൧. വിഭങ്ഗവാരോ

ഹേതുപച്ചയോ

൧൩൬. ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ ഹേതുപച്ചയേന പച്ചയോ – അലോഭോ അദോസസ്സ അമോഹസ്സ ഹേതുപച്ചയേന പച്ചയോ (യഥാ പടിച്ചവാരസദിസം). (൧)

ഹേതു ചേവ സഹേതുകോ ച ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ ഹേതുപച്ചയേന പച്ചയോ – ഹേതൂ സമ്പയുത്തകാനം ഖന്ധാനം ഹേതുപച്ചയേന പച്ചയോ; പടിസന്ധിക്ഖണേ…പേ…. (൨)

ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ ഹേതുപച്ചയേന പച്ചയോ – അലോഭോ അദോസസ്സ അമോഹസ്സ സമ്പയുത്തകാനഞ്ച ഖന്ധാനം ഹേതുപച്ചയേന പച്ചയോ (വിത്ഥാരേതബ്ബം). (൩)

ആരമ്മണപച്ചയോ

൧൩൭. ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ ആരമ്മണപച്ചയേന പച്ചയോ – ഹേതും ആരബ്ഭ ഹേതൂ ഉപ്പജ്ജന്തി. (൧)

ഹേതു ചേവ സഹേതുകോ ച ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ ആരമ്മണപച്ചയേന പച്ചയോ – ഹേതും ആരബ്ഭ സഹേതുകാ ചേവ ന ച ഹേതൂ ഖന്ധാ ഉപ്പജ്ജന്തി. (൨)

ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ ആരമ്മണപച്ചയേന പച്ചയോ – ഹേതും ആരബ്ഭ ഹേതൂ ച സമ്പയുത്തകാ ച ഖന്ധാ ഉപ്പജ്ജന്തി. (൩)

സഹേതുകോ ചേവ ന ച ഹേതു ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ ആരമ്മണപച്ചയേന പച്ചയോ – ദാനം ദത്വാ സീലം…പേ… ഉപോസഥകമ്മം കത്വാ തം പച്ചവേക്ഖതി, പുബ്ബേ സുചിണ്ണാനി പച്ചവേക്ഖതി. ഝാനാ വുട്ഠഹിത്വാ…പേ… അരിയാ മഗ്ഗാ വുട്ഠഹിത്വാ മഗ്ഗം പച്ചവേക്ഖന്തി, ഫലം പച്ചവേക്ഖന്തി. പഹീനേ കിലേസേ…പേ… വിക്ഖമ്ഭിതേ കിലേസേ പച്ചവേക്ഖന്തി, പുബ്ബേ സമുദാചിണ്ണേ കിലേസേ ജാനന്തി. സഹേതുകേ ചേവ ന ച ഹേതൂ ഖന്ധേ അനിച്ചതോ…പേ… ദോമനസ്സം ഉപ്പജ്ജതി. ചേതോപരിയഞാണേന സഹേതുകാ ചേവ ന ച ഹേതുചിത്തസമങ്ഗിസ്സ ചിത്തം ജാനാതി; ആകാസാനഞ്ചായതനം വിഞ്ഞാണഞ്ചായതനസ്സ…പേ… ആകിഞ്ചഞ്ഞായതനം നേവസഞ്ഞാനാസഞ്ഞായതനസ്സ…പേ… സഹേതുകാ ചേവ ന ച ഹേതൂ ഖന്ധാ ഇദ്ധിവിധഞാണസ്സ, ചേതോപരിയഞാണസ്സ, പുബ്ബേനിവാസാനുസ്സതിഞാണസ്സ, യഥാകമ്മൂപഗഞാണസ്സ, അനാഗതംസഞാണസ്സ ആരമ്മണപച്ചയേന പച്ചയോ. (൧)

സഹേതുകോ ചേവ ന ച ഹേതു ധമ്മോ ഹേതുസ്സ ചേവ സഹേതുകസ്സ ച ധമ്മസ്സ ആരമ്മണപച്ചയേന പച്ചയോ – ദാനം ദത്വാ… (യഥാ പഠമഗമനം ഏവം നിന്നാനം). (൨)

