൧-൭. പടിച്ചവാരാദി

പച്ചയചതുക്കം

ഹേതുപച്ചയോ

൫൯. ചിത്താനുപരിവത്തിം കുസലം ധമ്മം പടിച്ച ചിത്താനുപരിവത്തീ കുസലോ ധമ്മോ ഉപ്പജ്ജതി ഹേതുപച്ചയാ… തീണി.

നോചിത്താനുപരിവത്തിം കുസലം ധമ്മം പടിച്ച ചിത്താനുപരിവത്തീ കുസലോ ധമ്മോ ഉപ്പജ്ജതി ഹേതുപച്ചയാ. (൧)

ചിത്താനുപരിവത്തിം കുസലഞ്ച നോചിത്താനുപരിവത്തിം കുസലഞ്ച ധമ്മം പടിച്ച ചിത്താനുപരിവത്തീ കുസലോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൬൦. ഹേതുയാ പഞ്ച, ആരമ്മണേ പഞ്ച…പേ… അവിഗതേ പഞ്ച (സംഖിത്തം).

(സഹജാതവാരമ്പി…പേ… പഞ്ഹാവാരമ്പി വിത്ഥാരേതബ്ബം.)

൬൧. ചിത്താനുപരിവത്തിം അകുസലം ധമ്മം പടിച്ച ചിത്താനുപരിവത്തീ അകുസലോ ധമ്മോ ഉപ്പജ്ജതി ഹേതുപച്ചയാ… തീണി.

നോചിത്താനുപരിവത്തിം അകുസലം ധമ്മം പടിച്ച ചിത്താനുപരിവത്തീ അകുസലോ ധമ്മോ ഉപ്പജ്ജതി ഹേതുപച്ചയാ. (൧)

ചിത്താനുപരിവത്തിം അകുസലഞ്ച നോചിത്താനുപരിവത്തിം അകുസലഞ്ച ധമ്മം പടിച്ച ചിത്താനുപരിവത്തീ അകുസലോ ധമ്മോ ഉപ്പജ്ജതി ഹേതുപച്ചയാ. (൧) (സംഖിത്തം.)

൬൨. ഹേതുയാ പഞ്ച, ആരമ്മണേ പഞ്ച…പേ… അവിഗതേ പഞ്ച (സംഖിത്തം).

(സഹജാതവാരമ്പി…പേ… പഞ്ഹാവാരമ്പി വിത്ഥാരേതബ്ബം.)

൬൩. ചിത്താനുപരിവത്തിം അബ്യാകതം ധമ്മം പടിച്ച ചിത്താനുപരിവത്തീ അബ്യാകതോ ധമ്മോ ഉപ്പജ്ജതി ഹേതുപച്ചയാ (സംഖിത്തം).

൬൪. ഹേതുയാ നവ, ആരമ്മണേ നവ…പേ… അവിഗതേ നവ (സംഖിത്തം. ചേതസികദുകസദിസം. സഹജാതവാരമ്പി…പേ… പഞ്ഹാവാരമ്പി വിത്ഥാരേതബ്ബം.)