൧-൭. പടിച്ചവാരാദി

ഹേതു-ആരമ്മണപച്ചയാ

൧൪. അകുസലം സംകിലിട്ഠം ധമ്മം പടിച്ച അകുസലോ സംകിലിട്ഠോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

ഹേതുയാ ഏകം, ആരമ്മണേ ഏകം…പേ… അവിഗതേ ഏകം (സംഖിത്തം).

(സഹജാതവാരേപി…പേ… പഞ്ഹാവാരേപി സബ്ബത്ഥ ഏകം.)

൧൫. കുസലം അസംകിലിട്ഠം ധമ്മം പടിച്ച കുസലോ അസംകിലിട്ഠോ ധമ്മോ ഉപ്പജ്ജതി ഹേതുപച്ചയാ. കുസലം അസംകിലിട്ഠം ധമ്മം പടിച്ച അബ്യാകതോ അസംകിലിട്ഠോ ധമ്മോ ഉപ്പജ്ജതി ഹേതുപച്ചയാ. കുസലം അസംകിലിട്ഠം ധമ്മം പടിച്ച കുസലോ അസംകിലിട്ഠോ ച അബ്യാകതോ അസംകിലിട്ഠോ ച ധമ്മാ ഉപ്പജ്ജന്തി ഹേതുപച്ചയാ. (൩)

അബ്യാകതം അസംകിലിട്ഠം ധമ്മം പടിച്ച അബ്യാകതോ അസംകിലിട്ഠോ ധമ്മോ ഉപ്പജ്ജതി ഹേതുപച്ചയാ. കുസലം അസംകിലിട്ഠഞ്ച അബ്യാകതം അസംകിലിട്ഠഞ്ച ധമ്മം പടിച്ച അബ്യാകതോ അസംകിലിട്ഠോ ധമ്മോ ഉപ്പജ്ജതി ഹേതുപച്ചയാ. (൨)

൧൬. കുസലം അസംകിലിട്ഠം ധമ്മം പടിച്ച കുസലോ അസംകിലിട്ഠോ ധമ്മോ ഉപ്പജ്ജതി ആരമ്മണപച്ചയാ. (൧)

അബ്യാകതം അസംകിലിട്ഠം ധമ്മം പടിച്ച അബ്യാകതോ അസംകിലിട്ഠോ ധമ്മോ ഉപ്പജ്ജതി ആരമ്മണപച്ചയാ. (൧) (സംഖിത്തം.)

൧൭. ഹേതുയാ പഞ്ച, ആരമ്മണേ ദ്വേ, അധിപതിയാ പഞ്ച…പേ… അവിഗതേ പഞ്ച (സംഖിത്തം. സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം).

൧൮. കുസലോ അസംകിലിട്ഠോ ധമ്മോ കുസലസ്സ അസംകിലിട്ഠസ്സ ധമ്മസ്സ ഹേതുപച്ചയേന പച്ചയോ… തീണി.

അബ്യാകതോ അസംകിലിട്ഠോ ധമ്മോ അബ്യാകതസ്സ അസംകിലിട്ഠസ്സ ധമ്മസ്സ ഹേതുപച്ചയേന പച്ചയോ. (൧)

കുസലോ അസംകിലിട്ഠോ ധമ്മോ കുസലസ്സ അസംകിലിട്ഠസ്സ ധമ്മസ്സ ആരമ്മണപച്ചയേന പച്ചയോ… ദ്വേ.

അബ്യാകതോ അസംകിലിട്ഠോ ധമ്മോ അബ്യാകതസ്സ അസംകിലിട്ഠസ്സ ധമ്മസ്സ ആരമ്മണപച്ചയേന പച്ചയോ… ദ്വേ (സംഖിത്തം).

൧൯. ഹേതുയാ ചത്താരി, ആരമ്മണേ ചത്താരി, അധിപതിയാ പഞ്ച, അനന്തരേ ചത്താരി…പേ… ഉപനിസ്സയേ ചത്താരി…പേ… അവിഗതേ സത്ത (സംഖിത്തം. യഥാ കുസലത്തികേ പഞ്ഹാവാരം, ഏവം വിത്ഥാരേതബ്ബം).