൧. വിഭങ്ഗവാരോ

ഹേതുപച്ചയോ

൧൦൯. ആസവഞ്ചേവ സാസവഞ്ച ധമ്മം പടിച്ച ആസവോ ചേവ സാസവോ ച ധമ്മോ ഉപ്പജ്ജതി ഹേതുപച്ചയാ – കാമാസവം പടിച്ച ദിട്ഠാസവോ അവിജ്ജാസവോ (ചക്കം ബന്ധിതബ്ബം) ഭവാസവം പടിച്ച അവിജ്ജാസവോ (ചക്കം ബന്ധിതബ്ബം) ദിട്ഠാസവം പടിച്ച അവിജ്ജാസവോ. (൧)

ആസവഞ്ചേവ സാസവഞ്ച ധമ്മം പടിച്ച സാസവോ ചേവ നോ ച ആസവോ ധമ്മോ ഉപ്പജ്ജതി ഹേതുപച്ചയാ – ആസവേ പടിച്ച സമ്പയുത്തകാ ഖന്ധാ ചിത്തസമുട്ഠാനഞ്ച രൂപം. (൨)

ആസവഞ്ചേവ സാസവഞ്ച ധമ്മം പടിച്ച ആസവോ ചേവ സാസവോ ച സാസവോ ചേവ നോ ച ആസവോ ച ധമ്മാ ഉപ്പജ്ജന്തി ഹേതുപച്ചയാ – കാമാസവം പടിച്ച ദിട്ഠാസവോ അവിജ്ജാസവോ സമ്പയുത്തകാ ഖന്ധാ ചിത്തസമുട്ഠാനഞ്ച രൂപം, ഭവാസവം (ചക്കം ബന്ധിതബ്ബം). (൩)

൧൧൦. സാസവഞ്ചേവ നോ ച ആസവം ധമ്മം പടിച്ച സാസവോ ചേവ നോ ച ആസവോ ധമ്മോ ഉപ്പജ്ജതി ഹേതുപച്ചയാ – സാസവഞ്ചേവ നോ ച ആസവം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… പടിസന്ധിക്ഖണേ…പേ… ഖന്ധേ പടിച്ച വത്ഥു, വത്ഥും പടിച്ച ഖന്ധാ, ഏകം മഹാഭൂതം…പേ…. (൧)

സാസവഞ്ചേവ നോ ച ആസവം ധമ്മം പടിച്ച ആസവോ ചേവ സാസവോ ച ധമ്മോ ഉപ്പജ്ജതി ഹേതുപച്ചയാ – സാസവേ ചേവ നോ ച ആസവേ ഖന്ധേ പടിച്ച ആസവാ. (൨)

സാസവഞ്ചേവ നോ ച ആസവം ധമ്മം പടിച്ച ആസവോ ചേവ സാസവോ ച സാസവോ ചേവ നോ ച ആസവോ ച ധമ്മാ ഉപ്പജ്ജന്തി ഹേതുപച്ചയാ – സാസവഞ്ചേവ നോ ച ആസവം ഏകം ഖന്ധം പടിച്ച തയോ ഖന്ധാ ആസവാ ച ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ…. (൩)

൧൧൧. ആസവഞ്ചേവ സാസവഞ്ച സാസവഞ്ചേവ നോ ച ആസവഞ്ച ധമ്മം പടിച്ച ആസവോ ചേവ സാസവോ ച ധമ്മോ ഉപ്പജ്ജതി ഹേതുപച്ചയാ – കാമാസവഞ്ച സമ്പയുത്തകേ ച ഖന്ധേ പടിച്ച ദിട്ഠാസവോ അവിജ്ജാസവോ (ഏവം ചക്കം ബന്ധിതബ്ബം). (൧)

ആസവഞ്ചേവ സാസവഞ്ച സാസവഞ്ചേവ നോ ച ആസവഞ്ച ധമ്മം പടിച്ച സാസവോ ചേവ നോ ച ആസവോ ധമ്മോ ഉപ്പജ്ജതി ഹേതുപച്ചയാ – സാസവഞ്ചേവ നോ ച ആസവം ഏകം ഖന്ധഞ്ച ആസവേ ച പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ ച…പേ…. (൨)

ആസവഞ്ചേവ സാസവഞ്ച സാസവഞ്ചേവ നോ ച ആസവഞ്ച ധമ്മം പടിച്ച ആസവോ ചേവ സാസവോ ച സാസവോ ചേവ നോ ച ആസവോ ച ധമ്മാ ഉപ്പജ്ജന്തി ഹേതുപച്ചയാ – സാസവഞ്ചേവ നോ ച ആസവം ഏകം ഖന്ധഞ്ച കാമാസവഞ്ച പടിച്ച തയോ ഖന്ധാ ദിട്ഠാസവോ അവിജ്ജാസവോ ചിത്തസമുട്ഠാനഞ്ച രൂപം…പേ… ദ്വേ ഖന്ധേ ച…പേ… (ചക്കം. സംഖിത്തം). (൩)