൧-൭. പടിച്ചവാരാദി

പച്ചയചതുക്കം

൮൫. പരിയാപന്നം കുസലം ധമ്മം പടിച്ച പരിയാപന്നോ കുസലോ ധമ്മോ ഉപ്പജ്ജതി ഹേതുപച്ചയാ. (൧)

അപരിയാപന്നം കുസലം ധമ്മം പടിച്ച അപരിയാപന്നോ കുസലോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൮൬. ഹേതുയാ ദ്വേ, ആരമ്മണേ ദ്വേ…പേ… അവിഗതേ ദ്വേ (സംഖിത്തം. ലോകിയദുകകുസലസദിസം. സഹജാതവാരോപി…പേ… പഞ്ഹാവാരോപി വിത്ഥാരേതബ്ബാ).

൮൭. പരിയാപന്നം അകുസലം ധമ്മം പടിച്ച പരിയാപന്നോ അകുസലോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

ഹേതുയാ ഏകം, ആരമ്മണേ ഏകം…പേ… അവിഗതേ ഏകം (സംഖിത്തം).

(സഹജാതവാരേപി…പേ… പഞ്ഹാവാരേപി സബ്ബത്ഥ ഏകം).

൮൮. പരിയാപന്നം അബ്യാകതം ധമ്മം പടിച്ച പരിയാപന്നോ അബ്യാകതോ ധമ്മോ ഉപ്പജ്ജതി ഹേതുപച്ചയാ. (൧)

അപരിയാപന്നം അബ്യാകതം ധമ്മം പടിച്ച അപരിയാപന്നോ അബ്യാകതോ ധമ്മോ ഉപ്പജ്ജതി ഹേതുപച്ചയാ… തീണി.

പരിയാപന്നം അബ്യാകതഞ്ച അപരിയാപന്നം അബ്യാകതഞ്ച ധമ്മം പടിച്ച പരിയാപന്നോ അബ്യാകതോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൮൯. ഹേതുയാ പഞ്ച, ആരമ്മണേ ദ്വേ…പേ… അവിഗതേ പഞ്ച (സംഖിത്തം. ലോകിയദുകഅബ്യാകതസദിസം. സഹജാതവാരമ്പി…പേ… പഞ്ഹാവാരമ്പി സബ്ബത്ഥ വിത്ഥാരേതബ്ബം).