൧. വിഭങ്ഗവാരോ

നഹേതുപച്ചയോ

൫൬. ആസവസമ്പയുത്തം ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നഹേതുപച്ചയാ – വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ. (൧)

ആസവവിപ്പയുത്തം ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നഹേതുപച്ചയാ – അഹേതുകം ആസവവിപ്പയുത്തം ഏകം ഖന്ധം പടിച്ച തയോ ഖന്ധാ ചിത്തസമുട്ഠാനഞ്ച രൂപം…പേ… ദ്വേ ഖന്ധേ…പേ… അഹേതുകപടിസന്ധിക്ഖണേ…പേ… (യാവ ആസഞ്ഞസത്താ). (൧)

നആരമ്മണപച്ചയോ

൫൭. ആസവസമ്പയുത്തം ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നആരമ്മണപച്ചയാ – ആസവസമ്പയുത്തേ ഖന്ധേ പടിച്ച ചിത്തസമുട്ഠാനം രൂപം. (൧)

ആസവവിപ്പയുത്തം ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നആരമ്മണപച്ചയാ – ആസവവിപ്പയുത്തേ ഖന്ധേ പടിച്ച ചിത്തസമുട്ഠാനം രൂപം, ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം മോഹം പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… ഖന്ധേ പടിച്ച വത്ഥു, ഏകം മഹാഭൂതം…പേ… (യാവ അസഞ്ഞസത്താ). (൧)

ആസവസമ്പയുത്തഞ്ച ആസവവിപ്പയുത്തഞ്ച ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നആരമ്മണപച്ചയാ – ആസവസമ്പയുത്തേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം, ദോമനസ്സസഹഗതേ വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച മോഹഞ്ച പടിച്ച ചിത്തസമുട്ഠാനം രൂപം. (൧)

നഅധിപതിപച്ചയോ

൫൮. ആസവസമ്പയുത്തം ധമ്മം പടിച്ച ആസവസമ്പയുത്തോ ധമ്മോ ഉപ്പജ്ജതി നഅധിപതിപച്ചയാ (സംഖിത്തം).

നപുരേജാതപച്ചയാദി

൫൯. ആസവസമ്പയുത്തം ധമ്മം പടിച്ച ആസവസമ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ ആസവസമ്പയുത്തം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ…. (൧)

ആസവസമ്പയുത്തം ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ വിചികിച്ഛാസഹഗതേ ഉദ്ധച്ചസഹഗതേ ഖന്ധേ പടിച്ച വിചികിച്ഛാസഹഗതോ ഉദ്ധച്ചസഹഗതോ മോഹോ, ആസവസമ്പയുത്തേ ഖന്ധേ പടിച്ച ചിത്തസമുട്ഠാനം രൂപം. (൨)

ആസവസമ്പയുത്തം ധമ്മം പടിച്ച ആസവസമ്പയുത്തോ ച ആസവവിപ്പയുത്തോ ച ധമ്മാ ഉപ്പജ്ജന്തി നപുരേജാതപച്ചയാ – അരൂപേ വിചികിച്ഛാസഹഗതം ഉദ്ധച്ചസഹഗതം ഏകം ഖന്ധം പടിച്ച തയോ ഖന്ധാ മോഹോ ച…പേ… ദ്വേ ഖന്ധേ…പേ…. (൩)

൬൦. ആസവവിപ്പയുത്തം ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ ആസവവിപ്പയുത്തം ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… ആസവവിപ്പയുത്തേ ഖന്ധേ പടിച്ച ചിത്തസമുട്ഠാനം രൂപം, ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം മോഹം പടിച്ച ചിത്തസമുട്ഠാനം രൂപം; പടിസന്ധിക്ഖണേ…പേ… (യാവ അസഞ്ഞസത്താ). (൧)

ആസവവിപ്പയുത്തം ധമ്മം പടിച്ച ആസവസമ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ വിചികിച്ഛാസഹഗതം ഉദ്ധച്ചസഹഗതം മോഹം പടിച്ച സമ്പയുത്തകാ ഖന്ധാ. (൨)

൬൧. ആസവസമ്പയുത്തഞ്ച ആസവവിപ്പയുത്തഞ്ച ധമ്മം പടിച്ച ആസവസമ്പയുത്തോ ധമ്മോ ഉപ്പജ്ജതി നപുരേജാതപച്ചയാ – അരൂപേ വിചികിച്ഛാസഹഗതം ഉദ്ധച്ചസഹഗതം ഏകം ഖന്ധഞ്ച മോഹഞ്ച പടിച്ച തയോ ഖന്ധാ…പേ… ദ്വേ ഖന്ധേ ച…പേ…. (൧)

ആസവസമ്പയുത്തഞ്ച ആസവവിപ്പയുത്തഞ്ച ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നപുരേജാതപച്ചയാ – ആസവസമ്പയുത്തേ ഖന്ധേ ച മഹാഭൂതേ ച പടിച്ച ചിത്തസമുട്ഠാനം രൂപം, ദോമനസ്സസഹഗതേ വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച മോഹഞ്ച പടിച്ച ചിത്തസമുട്ഠാനം രൂപം. (൨)

(നപച്ഛാജാതപച്ചയാ നവ, നആസേവനപച്ചയാ നവ.)

നകമ്മപച്ചയാദി

൬൨. ആസവസമ്പയുത്തം ധമ്മം പടിച്ച ആസവസമ്പയുത്തോ ധമ്മോ ഉപ്പജ്ജതി നകമ്മപച്ചയാ – ആസവസമ്പയുത്തേ ഖന്ധേ പടിച്ച സമ്പയുത്തകാ ചേതനാ. (൧)

ആസവവിപ്പയുത്തം ധമ്മം പടിച്ച ആസവവിപ്പയുത്തോ ധമ്മോ ഉപ്പജ്ജതി നകമ്മപച്ചയാ – ആസവവിപ്പയുത്തേ ഖന്ധേ പടിച്ച വിപ്പയുത്തകാ ചേതനാ. (൧)

ആസവവിപ്പയുത്തം ധമ്മം പടിച്ച ആസവസമ്പയുത്തോ ധമ്മോ ഉപ്പജ്ജതി നകമ്മപച്ചയാ – ദോമനസ്സസഹഗതം വിചികിച്ഛാസഹഗതം ഉദ്ധച്ചസഹഗതം മോഹം പടിച്ച സമ്പയുത്തകാ ചേതനാ. (൨)

ആസവസമ്പയുത്തഞ്ച ആസവവിപ്പയുത്തഞ്ച ധമ്മം പടിച്ച ആസവസമ്പയുത്തോ ധമ്മോ ഉപ്പജ്ജതി നകമ്മപച്ചയാ – ദോമനസ്സസഹഗതേ വിചികിച്ഛാസഹഗതേ ഉദ്ധച്ചസഹഗതേ ഖന്ധേ ച മോഹഞ്ച പടിച്ച സമ്പയുത്തകാ ചേതനാ… നവിപാകപച്ചയാ… നആഹാരപച്ചയാ… നഇന്ദ്രിയപച്ചയാ… നഝാനപച്ചയാ… നമഗ്ഗപച്ചയാ… നസമ്പയുത്തപച്ചയാ… നവിപ്പയുത്തപച്ചയാ… നോനത്ഥിപച്ചയാ… നോവിഗതപച്ചയാ.