൧. വിഭങ്ഗവാരോ

ഹേതുപച്ചയോ

൮൭. പരാമട്ഠോ ചേവ നോ ച പരാമാസോ ധമ്മോ പരാമട്ഠസ്സ ചേവ നോ ച പരാമാസസ്സ ധമ്മസ്സ ഹേതുപച്ചയേന പച്ചയോ – പരാമട്ഠാ ചേവ നോ ച പരാമാസാ ഹേതൂ സമ്പയുത്തകാനം ഖന്ധാനം ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൧)

പരാമട്ഠോ ചേവ നോ ച പരാമാസോ ധമ്മോ പരാമാസസ്സ ചേവ പരാമട്ഠസ്സ ച ധമ്മസ്സ ഹേതുപച്ചയേന പച്ചയോ – പരാമട്ഠാ ചേവ നോ ച പരാമാസാ ഹേതൂ പരാമാസസ്സ ഹേതുപച്ചയേന പച്ചയോ. (൨)

പരാമട്ഠോ ചേവ നോ ച പരാമാസോ ധമ്മോ പരാമാസസ്സ ചേവ പരാമട്ഠസ്സ ച പരാമട്ഠസ്സ ചേവ നോ ച പരാമാസസ്സ ച ധമ്മസ്സ ഹേതുപച്ചയേന പച്ചയോ – പരാമട്ഠാ ചേവ നോ ച പരാമാസാ ഹേതൂ സമ്പയുത്തകാനം ഖന്ധാനം പരാമാസസ്സ ച ചിത്തസമുട്ഠാനാനഞ്ച രൂപാനം ഹേതുപച്ചയേന പച്ചയോ. (൩)

ആരമ്മണപച്ചയോ

൮൮. പരാമാസോ ചേവ പരാമട്ഠോ ച ധമ്മോ പരാമാസസ്സ ചേവ പരാമട്ഠസ്സ ച ധമ്മസ്സ ആരമ്മണപച്ചയേന പച്ചയോ… തീണി (ആരബ്ഭ കാതബ്ബാനി പരാമാസദുകസദിസം).

൮൯. പരാമട്ഠോ ചേവ നോ ച പരാമാസോ ധമ്മോ പരാമട്ഠസ്സ ചേവ നോ ച പരാമാസസ്സ ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം കത്വാ തം പച്ചവേക്ഖതി, അസ്സാദേതി അഭിനന്ദതി, തം ആരബ്ഭ രാഗോ…പേ… വിചികിച്ഛാ, ഉദ്ധച്ചം, ദോമനസ്സം ഉപ്പജ്ജതി, പുബ്ബേ…പേ… ഝാനാ…പേ… അരിയാ ഗോത്രഭും പച്ചവേക്ഖന്തി, വോദാനം പച്ചവേക്ഖന്തി, പഹീനേ കിലേസേ…പേ… വിക്ഖമ്ഭിതേ കിലേസേ…പേ… പുബ്ബേ…പേ… ചക്ഖും…പേ… വത്ഥും പരാമട്ഠേ ചേവ നോ ച പരാമാസേ ഖന്ധേ അനിച്ചതോ…പേ… ദോമനസ്സം ഉപ്പജ്ജതി. ദിബ്ബേന ചക്ഖുനാ രൂപം പസ്സതി (യാവ ആവജ്ജനാ സബ്ബം കാതബ്ബം). (൧)

പരാമട്ഠോ ചേവ നോ ച പരാമാസോ ധമ്മോ പരാമാസസ്സ ചേവ പരാമട്ഠസ്സ ച ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം…പേ… പുബ്ബേ…പേ… ഝാനാ…പേ… ചക്ഖും…പേ… വത്ഥും പരാമട്ഠേ ചേവ നോ ച പരാമാസേ ഖന്ധേ അസ്സാദേതി അഭിനന്ദതി, തം ആരബ്ഭ ദിട്ഠി ഉപ്പജ്ജതി. (൨)

പരാമട്ഠോ ചേവ നോ ച പരാമാസോ ധമ്മോ പരാമാസസ്സ ചേവ പരാമട്ഠസ്സ ച പരാമട്ഠസ്സ ചേവ നോ ച പരാമാസസ്സ ച ധമ്മസ്സ ആരമ്മണപച്ചയേന പച്ചയോ – ദാനം…പേ… സീലം…പേ… ഉപോസഥകമ്മം…പേ… പുബ്ബേ…പേ… ഝാനാ…പേ… ചക്ഖും…പേ… വത്ഥും പരാമട്ഠേ ചേവ നോ ച പരാമാസേ ഖന്ധേ അസ്സാദേതി അഭിനന്ദതി, തം ആരബ്ഭ പരാമാസോ ച സമ്പയുത്തകാ ച ഖന്ധാ ഉപ്പജ്ജന്തി. (൩)

(ഏവം ഇതരേപി തീണി ആരബ്ഭ കാതബ്ബാനി. ഇമം ദുകം പരാമാസദുകസദിസം. ലോകുത്തരം യഹിം ന ലബ്ഭതി തഹിം ന കാതബ്ബം.)

പരാമാസപരാമട്ഠദുകം നിട്ഠിതം.