൭. പഞ്ഹാവാരോ

പച്ചയചതുക്കം

൮൦. സവിതക്കസവിചാരോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ ഹേതുപച്ചയേന പച്ചയോ. (൧)

അവിതക്കവിചാരമത്തോ ഹേതു ധമ്മോ അവിതക്കവിചാരമത്തസ്സ ഹേതുസ്സ ധമ്മസ്സ ഹേതുപച്ചയേന പച്ചയോ. (൧)

അവിതക്കഅവിചാരോ ഹേതു ധമ്മോ അവിതക്കഅവിചാരസ്സ ഹേതുസ്സ ധമ്മസ്സ ഹേതുപച്ചയേന പച്ചയോ. (൧)

൮൧. സവിതക്കസവിചാരോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ ആരമ്മണപച്ചയേന പച്ചയോ. സവിതക്കസവിചാരോ ഹേതു ധമ്മോ അവിതക്കഅവിചാരസ്സ ഹേതുസ്സ ധമ്മസ്സ ആരമ്മണപച്ചയേന പച്ചയോ. (൨)

അവിതക്കവിചാരമത്തോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ ആരമ്മണപച്ചയേന പച്ചയോ. അവിതക്കവിചാരമത്തോ ഹേതു ധമ്മോ അവിതക്കഅവിചാരസ്സ ഹേതുസ്സ ധമ്മസ്സ ആരമ്മണപച്ചയേന പച്ചയോ. (൨)

അവിതക്കഅവിചാരോ ഹേതു ധമ്മോ അവിതക്കഅവിചാരസ്സ ഹേതുസ്സ ധമ്മസ്സ ആരമ്മണപച്ചയേന പച്ചയോ. അവിതക്കഅവിചാരോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ ആരമ്മണപച്ചയേന പച്ചയോ. (൨)

൮൨. സവിതക്കസവിചാരോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ അധിപതിപച്ചയേന പച്ചയോ. (൧)

അവിതക്കവിചാരമത്തോ ഹേതു ധമ്മോ അവിതക്കവിചാരമത്തസ്സ ഹേതുസ്സ ധമ്മസ്സ അധിപതിപച്ചയേന പച്ചയോ. അവിതക്കവിചാരമത്തോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ അധിപതിപച്ചയേന പച്ചയോ. (൨)

അവിതക്കഅവിചാരോ ഹേതു ധമ്മോ അവിതക്കഅവിചാരസ്സ ഹേതുസ്സ ധമ്മസ്സ അധിപതിപച്ചയേന പച്ചയോ. അവിതക്കഅവിചാരോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ അധിപതിപച്ചയേന പച്ചയോ. (൨)

൮൩. സവിതക്കസവിചാരോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ അനന്തരപച്ചയേന പച്ചയോ… തീണി.

അവിതക്കവിചാരമത്തോ ഹേതു ധമ്മോ അവിതക്കവിചാരമത്തസ്സ ഹേതുസ്സ ധമ്മസ്സ അനന്തരപച്ചയേന പച്ചയോ … തീണി.

അവിതക്കഅവിചാരോ ഹേതു ധമ്മോ അവിതക്കഅവിചാരസ്സ ഹേതുസ്സ ധമ്മസ്സ അനന്തരപച്ചയേന പച്ചയോ… തീണി…പേ….

സവിതക്കസവിചാരോ ഹേതു ധമ്മോ സവിതക്കസവിചാരസ്സ ഹേതുസ്സ ധമ്മസ്സ ഉപനിസ്സയപച്ചയേന പച്ചയോ… നവ (സംഖിത്തം).

൮൪. ഹേതുയാ തീണി, ആരമ്മണേ ഛ, അധിപതിയാ പഞ്ച, അനന്തരേ നവ, സമനന്തരേ നവ, സഹജാതേ തീണി, അഞ്ഞമഞ്ഞേ തീണി, നിസ്സയേ തീണി, ഉപനിസ്സയേ നവ, ആസേവനേ പഞ്ച, വിപാകേ തീണി…പേ… അവിഗതേ തീണി.

നഹേതുയാ നവ, നആരമ്മണേ നവ (സംഖിത്തം).

ഹേതുപച്ചയാ നആരമ്മണേ തീണി (സംഖിത്തം).

നഹേതുപച്ചയാ ആരമ്മണേ ഛ (സംഖിത്തം).

(യഥാ കുസലത്തികേ പഞ്ഹാവാരം, ഏവം വിത്ഥാരേതബ്ബം.)

നഹേതുപദം.