സഹേതുകോ ചേവ ന ച ഹേതു ധമ്മോ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ ആരമ്മണപച്ചയേന പച്ചയോ – ദാനം ദത്വാ… (യഥാ പഠമഗമനം ഏവം നിന്നാനം). (൩)

൧൩൮. ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഹേതുസ്സ ചേവ സഹേതുകസ്സ ച ധമ്മസ്സ ആരമ്മണപച്ചയേന പച്ചയോ – ഹേതുഞ്ച സമ്പയുത്തകേ ച ഖന്ധേ ആരബ്ഭ ഹേതൂ ഉപ്പജ്ജന്തി. (൧)

ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ സഹേതുകസ്സ ചേവ ന ച ഹേതുസ്സ ധമ്മസ്സ ആരമ്മണപച്ചയേന പച്ചയോ – ഹേതുഞ്ച സമ്പയുത്തകേ ച ഖന്ധേ ആരബ്ഭ സഹേതുകാ ചേവ ന ച ഹേതൂ ഖന്ധാ ഉപ്പജ്ജന്തി. (൨)

ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ ആരമ്മണപച്ചയേന പച്ചയോ – ഹേതുഞ്ച സമ്പയുത്തകേ ച ഖന്ധേ ആരബ്ഭ ഹേതൂ ച സമ്പയുത്തകാ ച ഖന്ധാ ഉപ്പജ്ജന്തി. (൩)

അധിപതിപച്ചയോ

൧൩൯. ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ഹേതും ഗരും കത്വാ ഹേതൂ ഉപ്പജ്ജന്തി. സഹജാതാധിപതി – ഹേതു ചേവ സഹേതുകാധിപതി സമ്പയുത്തകാനം ഹേതൂനം അധിപതിപച്ചയേന പച്ചയോ. (൧)

ഹേതു ചേവ സഹേതുകോ ച ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ഹേതും ഗരും കത്വാ സഹേതുകാ ചേവ ന ച ഹേതൂ ഖന്ധാ ഉപ്പജ്ജന്തി. സഹജാതാധിപതി – ഹേതു ചേവ സഹേതുകാധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൨)

ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ഹേതും ഗരും കത്വാ ഹേതൂ ച സമ്പയുത്തകാ ച ഖന്ധാ ഉപ്പജ്ജന്തി. സഹജാതാധിപതി – ഹേതു ചേവ സഹേതുകാധിപതി സമ്പയുത്തകാനം ഖന്ധാനം ഹേതൂനഞ്ച അധിപതിപച്ചയേന പച്ചയോ. (൩)

൧൪൦. സഹേതുകോ ചേവ ന ച ഹേതു ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം ദത്വാ സീലം…പേ… ഉപോസഥകമ്മം കത്വാ തം ഗരും കത്വാ പച്ചവേക്ഖതി, പുബ്ബേ സുചിണ്ണാനി…പേ… ഝാനാ വുട്ഠഹിത്വാ ഝാനം ഗരും കത്വാ പച്ചവേക്ഖതി, അരിയാ മഗ്ഗാ വുട്ഠഹിത്വാ മഗ്ഗം ഗരും കത്വാ പച്ചവേക്ഖന്തി, ഫലം ഗരും കത്വാ പച്ചവേക്ഖന്തി, സഹേതുകേ ചേവ ന ച ഹേതൂ ഖന്ധേ ഗരും കത്വാ അസ്സാദേതി അഭിനന്ദതി; തം ഗരും കത്വാ രാഗോ ഉപ്പജ്ജതി, ദിട്ഠി ഉപ്പജ്ജതി. സഹജാതാധിപതി – സഹേതുകോ ചേവ ന ച ഹേതു അധിപതി സമ്പയുത്തകാനം ഖന്ധാനം അധിപതിപച്ചയേന പച്ചയോ. (൧)

സഹേതുകോ ചേവ ന ച ഹേതു ധമ്മോ ഹേതുസ്സ ചേവ സഹേതുകസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം ദത്വാ… (പഠമഗമനംയേവ). സഹജാതാധിപതി – സഹേതുകോ ചേവ ന ച ഹേതു അധിപതി സമ്പയുത്തകാനം ഹേതൂനം അധിപതിപച്ചയേന പച്ചയോ. (൨)

