൧. വിഭങ്ഗവാരോ

ഹേതുപച്ചയോ

൧൨൭. ഹേതുഞ്ചേവ സഹേതുകഞ്ച ധമ്മം പടിച്ച ഹേതു ചേവ സഹേതുകോ ച ധമ്മോ ഉപ്പജ്ജതി ഹേതുപച്ചയാ – അലോഭം പടിച്ച അദോസോ അമോഹോ (ചക്കം). ലോഭം പടിച്ച മോഹോ (ചക്കം); പടിസന്ധിക്ഖണേ അലോഭം പടിച്ച അദോസോ അമോഹോ (ചക്കം). (൧)

ഹേതുഞ്ചേവ സഹേതുകഞ്ച ധമ്മം പടിച്ച സഹേതുകോ ചേവ ന ച ഹേതു ധമ്മോ ഉപ്പജ്ജതി ഹേതുപച്ചയാ – ഹേതും പടിച്ച സമ്പയുത്തകാ ഖന്ധാ; പടിസന്ധിക്ഖണേ…പേ…. (൨)

ഹേതുഞ്ചേവ സഹേതുകഞ്ച ധമ്മം പടിച്ച ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഉപ്പജ്ജന്തി ഹേതുപച്ചയാ – അലോഭം പടിച്ച അദോസോ അമോഹോ സമ്പയുത്തകാ ച ഖന്ധാ (ചക്കം). ലോഭം പടിച്ച മോഹോ സമ്പയുത്തകാ ച ഖന്ധാ (ചക്കം); പടിസന്ധിക്ഖണേ…പേ…. (൩)

൧൨൮. സഹേതുകഞ്ചേവ ന ച ഹേതും ധമ്മം പടിച്ച സഹേതുകോ ചേവ ന ച ഹേതു ധമ്മോ ഉപ്പജ്ജതി ഹേതുപച്ചയാ – സഹേതുകഞ്ചേവ ന ച ഹേതും ഏകം ഖന്ധം പടിച്ച തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ….(൧)

സഹേതുകഞ്ചേവ ന ച ഹേതും ധമ്മം പടിച്ച ഹേതു ചേവ സഹേതുകോ ച ധമ്മോ ഉപ്പജ്ജതി ഹേതുപച്ചയാ – സഹേതുകേ ചേവ ന ച ഹേതൂ ഖന്ധേ പടിച്ച ഹേതൂ; പടിസന്ധിക്ഖണേ…പേ…. (൨)

സഹേതുകഞ്ചേവ ന ച ഹേതും ധമ്മം പടിച്ച ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഉപ്പജ്ജന്തി ഹേതുപച്ചയാ – സഹേതുകഞ്ചേവ ന ച ഹേതും ഏകം ഖന്ധം പടിച്ച തയോ ഖന്ധാ ഹേതു ച…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൩)

൧൨൯. ഹേതുഞ്ചേവ സഹേതുകഞ്ച സഹേതുകഞ്ചേവ ന ച ഹേതുഞ്ച ധമ്മം പടിച്ച ഹേതു ചേവ സഹേതുകോ ച ധമ്മോ ഉപ്പജ്ജതി ഹേതുപച്ചയാ – അലോഭഞ്ച സമ്പയുത്തകേ ച ഖന്ധേ പടിച്ച അദോസോ അമോഹോ (ചക്കം). ലോഭഞ്ച സമ്പയുത്തകേ ച ഖന്ധേ പടിച്ച മോഹോ (ചക്കം); പടിസന്ധിക്ഖണേ…പേ…. (൧)

ഹേതുഞ്ചേവ സഹേതുകഞ്ച സഹേതുകഞ്ചേവ ന ച ഹേതുഞ്ച ധമ്മം പടിച്ച സഹേതുകോ ചേവ ന ച ഹേതു ധമ്മോ ഉപ്പജ്ജതി ഹേതുപച്ചയാ – സഹേതുകഞ്ചേവ ന ച ഹേതും ഏകം ഖന്ധഞ്ച ഹേതുഞ്ച പടിച്ച തയോ ഖന്ധാ…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൨)

ഹേതുഞ്ചേവ സഹേതുകഞ്ച സഹേതുകഞ്ചേവ ന ച ഹേതുഞ്ച ധമ്മം പടിച്ച ഹേതു ചേവ സഹേതുകോ ച സഹേതുകോ ചേവ ന ച ഹേതു ച ധമ്മാ ഉപ്പജ്ജന്തി ഹേതുപച്ചയാ – സഹേതുകഞ്ചേവ ന ച ഹേതും ഏകം ഖന്ധഞ്ച അലോഭഞ്ച പടിച്ച തയോ ഖന്ധാ അദോസോ അമോഹോ ച…പേ… ദ്വേ ഖന്ധേ…പേ… പടിസന്ധിക്ഖണേ…പേ…. (൩)

(സംഖിത്തം. ഏവം വിത്ഥാരേതബ്ബം.)