൧. വിഭങ്ഗവാരോ

ഹേതുപച്ചയോ

൬൬. ആസവസമ്പയുത്തം ധമ്മം പച്ചയാ ആസവസമ്പയുത്തോ ധമ്മോ ഉപ്പജ്ജതി ഹേതുപച്ചയാ… തീണി (പടിച്ചവാരസദിസോ).

ആസവവിപ്പയുത്തം ധമ്മം പച്ചയാ ആസവവിപ്പയുത്തോ ധമ്മോ ഉപ്പജ്ജതി ഹേതുപച്ചയാ – ആസവവിപ്പയുത്തം ഏകം ഖന്ധം പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം മോഹം പച്ചയാ ചിത്തസമുട്ഠാനം രൂപം; പടിസന്ധിക്ഖണേ…പേ… ഖന്ധേ പച്ചയാ വത്ഥു, വത്ഥും പച്ചയാ ഖന്ധാ, ഏകം മഹാഭൂതം…പേ… മഹാഭൂതേ പച്ചയാ ചിത്തസമുട്ഠാനം രൂപം, കടത്താരൂപം, ഉപാദാരൂപം. വത്ഥും പച്ചയാ ആസവവിപ്പയുത്താ ഖന്ധാ, വത്ഥും പച്ചയാ ദോമനസ്സസഹഗതോ മോഹോ. (൧)

ആസവവിപ്പയുത്തം ധമ്മം പച്ചയാ ആസവസമ്പയുത്തോ ധമ്മോ ഉപ്പജ്ജതി ഹേതുപച്ചയാ – വത്ഥും പച്ചയാ ആസവസമ്പയുത്തകാ ഖന്ധാ, ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം മോഹം പച്ചയാ സമ്പയുത്തകാ ഖന്ധാ. (൨)

ആസവവിപ്പയുത്തം ധമ്മം പച്ചയാ ആസവസമ്പയുത്തോ ച ആസവവിപ്പയുത്തോ ച ധമ്മാ ഉപ്പജ്ജന്തി ഹേതുപച്ചയാ – വത്ഥും പച്ചയാ ആസവസമ്പയുത്തകാ ഖന്ധാ, മഹാഭൂതേ പച്ചയാ ചിത്തസമുട്ഠാനം രൂപം, ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം മോഹം പച്ചയാ സമ്പയുത്തകാ ഖന്ധാ ചിത്തസമുട്ഠാനഞ്ച രൂപം, വത്ഥും പച്ചയാ ദോമനസ്സസഹഗതാ ഖന്ധാ ച മോഹോ ച. (൩)

൬൭. ആസവസമ്പയുത്തഞ്ച ആസവവിപ്പയുത്തഞ്ച ധമ്മം പച്ചയാ ആസവസമ്പയുത്തോ ധമ്മോ ഉപ്പജ്ജതി ഹേതുപച്ചയാ – ആസവസമ്പയുത്തം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ… ദ്വേ ഖന്ധേ ച…പേ… ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം ഏകം ഖന്ധഞ്ച മോഹഞ്ച പച്ചയാ തയോ ഖന്ധാ…പേ… ദ്വേ ഖന്ധേ ച…പേ…. (൧)

ആസവസമ്പയുത്തഞ്ച ആസവവിപ്പയുത്തഞ്ച ധമ്മം പച്ചയാ ആസവവിപ്പയുത്തോ ധമ്മോ ഉപ്പജ്ജതി ഹേതുപച്ചയാ – ആസവസമ്പയുത്തേ ഖന്ധേ ച മഹാഭൂതേ ച പച്ചയാ ചിത്തസമുട്ഠാനം രൂപം, ദോമനസ്സസഹഗതേ വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച മോഹഞ്ച പച്ചയാ ചിത്തസമുട്ഠാനം രൂപം, ദോമനസ്സസഹഗതേ ഖന്ധേ ച വത്ഥുഞ്ച പച്ചയാ ദോമനസ്സസഹഗതോ മോഹോ. (൨)