സഹേതുകോ ചേവ ന ച ഹേതു ധമ്മോ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ അധിപതിപച്ചയേന പച്ചയോ – ആരമ്മണാധിപതി, സഹജാതാധിപതി. ആരമ്മണാധിപതി – ദാനം ദത്വാ… (പഠമഗമനംയേവ). സഹജാതാധിപതി – സഹേതുകോ ചേവ ന ച ഹേതു അധിപതി സമ്പയുത്തകാനം ഖന്ധാനം ഹേതൂനഞ്ച അധിപതിപച്ചയേന പച്ചയോ. (൩)

൧൪൧. ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഹേതുസ്സ ചേവ സഹേതുകസ്സ ച ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ഹേതൂ ച സമ്പയുത്തകേ ച ഖന്ധേ ഗരും കത്വാ ഹേതൂ ഉപ്പജ്ജന്തി. (൧)

ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ സഹേതുകസ്സ ചേവ ന ച ഹേതുസ്സ ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ഹേതുഞ്ച സമ്പയുത്തകേ ച ഖന്ധേ ഗരും കത്വാ സഹേതുകാ ചേവ ന ച ഹേതൂ ഖന്ധാ ഉപ്പജ്ജന്തി. (൨)

ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ അധിപതിപച്ചയേന പച്ചയോ. ആരമ്മണാധിപതി – ഹേതുഞ്ച സമ്പയുത്തകേ ച ഖന്ധേ ഗരും കത്വാ ഹേതൂ ച സമ്പയുത്തകാ ച ഖന്ധാ ഉപ്പജ്ജന്തി. (൩)

അനന്തരപച്ചയോ

൧൪൨. ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ ഹേതൂ പച്ഛിമാനം പച്ഛിമാനം ഹേതൂനം അനന്തരപച്ചയേന പച്ചയോ. (൧)

ഹേതു ചേവ സഹേതുകോ ച ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ ഹേതൂ പച്ഛിമാനം പച്ഛിമാനം സഹേതുകാനഞ്ചേവ ന ച ഹേതൂനം ഖന്ധാനം അനന്തരപച്ചയേന പച്ചയോ. (൨)

ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ ഹേതൂ പച്ഛിമാനം പച്ഛിമാനം ഹേതൂനം സമ്പയുത്തകാനഞ്ച ഖന്ധാനം അനന്തരപച്ചയേന പച്ചയോ. (൩)

൧൪൩. സഹേതുകോ ചേവ ന ച ഹേതു ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ സഹേതുകാ ചേവ ന ച ഹേതൂ ഖന്ധാ പച്ഛിമാനം പച്ഛിമാനം സഹേതുകാനഞ്ചേവ ന ച ഹേതൂനം ഖന്ധാനം അനന്തരപച്ചയേന പച്ചയോ; അനുലോമം ഗോത്രഭുസ്സ… അനുലോമം വോദാനസ്സ…പേ… നിരോധാ വുട്ഠഹന്തസ്സ, നേവസഞ്ഞാനാസഞ്ഞായതനം ഫലസമാപത്തിയാ അനന്തരപച്ചയേന പച്ചയോ. (൧)

സഹേതുകോ ചേവ ന ച ഹേതു ധമ്മോ ഹേതുസ്സ ചേവ സഹേതുകസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ സഹേതുകാ ചേവ ന ച ഹേതൂ ഖന്ധാ പച്ഛിമാനം പച്ഛിമാനം ഹേതൂനം അനന്തരപച്ചയേന പച്ചയോ; അനുലോമം ഗോത്രഭുസ്സ… (സംഖിത്തം). (൨)

സഹേതുകോ ചേവ ന ച ഹേതു ധമ്മോ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ സഹേതുകാ ചേവ ന ച ഹേതൂ ഖന്ധാ പച്ഛിമാനം പച്ഛിമാനം ഹേതൂനം സമ്പയുത്തകാനഞ്ച ഖന്ധാനം അനന്തരപച്ചയേന പച്ചയോ; അനുലോമം ഗോത്രഭുസ്സ…പേ…. (൩)

(സഹേതുകോ ചേവ ന ച ഹേതുമൂലകം തീണിപി ഏകസദിസാ.)

