൧. വിഭങ്ഗവാരോ

ഹേതുപച്ചയോ

൧൦. കിലേസം ധമ്മം പച്ചയാ കിലേസോ ധമ്മോ ഉപ്പജ്ജതി ഹേതുപച്ചയാ… തീണി (പടിച്ചസദിസാ).

നോകിലേസം ധമ്മം പച്ചയാ നോകിലേസോ ധമ്മോ ഉപ്പജ്ജതി ഹേതുപച്ചയാ – നോകിലേസം ഏകം ഖന്ധം പച്ചയാ തയോ ഖന്ധാ…പേ… (യാവ അജ്ഝത്തികാ മഹാഭൂതാ) വത്ഥും പച്ചയാ നോകിലേസാ ഖന്ധാ. (൧)

നോകിലേസം ധമ്മം പച്ചയാ കിലേസോ ധമ്മോ ഉപ്പജ്ജതി ഹേതുപച്ചയാ – നോകിലേസേ ഖന്ധേ പച്ചയാ കിലേസാ, വത്ഥും പച്ചയാ കിലേസാ. (൨)

നോകിലേസം ധമ്മം പച്ചയാ കിലേസോ ച നോകിലേസോ ച ധമ്മാ ഉപ്പജ്ജന്തി ഹേതുപച്ചയാ – നോകിലേസം ഏകം ഖന്ധം പച്ചയാ തയോ ഖന്ധാ കിലേസാ ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… വത്ഥും പച്ചയാ കിലേസാ, മഹാഭൂതേ പച്ചയാ ചിത്തസമുട്ഠാനം രൂപം, വത്ഥും പച്ചയാ കിലേസാ ച സമ്പയുത്തകാ ച ഖന്ധാ. (൩)

൧൧. കിലേസഞ്ച നോകിലേസഞ്ച ധമ്മം പച്ചയാ കിലേസോ ധമ്മോ ഉപ്പജ്ജതി ഹേതുപച്ചയാ – ലോഭഞ്ച സമ്പയുത്തകേ ച ഖന്ധേ പച്ചയാ മോഹോ ദിട്ഠി ഥിനം ഉദ്ധച്ചം അഹിരികം അനോത്തപ്പം (ചക്കം). ലോഭഞ്ച വത്ഥുഞ്ച പച്ചയാ കിലേസാ. (൧)

കിലേസഞ്ച നോകിലേസഞ്ച ധമ്മം പച്ചയാ നോകിലേസോ ധമ്മോ ഉപ്പജ്ജതി ഹേതുപച്ചയാ – നോകിലേസം ഏകം ഖന്ധഞ്ച കിലേസഞ്ച പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ ച…പേ… കിലേസേ ച മഹാഭൂതേ ച പച്ചയാ ചിത്തസമുട്ഠാനം രൂപം, കിലേസേ ച വത്ഥുഞ്ച പച്ചയാ നോകിലേസാ ഖന്ധാ. (൨)

കിലേസഞ്ച നോകിലേസഞ്ച ധമ്മം പച്ചയാ കിലേസോ ച നോകിലേസോ ച ധമ്മാ ഉപ്പജ്ജന്തി ഹേതുപച്ചയാ – നോകിലേസം ഏകം ഖന്ധഞ്ച ലോഭഞ്ച പച്ചയാ തയോ ഖന്ധാ മോഹോ ദിട്ഠി ഥിനം ഉദ്ധച്ചം അഹിരികം അനോത്തപ്പം ചിത്തസമുട്ഠാനഞ്ച രൂപം…പേ… ദ്വേ ഖന്ധേ ച…പേ… (ചക്കം). ലോഭഞ്ച വത്ഥുഞ്ച പച്ചയാ മോഹോ ദിട്ഠി ഥിനം ഉദ്ധച്ചം അഹിരികം അനോത്തപ്പം സമ്പയുത്തകാ ച ഖന്ധാ (ചക്കം). (൩)

(ആരമ്മണപച്ചയേ നോകിലേസമൂലേ പഞ്ച വിഞ്ഞാണാ കാതബ്ബാ.)