൧-൭. പടിച്ചവാരാദി

പച്ചയചതുക്കം

൨൯. അബ്യാകതം ഉപാദിന്നം ധമ്മം പടിച്ച അബ്യാകതോ ഉപാദിന്നോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

ഹേതുയാ ഏകം, ആരമ്മണേ ഏകം…പേ… അവിഗതേ ഏകം (സംഖിത്തം).

(സഹജാതവാരേപി…പേ… പഞ്ഹാവാരേപി സബ്ബത്ഥ ഏകം.)

൩൦. കുസലം അനുപാദിന്നം ധമ്മം പടിച്ച കുസലോ അനുപാദിന്നോ ധമ്മോ ഉപ്പജ്ജതി ഹേതുപച്ചയാ… തീണി.

അകുസലം അനുപാദിന്നം ധമ്മം പടിച്ച അകുസലോ അനുപാദിന്നോ ധമ്മോ ഉപ്പജ്ജതി ഹേതുപച്ചയാ… തീണി.

അബ്യാകതം അനുപാദിന്നം ധമ്മം പടിച്ച അബ്യാകതോ അനുപാദിന്നോ ധമ്മോ ഉപ്പജ്ജതി ഹേതുപച്ചയാ. (൧)

കുസലം അനുപാദിന്നഞ്ച അബ്യാകതം അനുപാദിന്നഞ്ച ധമ്മം പടിച്ച അബ്യാകതോ അനുപാദിന്നോ ധമ്മോ ഉപ്പജ്ജതി ഹേതുപച്ചയാ. (൧)

അകുസലം അനുപാദിന്നഞ്ച അബ്യാകതം അനുപാദിന്നഞ്ച ധമ്മം പടിച്ച അബ്യാകതോ അനുപാദിന്നോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൩൧. ഹേതുയാ നവ, ആരമ്മണേ തീണി…പേ… അവിഗതേ നവ (സംഖിത്തം. സഹജാതവാരമ്പി…പേ… സമ്പയുത്തവാരമ്പി പടിച്ചവാരസദിസം).

ഹേതു-ആരമ്മണപച്ചയാ

൩൨. കുസലോ അനുപാദിന്നോ ധമ്മോ കുസലസ്സ അനുപാദിന്നസ്സ ധമ്മസ്സ ഹേതുപച്ചയേന പച്ചയോ… തീണി.

അകുസലോ അനുപാദിന്നോ ധമ്മോ അകുസലസ്സ അനുപാദിന്നസ്സ ധമ്മസ്സ ഹേതുപച്ചയേന പച്ചയോ… തീണി.

അബ്യാകതോ അനുപാദിന്നോ ധമ്മോ അബ്യാകതസ്സ അനുപാദിന്നസ്സ ധമ്മസ്സ ഹേതുപച്ചയേന പച്ചയോ. (൧)

൩൩. കുസലോ അനുപാദിന്നോ ധമ്മോ കുസലസ്സ അനുപാദിന്നസ്സ ധമ്മസ്സ ആരമ്മണപച്ചയേന പച്ചയോ… തീണി.

അകുസലോ അനുപാദിന്നോ ധമ്മോ അകുസലസ്സ അനുപാദിന്നസ്സ ധമ്മസ്സ ആരമ്മണപച്ചയേന പച്ചയോ… തീണി.

അബ്യാകതോ അനുപാദിന്നോ ധമ്മോ അബ്യാകതസ്സ അനുപാദിന്നസ്സ ധമ്മസ്സ ആരമ്മണപച്ചയേന പച്ചയോ. അബ്യാകതോ അനുപാദിന്നോ ധമ്മോ കുസലസ്സ അനുപാദിന്നസ്സ ധമ്മസ്സ ആരമ്മണപച്ചയേന പച്ചയോ. അബ്യാകതോ അനുപാദിന്നോ ധമ്മോ അകുസലസ്സ അനുപാദിന്നസ്സ ധമ്മസ്സ ആരമ്മണപച്ചയേന പച്ചയോ… തീണി (സംഖിത്തം).

൩൪. ഹേതുയാ സത്ത, ആരമ്മണേ നവ, അധിപതിയാ ദസ, അനന്തരേ ഛ…പേ… സഹജാതേ നവ, നിസ്സയേ നവ, ഉപനിസ്സയേ നവ…പേ… അവിഗതേ ഏകാദസ (സംഖിത്തം).

കുസലത്തികമഹന്തരദുകം നിട്ഠിതം.

൧-൬൯-൭൪. കുസലത്തിക-ഉപാദാനാദിദുകാനി

൩൫. അകുസലം ഉപാദാനം ധമ്മം പടിച്ച അകുസലോ ഉപാദാനോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

ഹേതുയാ ഏകം, ആരമ്മണേ ഏകം…പേ… അവിഗതേ ഏകം (ഉപാദാനഗോച്ഛകം വിത്ഥാരേതബ്ബം).

കുസലത്തികഉപാദാനഗോച്ഛകം നിട്ഠിതം.