ഹേതുദുകം

ഹേതുപച്ചയാ നഅധിപതിയാ ചത്താരി, നപുരേജാതേ ചത്താരി…പേ… നവിപ്പയുത്തേ ചത്താരി.

നഹേതുദുകം

നഹേതുപച്ചയാ ആരമ്മണേ ദ്വേ, അനന്തരേ ദ്വേ…പേ… വിപാകേ ഏകം…പേ… അവിഗതേ ദ്വേ.