൧൪൪. ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഹേതുസ്സ ചേവ സഹേതുകസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ ഹേതൂ ച സമ്പയുത്തകാ ച ഖന്ധാ പച്ഛിമാനം പച്ഛിമാനം ഹേതൂനം അനന്തരപച്ചയേന പച്ചയോ. (൧)

ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ സഹേതുകസ്സ ചേവ ന ച ഹേതുസ്സ ധമ്മസ്സ അനന്തരപച്ചയേന പച്ചയോ – പുരിമാ പുരിമാ ഹേതൂ ച സമ്പയുത്തകാ ച ഖന്ധാ പച്ഛിമാനം പച്ഛിമാനം സഹേതുകാനഞ്ചേവ ന ച ഹേതൂനം ഖന്ധാനം അനന്തരപച്ചയേന പച്ചയോ.(൨)

ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ അനന്തരപച്ചയേന പച്ചയോ – പുരിമാ പുരിമാ ഹേതൂ ച സമ്പയുത്തകാ ച ഖന്ധാ പച്ഛിമാനം പച്ഛിമാനം ഹേതൂനം സമ്പയുത്തകാനഞ്ച ഖന്ധാനം അനന്തരപച്ചയേന പച്ചയോ. (൩)

സഹജാതപച്ചയാദി

൧൪൫. ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ സഹജാതപച്ചയേന പച്ചയോ… അഞ്ഞമഞ്ഞപച്ചയേന പച്ചയോ… നിസ്സയപച്ചയേന പച്ചയോ (തീണിപി പച്ചയാ പടിച്ചവാരേ ഹേതുസദിസാ).

ഉപനിസ്സയപച്ചയോ

൧൪൬. ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഹേതൂ ഹേതൂനം ഉപനിസ്സയപച്ചയേന പച്ചയോ. (മൂലം കാതബ്ബം) ഹേതൂ സഹേതുകാനഞ്ചേവ ന ച ഹേതൂനം ഖന്ധാനം ഉപനിസ്സയപച്ചയേന പച്ചയോ. (മൂലം കാതബ്ബം) ഹേതൂ ഹേതൂനം സമ്പയുത്തകാനഞ്ച ഖന്ധാനം ഉപനിസ്സയപച്ചയേന പച്ചയോ (ഇമേസം ദ്വിന്നമ്പി പഞ്ഹാനം മൂലാനി പുച്ഛിതബ്ബാനി).

സഹേതുകോ ചേവ ന ച ഹേതു ധമ്മോ സഹേതുകസ്സ ചേവ ന ച ഹേതുസ്സ ച ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – സദ്ധം ഉപനിസ്സായ ദാനം ദേതി…പേ… സമാപത്തിം ഉപ്പാദേതി, മാനം ജപ്പേതി, ദിട്ഠിം ഗണ്ഹാതി, സീലം…പേ… പത്ഥനം ഉപനിസ്സായ ദാനം ദേതി…പേ… സങ്ഘം ഭിന്ദതി; സദ്ധാ…പേ… പത്ഥനാ സദ്ധായ…പേ… പത്ഥനായ മഗ്ഗസ്സ ഫലസമാപത്തിയാ ഉപനിസ്സയപച്ചയേന പച്ചയോ. (൧)

(സഹേതുകോ ചേവ ന ച ഹേതുമൂലകേ ഇമിനാകാരേന വിത്ഥാരേതബ്ബാ അവസേസാ ദ്വേ പഞ്ഹാ.)

ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഹേതുസ്സ ചേവ സഹേതുകസ്സ ച ധമ്മസ്സ ഉപനിസ്സയപച്ചയേന പച്ചയോ – ആരമ്മണൂപനിസ്സയോ, അനന്തരൂപനിസ്സയോ, പകതൂപനിസ്സയോ…പേ…. പകതൂപനിസ്സയോ – ഹേതൂ ച സമ്പയുത്തകാ ച ഖന്ധാ ഹേതൂനം ഉപനിസ്സയപച്ചയേന പച്ചയോ. (ദ്വേ മൂലാനി പുച്ഛിതബ്ബാനി) ഹേതൂ ച സമ്പയുത്തകാ ച ഖന്ധാ സഹേതുകാനഞ്ചേവ ന ച ഹേതൂനം ഖന്ധാനം ഉപനിസ്സയപച്ചയേന പച്ചയോ. (മൂലം പുച്ഛിതബ്ബം) ഹേതൂ ച സമ്പയുത്തകാ ച ഖന്ധാ ഹേതൂനം സമ്പയുത്തകാനഞ്ച ഖന്ധാനം ഉപനിസ്സയപച്ചയേന പച്ചയോ. (൧)

ആസേവനപച്ചയോ

൧൪൭. ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ ആസേവനപച്ചയേന പച്ചയോ (അനന്തരസദിസം).