ആസവസമ്പയുത്തഞ്ച ആസവവിപ്പയുത്തഞ്ച ധമ്മം പച്ചയാ ആസവസമ്പയുത്തോ ച ആസവവിപ്പയുത്തോ ച ധമ്മാ ഉപ്പജ്ജന്തി ഹേതുപച്ചയാ – ആസവസമ്പയുത്തം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ… ദ്വേ ഖന്ധേ…പേ… ആസവസമ്പയുത്തേ ഖന്ധേ ച മഹാഭൂതേ ച പച്ചയാ ചിത്തസമുട്ഠാനം രൂപം, ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം ഏകം ഖന്ധഞ്ച മോഹഞ്ച പച്ചയാ തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… ദോമനസ്സസഹഗതം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ മോഹോ ച…പേ… ദ്വേ ഖന്ധേ…പേ…. (൩)

ആരമ്മണപച്ചയാദി

൬൮. ആസവസമ്പയുത്തം ധമ്മം പച്ചയാ ആസവസമ്പയുത്തോ ധമ്മോ ഉപ്പജ്ജതി ആരമ്മണപച്ചയാ… തീണി (പടിച്ചവാരസദിസാ).

ആസവവിപ്പയുത്തം ധമ്മം പച്ചയാ ആസവവിപ്പയുത്തോ ധമ്മോ ഉപ്പജ്ജതി ആരമ്മണപച്ചയാ – ആസവവിപ്പയുത്തം ഏകം ഖന്ധം പച്ചയാ തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ… വത്ഥും പച്ചയാ ഖന്ധാ, ചക്ഖായതനം പച്ചയാ ചക്ഖുവിഞ്ഞാണം…പേ… കായായതനം പച്ചയാ കായവിഞ്ഞാണം, വത്ഥും പച്ചയാ ആസവവിപ്പയുത്താ ഖന്ധാ, വത്ഥും പച്ചയാ ദോമനസ്സസഹഗതോ വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

ആസവവിപ്പയുത്തം ധമ്മം പച്ചയാ ആസവസമ്പയുത്തോ ധമ്മോ ഉപ്പജ്ജതി ആരമ്മണപച്ചയാ – വത്ഥും പച്ചയാ ആസവസമ്പയുത്തകാ ഖന്ധാ, ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം മോഹം പച്ചയാ സമ്പയുത്തകാ ഖന്ധാ. (൨)

ആസവവിപ്പയുത്തം ധമ്മം പച്ചയാ ആസവസമ്പയുത്തോ ച ആസവവിപ്പയുത്തോ ച ധമ്മാ ഉപ്പജ്ജന്തി ആരമ്മണപച്ചയാ – വത്ഥും പച്ചയാ ദോമനസ്സസഹഗതാ വിചികിച്ഛാസഹഗതാ ഉദ്ധച്ചസഹഗതാ ഖന്ധാ മോഹോ ച. (൩)

൬൯. ആസവസമ്പയുത്തഞ്ച ആസവവിപ്പയുത്തഞ്ച ധമ്മം പച്ചയാ ആസവസമ്പയുത്തോ ധമ്മോ ഉപ്പജ്ജതി ആരമ്മണപച്ചയാ – ആസവസമ്പയുത്തം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ…പേ… ദ്വേ ഖന്ധേ…പേ…. (൧)

ആസവസമ്പയുത്തഞ്ച ആസവവിപ്പയുത്തഞ്ച ധമ്മം പച്ചയാ ആസവവിപ്പയുത്തോ ധമ്മോ ഉപ്പജ്ജതി ആരമ്മണപച്ചയാ – ദോമനസ്സസഹഗതേ വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച വത്ഥുഞ്ച പച്ചയാ ദോമനസ്സസഹഗതോ വിചികിച്ഛാസഹഗതോ ഉദ്ധച്ചസഹഗതോ മോഹോ. (൨)

ആസവസമ്പയുത്തഞ്ച ആസവവിപ്പയുത്തഞ്ച ധമ്മം പച്ചയാ ആസവസമ്പയുത്തോ ച ആസവവിപ്പയുത്തോ ച ധമ്മാ ഉപ്പജ്ജന്തി ആരമ്മണപച്ചയാ – ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം ഏകം ഖന്ധഞ്ച വത്ഥുഞ്ച പച്ചയാ തയോ ഖന്ധാ മോഹോ ച…പേ… ദ്വേ ഖന്ധേ…പേ… അധിപതിപച്ചയാ… അനന്തരപച്ചയാ…പേ… അവിഗതപച്ചയാ. (൩)