കമ്മപച്ചയോ

൧൪൮. സഹേതുകോ ചേവ ന ച ഹേതു ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – സഹേതുകാ ചേവ ന ച ഹേതൂ ചേതനാ സമ്പയുത്തകാനം ഖന്ധാനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – സഹേതുകാ ചേവ ന ച ഹേതൂ ചേതനാ വിപാകാനം സഹേതുകാനഞ്ചേവ ന ച ഹേതൂനം ഖന്ധാനം കമ്മപച്ചയേന പച്ചയോ. (൧)

സഹേതുകോ ചേവ ന ച ഹേതു ധമ്മോ ഹേതുസ്സ ചേവ സഹേതുകസ്സ ച ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – സഹേതുകാ ചേവ ന ച ഹേതൂ ചേതനാ സമ്പയുത്തകാനം ഹേതൂനം കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – സഹേതുകാ ചേവ ന ച ഹേതൂ ചേതനാ വിപാകാനം ഹേതൂനം കമ്മപച്ചയേന പച്ചയോ. (൨)

സഹേതുകോ ചേവ ന ച ഹേതു ധമ്മോ ഹേതുസ്സ ചേവ സഹേതുകസ്സ ച സഹേതുകസ്സ ചേവ ന ച ഹേതുസ്സ ച ധമ്മസ്സ കമ്മപച്ചയേന പച്ചയോ – സഹജാതാ, നാനാക്ഖണികാ. സഹജാതാ – സഹേതുകാ ചേവ ന ച ഹേതൂ ചേതനാ സമ്പയുത്തകാനം ഖന്ധാനം ഹേതൂനഞ്ച കമ്മപച്ചയേന പച്ചയോ; പടിസന്ധിക്ഖണേ…പേ…. നാനാക്ഖണികാ – സഹേതുകാ ചേവ ന ച ഹേതൂ ചേതനാ വിപാകാനം ഖന്ധാനം ഹേതൂനഞ്ച കമ്മപച്ചയേന പച്ചയോ. (൩)

വിപാകപച്ചയോ

൧൪൯. ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ വിപാകപച്ചയേന പച്ചയോ – വിപാകോ അലോഭോ അദോസസ്സ അമോഹസ്സ ച വിപാകപച്ചയേന പച്ചയോ (ചക്കം); പടിസന്ധിക്ഖണേ അലോഭോ (യഥാ ഹേതുപച്ചയാ ഏവം വിത്ഥാരേതബ്ബം, നവപി വിപാകന്തി നിയാമേതബ്ബം).

ആഹാരപച്ചയാദി

൧൫൦. സഹേതുകോ ചേവ ന ച ഹേതു ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ ആഹാരപച്ചയേന പച്ചയോ… തീണി.

ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ ഇന്ദ്രിയപച്ചയേന പച്ചയോ (ഇന്ദ്രിയന്തി നിയാമേതബ്ബം, നവപി പരിപുണ്ണം).

സഹേതുകോ ചേവ ന ച ഹേതു ധമ്മോ സഹേതുകസ്സ ചേവ ന ച ഹേതുസ്സ ധമ്മസ്സ ഝാനപച്ചയേന പച്ചയോ… തീണി.

ഹേതു ചേവ സഹേതുകോ ച ധമ്മോ ഹേതുസ്സ ചേവ സഹേതുകസ്സ ച ധമ്മസ്സ മഗ്ഗപച്ചയേന പച്ചയോ … സമ്പയുത്തപച്ചയേന പച്ചയോ… അത്ഥിപച്ചയേന പച്ചയോ… നത്ഥിപച്ചയേന പച്ചയോ… വിഗതപച്ചയേന പച്ചയോ… അവിഗതപച്ചയേന പച്ചയോ.